ބެއިރޫތް، ލުބްނާން (ޖޫން 27) - ލުބްނާން ފައިސާގެ އަގު ރިކޯޑް މިންވަރަކަށް ވެއްޓުމުން ރުޅިގަދަވެފައި ތިބި އާއްމުން މަރުކަޒީ ބޭންކުގެ އޮފީސްތަކަށް ވަދެގަންނަން މަސައްކަތް ކޮށްފި އެވެ.
ނަވާރަ ސަތޭކަ ނުވަދިހަ ހަތަކުން ފެށިގެން ލުބްނާން ޕައުންޑެއްގެ އަގަކީ ޑޮލަރަކަށް 1،507 އެވެ. ނަމަވެސް އެ ގައުމަށް މިހާރު ދިމާވެފައިވާ އިގްތިސާދީ ކާރިސާގައި ފައިސާގެ އަގު ދަނީ ވަނީ ވެއްޓެމުންނެވެ.
އެގޮތުން މިހާރު ޕައުންޑެއްގެ އަގަކީ ޑޮލަރަކަށް 17،300-17،500 އަދި ބައެއް ފަހަރު 18،000 ކަމަށް ފައިސާ މާރުކޮށްދޭ ފަރާތްތަކުން ވަނީ ބުނެފަ އެވެ.
އުތުރު ޓްރިޕޮލީ ސިޓީގައި އެކަމާ ހިތްހަމަނުޖެހި ގިނަ ބަޔަކު މަގުތަކަށް ނުކުމެ ވަނީ ދިރިއުޅުމުގެ ފެންވަރު ދަށްވަމުންދާ މައްސަލައިގައި ސިޔާސީ ފަރާތްތަކަށް ފާޑުކިޔާފަ އެވެ.
ބައެއް މީހުން ވަނީ އެ ސިޓީގައި ހުންނަ މަރުކަޒީ ބޭންކުގެ ގޭޓު ފަޅާލައި، އިމާރާތް ތެރެއަށް ވަންނަން މަސައްކަތް ކޮށްފަ އެވެ. ނަމަވެސް ސިފައިން އެ މީހުން ހުއްޓުވި އެވެ.
އޭގެ އިތުރުން ސަރުކާރު އޮފީހެއްގެ ގޭޓުގައި ހުޅު ޖަހައި، ދެ ޕާލިމެންޓު މެމްބަރެއްގެ ގެޔަށް ވަދެ ގަންނަން ވެސް މުޒާހަރާ ކުރަމުން ދިޔަ މީހުން މަސައްކަތް ކުރި އެވެ.
ދެކުނު ސިޑޯން ސިޓީގައި ވެސް އާއްމުން މަސައްކަތް ކުރީ މަރުކަޒީ ބޭންކުގެ އޮފީސް ތެރެއަށް ވަނުމަށެވެ. މި ދެ ސިޓީގެ އިތުރުން ވެރިރަށް ބެއިރޫތުގައި ވެސް މުޒާހަރާ ކުރި އެވެ.
ދެހާސް ނަވާރަ ވަނަ އަހަރުން ފެށިގެން ލުބްނާނަށް ދިމާވެފައިވާ އިގްތިސާދީ ކާރިސާއަކީ 19 ވަނަ ގަރުނުގެ ފަހުން ގައުމަކަށް ކުރިމަތިވި އެންމެ ގޯސް މާލީ ހާލަތުގެ ގޮތުގައި ވޯލްޑް ބޭންކުން ސިފަކުރެ އެވެ.
ލުބްނާން ޕައުންޑުގެ އަގު ވެއްޓުމުން ޒަރޫރީ ތަކެތި ގައުމަށް އެތެރެ ކުރަން ވެސް ވަނީ ދަތިވެފަ އެވެ. އެގޮތުން ޑޮލަރު ހޭދަކޮށްގެން އިމްޕޯޓް ކުރާ ބޭހާއި ތެޔޮ ލިބޭނެ ގޮތެއް ނެތެވެ.
މިދިޔަ އަހަރު ބެއިރޫތުގައި ބޮޑު ގޮވުމެއް ގޮވައި، 200 މީހުން މަރުވެ، ސިޓީގެ ބޮޑު ބައެއް ހަލާކުވި ފަހުން ލުބްނާންގައި ފުރިހަމަ ސަރުކާރެއް ނެތެވެ.
އެ ހާދިސާއަށް ފަހު ސަރުކާރުން އިސްތިއުފާ ދިން އިރު، އާ ކެބިނެޓެއް ހޮވުމަށް ސިޔާސީ ފަރާތްތަކަށް ވަނީ އެއްބަސްވުމަކަށް އާދެވޭ ގޮތް ނުވެފަ އެވެ.
