ބެންކޮކް، ތައިލޭންޑް (ޖޫން 27) - މާދަމާއިން ފެށިގެން ތައިލޭންޑުގެ ވެރިރަށް ބެންކޮކްގައި ކޮވިޑް ކޮންޓްރޯލް ކުރަން އަޅާފައިވާ ފިޔަވަޅުތައް އިތުރަށް ވަރުގަދަ ކުރަން ނިންމައިފި އެވެ.
ތައިލޭންޑުން ވަނީ ގާތްގަނޑަކަށް އެއް އަހަރު ވަންދެން ކާމިޔާބުކަމާ އެކު ބަލި ފެތުރުން ކޮންޓްރޯލް ކޮށްފަ އެވެ. ނަމަވެސް އޭޕްރިލް މަހުން ފެށިގެން ކޭސްތައް އިތުރުވާން ފެށި އެވެ.
އޭގެ ފަހުން ތައިލޭންޑުގެ ޖަލުތަކާއި، ބިދޭސީ މަސައްކަތްތެރިންގެ މެދުގައި ކޭސްތައް އިތުރުވި އެވެ. ސަރުކާރުން ބުނެފައި ވަނީ މާދަމާއިން ފެށިގެން އެއް މަސް ވަންދެން ފިޔަވަޅުތައް ހަރުކަށި ކުރަން ނިންމާފައިވާ ކަމަށެވެ.
އެގޮތުން ބެންކޮކްގައި ކޮންސްޓްރަކްޝަން ސައިޓުތައް ބަންދުކޮށް، ރެސްޓޯރެންޓުތަކުގައި ކެއުން މަނާކޮށް، 20 މީހުންނަށް ވުރެ ގިނައިން އެއް ތަނެއްގައި ތިބުން މަނާ ވާނެ އެވެ.
ދެކުނުގެ ޕްރޮވިންސްތަކުގައި ޗެކްޕޮއިންޓް ގާއިމް ކުރަން ނިންމާފައި ވާއިރު، ދަތުރު ކުރަން ބޭނުން ނަމަ އެކަމަށް ހާއްސަ ހުއްދަ ހޯދަން ޖެހޭނެ އެވެ.
ތައިލޭންޑުގައި ފިޔަވަޅުތައް ވަރުގަދަ ކުރިއިރު، ޖުލައި 1 އިން ފެށިގެން ފަތުރުވެރިންނަށް ފުކެޓް ހުޅުވާލަން ވަނީ ނިންމާފަ އެވެ. އެގޮތުން ވެކްސިން ފުރިހަމަކޮށްފައިވާ މީހުންނަށް ކަރަންޓީން ކުރަން ނުޖެހި ފުކެޓަށް ދެވޭނެ އެވެ.
