ދާކާ، ބަންގްލަދޭޝް (ޖޫން 27) - ބަންގްލަދޭޝްގެ ވެރިރަށް ދާކާގައި ގޭސް ލީކުވެ ހިނގި ބާރުގަދަ ގޮވުމެއްގައި ތިން ބުރީގެ އިމާރާތެއް ބިމާ ހަމަވެ، ހަތް މީހުން މަރުވެއްޖެ އެވެ.
އެ ހާދިސާގައި އިތުރު 50 މީހުންނަށް އަނިޔާވެފައި ވެ އެވެ. ފުލުހުން ބުނީ ގޮވުމުގެ ބާރުގަދަ ކަމުން ދަތުރު ކުރަމުން ދިޔަ ހަތަރު ބަހެއްގެ ކުޑަދޮރުތައް ތަޅައިގެން ގޮސް ބައެއް މީހުންނަށް އަނިޔާވި ކަމަށެވެ.
ދާކާ ފުލުހުންގެ ޗީފް ޝަފީގުއް ރަހްމާން ވިދާޅުވީ ހަތް މީހުން މަރުވެ، 50 މީހުންނަށް އަނިޔާވި ކަމަށެވެ. ނަމަވެސް ފަޔާ ސާވިސްއިން ބުނީ މަރުވެފައިވަނީ ތިން މީހުން ކަމަށެވެ.
"ފަޔާ ސާވިސް އޮފިސަރުން އެ ތަނުގައި އެބަ އުޅޭ. އެ މީހުން ތަހުގީގު ކުރާނެ ގޮވުން ދިމާވި ސަބަބު ދަނެގަންނަން. އެކަމަކު އަޅުގަނޑުމެންނަށް ބެލެވެނީ މީތޭން ގޭސް ޖަމާވެ އިމާރާތުގެ އެންމެ ތިރީ ބުރީގައި ހިނގި ގޮވުމެއް ކަމަށް،" ދާކާ މެޓްރޮޕޮލިޓަން ޕޮލިސް ޖޮއިންޓް ކޮމިޝަނަރު ސައީދު ނޫރުލް އިސްލާމް އޭއެފްޕީއަށް ވިދާޅުވި އެވެ.
މިއީ ބަޔަކު ގަސްތުގައި ދިން ހަމަލާއެއްގެ ގޮތުގައި ނުބެލެވޭ ކަމަށް އޭނާ ވިދާޅުވި އެވެ. އަދި ފަހަކަށް އައިސް ދާކާގައި ގޭސް ލީކުވެގެން، މިފަދަ ގޮވުންތައް ދިމާވުން އިތުރުވެފައިވާކަން ފާހަގަކުރެއްވި އެވެ.
މަންޒަރު ދުށް ފަރާތްތަކުން ބުނީ ބާރުގަދަ ގޮވުމާއެކު ތިން ބުރީގެ އިމާރާތް ބިމާ ހަމަވި ކަމަށެވެ. އެ އިމާރާތަކީ ރެސްޓޯރެންޓަކާއި ބައެއް ފިހާރަތައް ހުރި އިމާރާތެކެވެ. ފުލުހުން ބުނީ ކައިރީގައި ހުރި އިތުރު ދެ އިމާރާތަށް ގެއްލުން ލިބުނު ކަމަށެވެ.
