ޑާކާ، ބަންގްލަދޭޝް (ޖޫން 26) - ޑެލްޓާ ވޭރިއެންޓުގެ ސަބަބުން "ނުރައްކާތެރި އަދި ކަންބޮޑުވާ މިންވަރަށް" ކޭސްތައް އިތުރުވަމުން ދާތީ އަންނަ ހޯމަ ދުވަހުން ފެށިގެން ބަންގްލަދޭޝްގައި ލޮކްޑާއުންގެ ފިޔަވަޅުތައް ހަރުކަށި ކުރަން ނިންމައިފި އެވެ.
އެގޮތުން ސަރުކާރާއި އަމިއްލަ އޮފީސްތައް ވެސް އެއް ހަފްތާއަށް ބަންދުވާނެ އެވެ. އަދި ދަތުރުފަތުރުގެ ނިޒާމު ހުއްޓުމަކަށް ގެނެސް، ހުއްދަ ދޭނީ ހަމައެކަނި ސިއްހީ ކަންކަމުގައި ދަތުރު ކުރަން ކަމަށް ވަނީ ނިންމާފަ އެވެ.
"ކުއްލި ހާލަތެއް ދިމާވެގެން މެނުވީ އެއްވެސް މީހަކަށް ގެއިން ބޭރަށް ނުނިކުމެވޭނެ،" ބަންގްލަދޭޝް ސަރުކާރުން ނެރުނު ބަޔާނެއްގައި ބުންޏެވެ.
ހެލްތު ޑިޕާޓްމަންޓުގެ ތަރުޖަމާނު ރޫބިދް އަމީން ވިދާޅުވީ ލޮކްޑައުންގެ ފިޔަވަޅުތައް ތަންފީޒު ކުރަން ފުލުހުންނާއި ބޯޑަރު ގާޑުން އުޅޭނެ ކަމަށެވެ. އަދި ބޭނުން ޖެހިއްޖެ ހާލަތެއްގައި ސިފައިން ވެސް ނުކުންނާނެ ކަމަށް ވިދާޅުވި އެވެ.
"މިއީ ނުރައްކާތެރި އަދި ކަންބޮޑުވާން ޖެހޭ ހާލަތެއް. މިހާރު ވައިރަސް ކޮންޓްރޯލް ނުކުރެވިއްޖެ ނަމަ އިންޑިއާއަށް ދިމާވި ކަހަލަ ހާލަތަކާ ކުރިމަތިލާން ޖެހޭނެ،" އަމީން އޭއެފްޕީއަށް ވިދާޅުވި އެވެ.
މޭ މަހުގެ މެދަކާ ހިސާބުން ފެށިގެން 170 މިލިއަން މީހުން ދިރިއުޅޭ ބަންގްލަދޭޝްގެ ކޭސްތައް ވަނީ އިތުރުވާން ފަށާފަ އެވެ.
އެގޮތުން މިދިޔަ ހުކުރު ދުވަހު އެކަނިވެސް 6،000 ކޭސްއާއެކު 108 މީހުން މަރުވި އެވެ. އެއީ މި ބަލިމަޑުކަމުގައި ދެ ވަނައަށް އެންމެ ގިނައިން މީހުން މަރުވި ދުވަހެވެ.
ކަމާ ބެހޭ ފަރާތްތަކުން ބުނީ އިންޑިއާއާ ގުޅޭ ބޯޑަރު ކައިރީގައިވާ ޑިސްޓްރިކްޓުތަކުގެ ހާލަތު ވަރަށް ގޯސް ކަމަށެވެ. އެގޮތުން ހުލްނާ އާއި ރާޖްޝާހީ ފަދަ ސިޓީތަކުގެ ހޮސްޕިޓަލްތައް ވަނީ ފުރިފަ އެވެ.
އިންޑިއާގައި ކޭސްތަކުގެ އަދަދު ވަނީ މަދުވާން ފަށާފަ އެވެ. އެގޮތުން މިދިޔަ މޭ މަހު ދުވާލަކު 400،000 މީހުން ޕޮޒިޓިވްވި އިރު، މިދިޔަ ހުކުރު ދުވަހު ފެނުނީ 50،000 އަށް ވުރެ މަދު ކޭސް އެވެ.
ނަމަވެސް ހުކުރު ދުވަހު މަހަރާޝްތްރަ ސްޓޭޓުގައި އަނެއްކާވެސް ވަނީ ފިޔަވަޅުތައް ވަރުގަދަކޮށްފަ އެވެ. އެއީ އިންޑިއާއިން މުޅިން އަލަށް ފެނިގެން އުޅޭ ޑެލްޓާ ޕްލަސް ވޭރިއެންޓާ ގުޅިގެންނެވެ. އެ ވޭރިއެންޓުގެ 50 އެއްހާ ކޭސް މުޅި އިންޑިއާއިން މިހާތަނަށް ފެނިފައި ވެ އެވެ.
