ﷲއާބާދު، އިންޑިއާ (ޖޫން 26) - ގަންގާ ކޯރުގައި ފެންބޮޑުވާ މޫސުން ފެށުމާއެކު ކޮވިޑް ޖެހިގެން މަރުވެ، އެ ކޯރު ކައިރީގައި ވަޅުލި މީހުންގެ ހަށިތައް ފެނުގެ މައްޗަށް އަރަން ފަށައިފި އެވެ.
އުތުރު ﷲއާބާދު ސިޓީގެ އޮފިޝަލެއް ކަމަށްވާ ނީރަޖް ކުމާރް ސިންގް ވިދާޅުވީ ފާއިތުވި ތިން ހަފްތާގައި އެގޮތަށް ފްލޯޓްވެގެން އެރި 150 ގަބުރު އަންދާލަން ޖެހުނު ކަމަށެވެ.
"ގާތްގަނޑަކަށް އެއް ކިލޯމީޓަރު ސަރަހައްދެއްގައި ހަށިތައް ވަޅުލާފައިވޭ. އެހެންވެ ބެލެވެނީ އެ ތަނުގައި 500-600 ގަބުރު ވާނެ ކަމަށް،" އޭނާ އޭއެފްޕީއަށް ވިދާޅުވި އެވެ.
އެ ތަނުގައި ވަޅުލާފައިވާ ގިނަ މީހުންނަކީ ބެލެވޭ ގޮތުގައި މިދިޔަ އޭޕްރިލް އަދި މޭ މަހު ކޮވިޑް ޖެހިގެން މަރުވި މީހުންނެވެ.
ހިންދޫ ދީނުގައިވާ ގޮތަށް ހަށިގަނޑު އަންދާލަން ދަރު ހޯދާނެ ފައިސާ ބައެއް އާއިލާތަކަށް ނުލިބުމުން، އެ މީހުން ނިންމީ ހަށިތައް ގަންގާ ކޯރަށް ދޫކޮށްލަން ނުވަތަ އައްސޭރިފަށުގައި ވަޅުލާށެވެ.
ނަމަވެސް ވާރޭ މޫސުން ފެށުމާއެކު ކޯރުގައި ފެންބޮޑުވެ، އައްސޭރިފަށުގައި ވަޅުލާފައިވާ ހަށިތައް ވެސް ވަނީ ފެނުން މަތީގައި ފްލޯޓްވާން ފަށާފަ އެވެ.
