ޑުބާއީ، ޔޫއޭއީ (ޖޫން 27) - ޔަމަނުގެ މަރިބް ސިޓީ ހިފަން ހޫތީ ހަނގުރާމަވެރިންނާއި ސަރުކާރުގެ ފައުޖުތަކާ ދެމެދު ހިނގަމުންދާ ކުރިމަތިލުންތަކުގައި ފާއިތުވި ތިން ދުވަސް ތެރޭގައި 111 މީހުން މަރުވެއްޖެ އެވެ.
މަރިބް އާއި އެ ތަން ވަށައިގެންވާ ތެޔޮ ވަޅުތަކަކީ ޔަމަނުގެ ހަ އަހަރުވީ ދިގު ދާހިލީ ހަނގުރާމައިގައި މި ވަގުތު ސަރުކާރުގެ ކޮންޓްރޯލުގެ ދަށުގައި އޮތް ހަމައެކަނި ތަނެވެ. އެހެންވެ، އިރާނުގެ ސަޕޯޓާއެކު އުޅޭ ހޫތީން ބޭނުންވަނީ އެތަން ހިފާށެވެ.
ޔަމަނުގެ ހަނގުރާމައިގެ ސަބަބުން ބޮޑު އިންސާނީ ކާރިސާއެއް އުފެދިފައި ވާއިރު، ސުލްހަ ގާއިމް ކުރަން ކުރި ޑިޕްލޮމެޓިކް މަސައްކަތުން އެއްވެސް ނަތީޖާއެއް މިއަދާ ހަމައަށް ފެނިފައެއް ނުވެ އެވެ. މަރިބްގެ ކޮންޓްރޯލް ހޯދަން އުޅޭތީ ހަމަލާ ބަދަލު ކުރުން އަނެއްކާވެސް ވަނީ ވަރުގަދަ ވެފަ އެވެ.
މިދިޔަ ބުރާސްފަތި ދުވަހުން ފެށިގެން މިއަދާ ހަމައަށް މެދުކެނޑުމެއް ނެތި ހިންގި ހަމަލާ ބަދަލު ކުރުންތަކުގައި ސަރުކާރު ފައުޖުތަކުގެ 29 ސިފައިންނާއި ހަނގުރާމަވެރިންގެ 82 މީހުން މަރުވި އެވެ.
ޔަމަނު ސަރުކާރުގެ އޮފިޝަލުން ބުނީ ބުރާސްފަތި ދުވަހުން ފެށިގެން ހޫތީންގެ ހަމަލާތައް ވަރުގަދަކޮށްފައިވާ ކަމަށެވެ. އެގޮތުން މަރިބްގެ އުތުރާއި ދެކުނާއި ހުޅަނގުން ދަނީ ހަމަލާ ފޮނުވަމުންނެވެ.
ނަމަވެސް ސައުދީ އަސްކަރީ ކޯލިޝަނުގެ އެއްބާރުލުމާއެކު ސަރުކާރުން ގާއިމްކޮށްފައިވާ ވައިގެ ޑިފެންސް ފޫއަޅުވާލެވޭ ގޮތް އަދިވެސް ހަނގުރާމަވެރިންނަކަށް ނުވެ އެވެ.
ޔަމަނުގެ ދާހިލީ ހަނގުރާމަ 2014 ވަނަ އަހަރު ފެށި ގޮތަށް މިއަދާ ހަމައަށް ވެސް ކުރިއަށް ދާއިރު، އާއްމު ރައްޔިތުންގެ ތެރެއިން އެތައް މިލިއަން މީހުންނަށް ވަނީ ބަނޑުހައި ހޫނުކަމާ ކުރިމަތިލާން ޖެހިފައި ކަމަށް އދ. އިން ބުނެ އެވެ.
