ޖިންސީ ގޯނާގެ ތުހުމަތުތަކެއް އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓުމަށް ކުރިމިނަލް ކޯޓަށް އަނެއްކާވެސް ހުށަހަޅައިފި އެވެ.
ޕްރޮސިކިއުޓާ ޖެނަރަލް އޮފީހުގެ މީޑިއާ އޮފިޝަލް އަހުމަދު ޝަފީއު ވިދާޅުވި ގޮތުގައި، އަލީ ވަހީދުގެ ޕާސްޕޯޓް ހިފެހެއްޓުމަށް ކޯޓަށް ހުށަހަޅަން އެ އޮފީހުގެ ފަރާތުން ފުލުހުގައި މިދިޔަ އަންގާރަ ދުވަހު އެދުނެވެ. އެގޮތުގެ މަތިން ފުލުހުން މިހާރު ކުރިމިނަލް ކޯޓަށް އެކަން ހުށަހަޅާފައިވާ ކަމަށެވެ.
މި މައްސަލާގައި އެންމެ ފުރަތަމަ ވެސް ކުރިމިނަލް ކޯޓުގެ އަމުރެއްގެ ދަށުން އަލީ ވަހީދުގެ ޕާސްޕޯޓް ހިފެހެއްޓި އެވެ. ނަމަވެސް، އަލީ ވަހީދު ބޭސްފަރުވާއަށް ރާއްޖޭން ބޭރަށް ދިޔުމުގެ ހުއްދަދީ، ކުރިމިނަލް ކޯޓުން އެ އަމުރު ފަހުން ބާތިލުކުރި އެވެ.
އެ އަމުރު ބާތިލުކޮށް، އަލީ ވަހީދަށް ރާއްޖޭން ބޭރަށް ދެވޭ ގޮތް ހެދީ އޭނާގެ މައްޗަށް ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ ޖާމިނުވެގެންނެވެ. ޖާމިނު އެއްބަސްވުން ހެދީ ހަތަރު މަހެވެ. އެ މުއްދަތު މި މަހުގެ ނުވަ ވަނަ ދުވަހަށް ވަނީ ހަމަވެފަ އެވެ.
ނަމަވެސް، އަލީ ވަހީދުގެ ބޭސްފަރުވާ ނުނިމޭތީ އޭނާ ރާއްޖޭން ބޭރުގައި ހުރުމުގެ ހުއްދަ ކޯޓުން ވަނީ ދީފަ އެވެ. އަދި، އޮންލައިންކޮށް ރާއްޖޭން ބޭރުގައި ހުރެގެން ޝަރީއަތުގެ އަޑުއެހުމުގައި ބައިވެވެރިވެވޭނެ ގޮތް ވެސް ކުރިމިނަލް ކޯޓުން ވަނީ ހަމަޖައްސަފާ އެވެ.
ނަމަވެސް، އެކަމަށް ޕްރޮސިކިއުޓާ ޖެނަރަލް އިއުތިރާޒު ކުރައްވަ އެވެ. އެހެންވެ، ކުރިމިނަލް ކޯޓުގެ އެ ނިންމުންތައް އިސްތިއުނާފުކުރުމަށް ވެސް ޕްރޮސިކިއުޓާ ޖެނަރަލް ހުސެއިން ޝަމީމް ވަނީ ނިންމަވާފަ އެވެ.
އަލީ ވަހީދުގެ ޕާސްޕޯޓް ދޫކޮށްލި މައްސަލާގައި ޕީޖީން ހައިކޯޓަށާއި ސުޕްރީމް ކޯޓަށް ވެސް ދިޔަ އެވެ. ނަމަވެސް، އަލީ ވަހީދުގެ ޣައިރު ހާޒިރުގައި އެ މައްސަލަ ކުރިއަށް ނުގެންދެވޭނެ ކަމަށް ބުނެ އެ ދެ ކޯޓުން ވެސް މައްސަލަ ބޭރުކޮށްލީ އެވެ.
އަލީ ވަހީދުގެ މައްޗަށް ދައުވާ ކޮށްފައިވަނީ ޓޫރިޒަމް މިނިސްޓަރުގެ ކަމުގައި ހުންނަވައި އެ ތަނުގެ މުވައްޒަފުންތަކަކަށް ޖިންސީ ފުރައްސާރަ އާއި ގޯނާކުރި ކަމަށް އެ މުވައްޒަފުން ތުހުމަތުކުރާ މައްސަލާގަ އެވެ. އަލީ ވަހީދަށް މިނިސްޓަރުކަން ވެސް ގެއްލުނީ އެ މައްސަލާގެ ތެރެއިންނެވެ.
