ރިއޯ ޑި ޖަނެއިރޯ (ޖޫން 28) - ކޮޕަ އެމެރިކާ ފުޓްބޯޅަ މުބާރާތުގައި ރޭ އެކުއެޑޯއާ 1-1 އިން އެއްވަރުވެ، 10 މެޗަށް ފަހު ބްރެޒިލްގެ މޮޅުވުމުގެ ރެކޯޑަށް ނިމުން އަތުވެއްޖެ އެވެ.
މި ފަހަރުގެ މުބާރާތުގައި ފުރަތަމަ ކުޅުނު ތިން މެޗުން ވެސް މޮޅުވެފައި އޮތް ބްރެޒިލް ރޭ އެއްވަރުވިއިރު، އެންމެ ފަހުން އެ ޓީމަށް މޮޅެއް ނުހޯދުނީ އެކުވެރިކަމުގެ މެޗެެއްގައި 2019 ވަނަ އަހަރު ނޮވެމްބަރު މަހު އާޖެންޓީނާ އަތުންނެެވެ.
ފުރަތަމަ ހާފުގައި ރަނގަޅަށް ކުޅުނު ބްރެޒިލުން ލީޑުނެގީ 37 ވަނަ މިނިޓްގައި ފަހަތަށް ކުޅޭ އެޑާ މިލިޓާއޯ ޖެހި ގޯލުންނެވެ. މިލިޓާއޯ މި ގޯލު ޖެހީ އެވަޓަން ސޮއާރޭސް ނެގި ހިލޭ ޖެހުމަކުން ބޮލުން ގޯލުގެ ތެރެއަށް ބޯޅަ ފޮނުވާލައިގެންނެވެ. މިއީ ރެއާލް މެޑްރިޑަށް ކުޅޭ މިލިޓާއޯ ގައުމީ ޓީމަށް ޖަހައިދިން ފުރަތަމަ ގޯލެވެ.
ބްރެޒިލުން ލީޑުގައި އޮވެ، ފުރަތަމަ ހާފު ނިންމާލި ނަމަވެސް ދެ ވަނަ ހާފްގެ ކުޅުން ފެށިގެން މާ ގިނައިރެއް ނުވެ އެކުއެޑޯ އިން ނަތީޖާ ހަމަހަމަކުރި އެވެ. އެ ޓީމުގެ ގޯލު މެޗުގެ 53 ވަނަ މިނިޓްގައި ކާމިޔާބުކުރީ އެނާ ވެލެންސިއާ ދިން ބޯޅައަކުން އެންހެލް މެނާ އެވެ. މެނާ މި ގޯލު ޖެހީ ބްރެޒިލްގެ ކީޕަރު އެލިސަން ބެކާ އަށް އެއްވެސް ފުރުސަތެއް ނުދީ އެެވެ.
އިތުރު ގޯލެއް ޖަހައި މެޗުން މޮޅުވާން ބްރެޒިލުން މަސައްކަތްކުރި ނަަމަވެސް އެކުއެޑޯ ޑިފެންޑަރުން ވަނީ ބްރެޒިލްގެ އެޓޭކްތައް ހުއްޓުވައިފަ އެވެ. ބްރެޒިލުން މި މެޗުގައި ނޭމާ އާއި ގަބްރިއެލް ޖީސޫސްގެ ބޭނުމެއް ނުކުރެ އެވެެ.
މެޗަށް ފަހު ބްރެޒިލްގެ ޑިފެންޑަރު މާކުއީނިއޯސް ބުނީ މި މެޗަކީ ނަތީޖާ އަށް ވުރެ ބޮޑަށް ސްކޮޑުގައި ފުރުސަތު ނުލިބި ހުރި ކުޅުންތެރިންނަށް ކުޅެލަން ދޭން އިސްކަން ދިން މެޗެއް ކަމަށާއި އެހެންވުމުން ނަތީޖާއާ މެދު މާ ބޮޑު ކަންބޮޑުވުންތަކެއް ނެތް ކަމަށެވެ.
ކުއާޓާ ފައިނަލުން ބްރެޒިލް ފުރުސަތު ހޯދީ ގްރޫޕް ބީގެ އެއް ވަނަ ޓީމުގެ ގޮތުގައި ހަތަރު މެޗުން 10 ޕޮއިންޓް ހޯދައިގެންނެވެ. ގްރޫޕްގެ ދެ ވަަނަ އަށް ދިޔައީ ރޭ ވެެނެޒުއޭލާ 1-0 އިން ބަލިކުރި ޕެރޫ އެވެ. އެ ޓީމަށް ވަނީ ހަތަރު މެޗުން ހަތް ޕޮއިންޓް ލިބިފަ އެވެ. ދެން މި ގްރޫޕުން ކުއާޓާ ފައިނަލުގެ ދެ ޖާގަ ލިބުނީ ތިން ވަަނައިގައި ނިންމާލި ކޮލަމްބިއާ އާއި ހަތަރެއްގައި ނިންމާލި އެކުއެޑޯ އަށެވެ. ކޮލަމްބިއާ އަށް ހަތަރު ޕޮއިންޓް ލިބުނުއިރު، އެކުއެޑޯގެ އޮތީ ތިން ޕޮއިންޓެވެ.
އެންމެ ފުލަށް ގޮސް މި ގްރޫޕުން ކެޓި ވެނެޒުއޭލާގެ އޮތީ ދެ ޕޮއިންޓެވެ.
