ބެން ގުއެޑާނޭ، ޓިއުނީޝިއާ (ޖޫން 27) - މެޑިޓެރޭނިއަން ކަނޑު ހުރަސްކޮށް ލީބިޔާއިން ޔޫރަޕަށް ހިޖުރަ ކުރަން މަސައްކަތް ކުރި 178 މީހުން ޓިއުނީޝިއާގެ ކަނޑުގެ ސިފައިން ސަލާމަތްކޮށްފި އެވެ.
ޓިއުނީޝިއާގެ ދެކުނު އައްސޭރިފަށާ ދިމާލުން ހިންގި ތިން އޮޕަރޭޝަނެއްގައި ކަނޑު މަތިން 178 މީހަކު ސަލާމަތް ކުރި މަރުވެފައިވާ ދެ މީހެއްގެ ހަށިގަނޑު ވެސް ފެނިފައި ވެ އެވެ.
ސަލާމަތް ކުރި މީހުންގެ ތެރޭގައި ހިމެނެނީ މިސްރު، ޓިއުނީޝިއާ، އައިވަރީ ކޯސްޓު، ބަންގްލަދޭޝް، ނައިޖީރިއާ، މާލީ އަދި އިތިއޮޕިއާގެ ރައްޔިތުންނެވެ. އެ މީހުން ދަތުރު ފެށީ ލީބިޔާގެ ޒުވާރާ ބަނދަރުން ހުކުރު ދުވަހު އެވެ.
މިދިޔަ ބުރާސްފަތު ދުވަހު ވެސް ޓިއުނީޝިއާއިން ވަނީ ހިޖުރަ ކުރަން ތައްޔާރުވެގެން ތިބި 267 މީހުން ހުއްޓުވާފަ އެވެ. އޭގެ ތެރޭގައި ގިނައިން ހިމެނެނީ ބަންގްލަދޭޝް މީހުން ކަމަށް އިންޓަނޭޝަނަލް އޯގަނައިޒޭޝަންް ފޯ މައިގްރޭޝަން (އައިއޯއެމް) އިން ބުނެ އެވެ.
ރެޑް ކްރެސެންޓުގެ އޮފިޝަލް މޮންގީ ސްލިމް ބުނީ ހިޖުރަ ކުރަނިކޮށް ސަލާމަތް ކުރާ މީހުން ބޭތިއްބުމަށް ޓިއުނީޝިއާގައި ހަދާފައިވާ މަރުކަޒުތައް ފުރިފައިވާ ކަމަށެވެ.
އައިއޯއެމްގެ ތަފާސްހިސާބަށް ބަލާއިރު، ޔޫރަޕަށް ދިޔުމުގެ ވިސްނުމުގައި ލީބިޔާއިން ދަތުރު ފެށި 1،000 އަށް ވުރެ ގިނަ މީހުން މިދިޔަ ޖެނުއަރީ މަހުން ފެށިގެން ޓިއުނީޝިއާއިން ސަލާމަތްކޮށްފައި ވެ އެވެ.
އޭގެ އިތުރުން ހިޖުރަ ކުރަން ކުރާ މަސައްކަތް ވެސް ވަނީ އިތުރުވެފަ އެވެ. އެގޮތުން ޖެނުއަރީ އިން އޭޕްރިލް މަހުގެ ނިޔަލަށް 11،000 ދަތުރު ލީބިޔާއިން ފަށާފައި ވެ އެވެ. މިއީ މިދިޔަ އަހަރުގެ އެ މުއްދަތާ އަޅާ ބަލާއިރު 70 ޕަސެންޓު އިތުރު އަދަދެކެވެ.
އދ. އިން ބުނެފައިވާ ގޮތުގައި މި އަހަރުގެ ޖެނުއަރީ އިން މޭ މަހުގެ ނިޔަލަށް މެޑިޓެރޭނިއަން ކަނޑު ހުރަސް ކުރަން އުޅުމުގެ ތެރޭގައި 760 މީހުން މަރުވެފައި ވެ އެވެ.
