ހެލްސިންކީ، ފިންލޭންޑު (ޖޫން 22) - ދިރިއުޅުމުގެ ފެންވަރު ރަނގަޅުވުމުގެ ސަބަބުން އެތައް ފަހަރެއްގެ މަތިން އެންމެ އުފާވެރި ގައުމުގެ މަގާމު ހޯދާފައިވާ ފިންލޭންޑަށް މަސައްކަތްތެރިންގެ ދަތިކަން ދިމާވެ، އެ ގައުމަށް ހިޖުރަ ކުރާނެ މީހުން ހޯދަމުން އެބަ ދެ އެވެ.
"މިހާރު އެންމެން ވެސް އެއްބަސްވާ ކަމެއް އެއީ ގިނަ އަދަދެއްގެ މީހުން މި ގައުމަށް އަންނަން ޖެހޭކަން،" މުވައްޒަފުން ރެކްރޫޓު ކުރާ ޓެލެންޓެޑް ސޮލިއުޝަންސް އެޖެންސީގެ ސާކޫ ޓިހްވެރައިނެން އޭއެފްޕީއަށް ބުންޏެވެ.
"ނުރަވަމުންދާ ޖީލުގެ ސަބަބުން އުފެދިފައިވާ ބާގަނޑު ބައްދަން," މަސައްކަތްތެރިން ބޭނުންވާ ކަމަށް އޭނާ ބުންޏެވެ.
އާބާދީ އިތުރުވުން މަޑު ޖެހުމުގެ މައްސަލަ ހުޅަނގުގެ ގިނަ ގައުމުތަކަށް ދިމާވެފައި ވާއިރު، އެ މައްސަލަ އެންމެ ބޮޑަށް ދިމާވެފައި ވަނީ ފިންލޭންޑަށެވެ. މުޅި ދުނިޔެއަށް ބަލާއިރު، ޖަޕާނަށް ފަހު އެ މައްސަލަ އެންމެ ބޮޑު ގައުމަކީ ފިންލޭންޑެވެ.
ޒުވާން އާބާދީއަށް ވުރެ އުމުރުން ދުވަސްވީ މީހުން ގިނަވުމުގެ ސަބަބުން ދިމާވާ އިޖުތިމާއީ އަދި އިގްތިސާދީ މައްސަލަތައް ފިންލޭންޑަށް މިހާރު ވެސް ދަނީ ދިމާވަމުންނެވެ.
ފިންލޭންޑުގެ ސަރުކާރުން ބުނީ 5.5 މިލިއަން މީހުންގެ އާބާދީއެއް އޮންނަ އެ ގައުމަށް އަހަރަކު 20،000 އާއި 30،000 އާ ދެމެދުގެ އަދަދަކަށް މީހުން ހިޖުރަ ނުކުރާ ނަމަ، އާއްމު ހިދުމަތްތައް ހުއްޓުމުގެ ބިރު އެބަ އޮތް ކަމަށެވެ.
