ޑާކާ، ބަންގްލަދޭޝް (ޖޫން 23) - ގިނަ ބަޔަކު ފޮލޯކުރާ ބަންގްލަދޭޝްގެ މަޝްހޫރު ދީނީ އިލްމުވެރިޔަކު, ފޭސްބުކްގައި ބޭނުން ކުރާ "ހާހާ" އިމޯޖީއާ ދެކޮޅަށް ފަތުވާއެއް ނެރެފި އެވެ.
ތިން މިލިއަން މީހުން ފޮލޯކުރާ ޝެއިހް އަހްމަދުﷲ ގެ އަކީ ބަންގްލަދޭޝްގައި ފޭސްބުކާއި ޔޫޓިއުބުގައި ވެސް މަގްބޫލްކަން ހޯދާފައިވާ ޝެއިހެކެވެ.
ބަންގްލަދޭޝްގެ ޓީވީ ޝޯތަކުގައި ވެސް އެކި މައްސަލަތަކާ ގުޅޭ ގޮތުން އޭނާ ގަވާއިދުން ވާހަކަދައްކާ ހަދަ އެވެ. ފޭސްބުކް އިމޯޖީއާ ދެކޮޅަށް އޭނާ ވާހަކަދެއްކީ ތިން މިނެޓުގެ ވީޑިއޯއެއްގަ އެވެ.
އެގޮތުން "ހާހާ" އިމޯޖީ ބޭނުންކޮށްގެން މީހުންނަށް މަލާމާތް ކުރުމަކީ އިސްލާމްދީނުގައި ހަރާމް ކަމެއް ކަމަށް އެ ވީޑިއޯގައި ބުނެފައި ވެ އެވެ.
"މިހާރަކަށް އައިސް ފޭސްބުކްގެ ހާހާ އިމޯޖީ މި ބޭނުން ކުރަނީ މީހުންނަށް މަލާމާތް ކުރަން،" ދެ މިލިއަނަށް ވުރެ ގިނަ ވިއުޒް ލިބިފައިވާ ވީޑިއޯގައި އޭނާ ބުންޏެވެ.
އެ ވީޑިއޯއަށް ގިނަ ބަޔަކު ޕޮޒިޓިވްކޮށް ރިއެކްޓް ކުރި ނަމަވެސް، އެތައް ހާސް ބަޔަކު ވަނީ ފޭސްބުކްގެ "ހާހާ" އިމޯޖީ ބޭނުންކޮށްގެން ރިއެކްޓުކޮށްފަ އެވެ.
