މަސްކެޓް، އޮމާން (ޖޫން 23) - އޮމާންގައި އިންވެސްޓް ކުރާ އެހެން ގައުމުތަކުގެ ރައްޔިތުންނަށް ދިގު މުއްދަތަށް އެ ގައުމުގައި އުޅެވޭނެ ގޮތަށް "ލޯންގް ޓާމް ރެޒިޑެންސީ" ދޫކުރަން ނިންމައިފި އެވެ.
ތެލަށް އޮންނަ ޑިމާންޑު އިތުރުވުމާއި ކޮވިޑުގެ ބަލިމަޑުކަމުގެ ސަބަބުން އޮމާންގެ އިގްތިސާދަށްކޮށް، މާލީ ގޮތުން ވަނީ ބޮޑު ހީނަރުކަމެއް އައިސްފަ އެވެ.
އެހެންވެ، މާލީ ގޮތުން ކުރިއެރުންތައް ހޯދުމަށް ސަރުކާރުން ނިންމީ ފޮރިން އިންވެސްޓަރުންނާއި ރިޓަޔާކޮށްފައި ތިބޭ ބޭރު މީހުންނަށް އެ ގައުމުގައި ދިރިއުޅެވޭނެ ސްކީމެއް ފެށުމަށެވެ.
މިނިސްޓްރީ އޮފް ކޮމާސް، އިންޑަސްޓްރީ އެންޑް އިންވެސްޓަމަންޓް ޕްރޮމޯޝަނުން ނެރުނު ބަޔާނެއްގައި ބުނީ އެ ސްކީމަށް އަމަލު ކުރަން ފަށާނީ އަންނަ ސެޕްޓެމްބަރު މަހުން ފެށިގެން ކަމަށެވެ.
"ރެޒިޑެންސީ ޕީރިއަޑްގެ ގޮތުގައި ވާނީ ފަހެއް ނުވަތަ ދިހަ އަހަރު. އެ މުއްދަތަކީ ބޭނުން ނަމަ އަލުން މުރާޖައާކޮށް އިތުރު ކުރެވޭނެ މުއްދަތެއް،" ބަޔާނުގައި ވެ އެވެ.
ނަމަވެސް ރެޒިޑެންސީ ހޯދަން އިންވެސްޓް ކުރަން ޖެހޭނެ މިންވަރު މިހާތަނަށް ހާމަކޮށްފައެއް ނުވެ އެވެ.
ވަޒީފާ ނެތުމުގެ މައްސަލަ އާއި ވަޒީފާއިން ކަނޑާލުމުގެ މައްސަލަ އިތުރު ވާތީ އޮމާންގައި މުޒާހަރާ ކުރުން ވަނީ އިތުރުވެފަ އެވެ. ތެލުގެ އާމްދަނީ ދަށް ވާތީ 2014 ވަނަ އަހަރުން ފެށިގެން އޮމާންގެ އިގްތިސާދު ދަނީ ވެއްޓެމުންނެވެ.
އެއާއެކު ކޮވިޑް ބަލިމަޑުކަމުގެ ނޭދެވޭ އަސަރު ވެސް ދަނީ ވަރަށް ބޮޑަށް ކުރަމުންނެވެ. ކޭސްތައް ގިނަވުމުގެ ސަބަބުން އިގްތިސާދީ މަސައްކަތްތައް ބޭނުންވާ މިންވަރަކަށް ނުހިންގެ އެވެ. އެ ގައުމުން މިހާތަނަށް 254،656 ކޭސް ފެނިފައި ވާއިރު 2،816 މީހުން ވަނީ މަރުވެފަ އެވެ.
ގަލްފް ސަރަހައްދުގެ ބައެއް އެހެން ގައުމުތަކުން ވެސް އަންނަނީ އޮމާންގައި ފަށަން ނިންމާފައިވާ ރެޒިޑެންސީ ސްކީމް ހިންގަމުންނެވެ. އެގޮތުން ގަތަރުގައި ވެސް 200،000 ޑޮލަރުގެ ޕްރޮޕާޓީއަށް އިންވެސްޓް ކުރުމުން ވަގުތީ ރެޒިޑެންސީ ލިބެ އެވެ. އަދި އެއް މިލިއަން ޑޮލަރަށް ވުރެ އިތުރު އިންވެސްޓްމަންޓެއް ނަމަ ދާއިމީ ރެޒިޑެންސީ ލިބެ އެވެ.
ޑުބާއީގައި 2.7 މިލިއަން ޑޮލަރުގެ އިންވެސްޓަމަންޓުކޮށް، އޭގެ 40 ޕަސެންޓު ޕްރޮޕަޓީ އިންވެސްޓްމަންޓަށް ހަދާ ނަމަ، 10 އަހަރުގެ ރެޒިޑެންސީ ވިސާ ލިބެ އެވެ.
