ޕެރިސް، ފްރާންސް (ޖޫން 25) - ކޮވިޑާ ދެކޮޅަށް ވެކްސިން ދިނުމުގައި ކުރި ހޯދާފައިވާ ގައުމުތަކުން ވެސް ޑެލްޓާ ވޭރިއެންޓާއެކު އާ ސާޖްތައް އަންނަމުން ދާތީ އިތުރު ގޮންޖެހުންތަކާ ކުރިމަތިވެއްޖެ އެވެ.
ދުނިޔޭގެ ނިސްބަތުން ބަލާއިރު، މިދިޔަ ފެބްރުއަރީ މަހުން ފެށިގެން ކޭސްތައް ވަނީ މަދުވާން ފަށާފައި ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެ އެވެ.
ނަމަވެސް އެންމެ ފުރަތަމަ އިންޑިއާއިން ފެނުނު ޑެލްޓާ ވޭރިއެންޓު ގިނަ ގައުމުތަކަށް ފެތުރި، ލުއިދީފައިވާ ގައުމުތަކުން ވެސް އަލުން މި ވަނީ ފިޔަވަޅުތައް ހަރުކަށި ކުރަން ފަށާފަ އެވެ.
"ޑެލްޓާ ވޭރިއެންޓާ ގުޅިގެން މުޅި ދުނިޔޭގައި ވެސް ކަންބޮޑުވުން އެބަ އޮތް. ޑަބްލިއުއެޗްއޯއިން ވެސް ކަންބޮޑުވޭ،" އެ ޖަމިއްޔާގެ ޗީފް ޓެޑްރޯސް އަދަނޮމް ވިދާޅުވި އެވެ.
"މިހާތަނަށް ފެނިފައިވާ ވޭރިއެންޓުތަކުގެ ތެރެއިން އެންމެ ހަލުވިކަމާއެކު ފެތުރެނީ ޑެލްޓާ. މި ވޭރިއެންޓު 85 ގައުމަކުން ފެނިފައި ވާއިރު، ވެކްސިން ނުޖަހާ ތިބި މީހުންގެ މެދުގައި ދަނީ ހަލުވިކަމާއެކު ފެތުރެމުން."
މި ވޭރިއެންޓުގެ ސަބަބުން ރަޝިއާ، އޮސްޓްރޭލިއާ އަދި އިޒްރޭލުގައި ކޭސްތައް ވަނީ މަތިވާން ފަށާފަ އެވެ. އެހެން ގައުމުތަކުން ވެސް ތިބީ ބިރެއްގެ ތެރޭގަ އެވެ.
ތަޖުރިބާކާރުން ދެކޭ ގޮތުގައި ޑެލްޓާ ވޭރިއެންޓަކީ ހަލުވިކަމާއެކު ފެތުރޭ ވޭރިއެންޓަކަށް ވާތީ، އެ ފެތުރުން ކޮންޓްރޯލް ކުރަން އާބާދީގެ 80 ޕަސެންޓަށް ވުރެ ގިނަ މީހުން ވެކްސިން ފުރިހަމަ ކުރަން ޖެހޭނެ އެވެ.
