ނިއު ދިއްލީ، އިންޑިއާ (ޖޫން 27) - އިންޑިއާގެ އުތުރު ޖައްމުގައި ގާއިމްކޮށްފައިވާ ވައިގެ މަރުކަޒަކަށް ދިން ކަމަށް ބެލެވޭ ޑްރޯން ހަމަލާއެއްގެ މައްސަލަ ތަހުގީގު ކުރަން ފަށައިފި އެވެ.
"ލޯ އިންޓެސިޓީ ދެ ގޮވުން އާދީއްތަ ދުވަހުގެ ހެނދުނު ޖައްމު އެއާފޯސް ސްޓޭޝަނުގެ ޓެކްނިކަލް އޭރިއާއިން ރިޕޯޓު ކުރި. އެއް ގޮވުމުގައި އިމާރަތެއްގެ ފުރާޅަށް ކުދި ގެއްލުންތައް ލިބުނު އަދި ދެ ވަނަ ގޮވުމުގައި އެއްވެސް ގެއްލުމެއް ނުވޭ،" އިންޑިއާ އެއާފޯސް އިން ކުރި ޓްވީޓެއްގައި ވެ އެވެ.
"އެއްވެސް އިކުއިޕްމަންޓަކަށް ގެއްލުމެއް ނުވޭ. ސިވިލް އޭޖެންސީތަކާ އެކު މިކަމުގެ ތަހުގީގު ދަނީ ކުރިއަށް."
ޖައްމު އަދި ކަޝްމީރުގެ ޑިރެކްޓަ ޖެނެރަލް އޮފް ޕޮލިސް ދިލްބާގް ސިންގް ވިދާޅުވީ ވައިގެ މަރުކަޒުގެ ތެރެއަށް ގޮވާ އެއްޗެއް ވައްޓާލީ ޑްރޯނެއް ބޭނުންކޮށްގެން ކަމަށް ބެލެވޭ ކަމަށެވެ.
އެ ހާދިސާއަކީ "ޓެރަރިސްޓް ހަމަލާއެއްގެ" ގޮތުގައި އޭނާ ޕްރެސް ޓްރަސްޓް އޮފް އިންޑިއާއަށް ދެއްވި އިންޓަވިއުގައި ސިފަކުރެއްވި އެވެ.
އިންޑިއަން އެކްސްޕްރެސް ނޫހުން ބުނީ ތުހުމަތު ކުރެވޭ ދެ މީހަކު ހައްޔަރުކޮށްފައިވާ ކަމަށާއި ވައިގެ މަރުކަޒުގައި ހުރި ދެ މީހަކަށް ކުދި ޒަހަމްތައް ލިބުނު ކަމަށެވެ.
އިންޑިއާގެ ކައުންޓާ ޓެރަރިޒަމް ޓާސްކް ފޯސް، ނޭޝަނަލް އިންވެސްޓިގޭޝަން އޭޖެންސީގެ ޓީމެއް މިހާރު ދަނީ ޖައްމުގައި ހަރަކާތްތެރިވަމުންނެވެ.
މިއީ ޑްރޯން ބޭނުންކޮށްގެން އިންޑިއާގެ އަސްކަރީ މަޒުކަޒަކަށް ދިން މިފަދަ ފުރަތަމަ ހަމަލާ އެވެ. އެ ގައުމުގެ މިލިޓަރީ ރޭޑާ ސިސްޓަމުން ވައިގެ އުޅަނދާއި ބޮޑެތި ޑްރޯންތައް ދަނެގަނެވުނު ނަމަވެސް ވައިގެ ސަރަހައްދުގައި އުޅޭ ކުދި ޑްރޯން ދަނެގަނެވޭނެ ގޮތެއް ނޯވެ އެވެ.
