ޖެންޑާ މިނިސްޓްރީން ބަލަހައްޓަމުންދާ ކުޑަކުދިންގެ ހިޔާގައި އުޅޭ ކުއްޖަކަށް ޖިންސީ ގޯނާކޮށްގެން ހައްޔަރުކުރި މީހާ ދޫކޮށްލައިފި އެވެ.
ކުއްޖާއަށް ގޯނާކުރި ކަމުގެ ތުހުމަތުގައި އޭނާގެ ބަންދަށް ފުރަތަމަ 10 ދުވަސް ޖެހި ނަމަވެސް، އެ މުއްދަތު ހަމަވެގެން އިއްޔެ ކޯޓަށް ހާޒިރުކުރުމުން އަމުރުކޮށްފައިވަނީ ބަންދުން ދޫކޮށްލުމަށެވެ.
ގާޒީ ދިބާނާޒު ފަހުމީ ނެރުއްވި އަމުރުގައިވާ ގޮތުން އޭނާ ބަންދުން ދޫކޮށްލުމަށް އަމުރުކޮށްފައިވަނީ ބަންދުގައި ބަހައްޓަންޖެހޭ ސަބަބެއް ނެތީމަ އެވެ. އަދި، ޝަރުތުތަކާއެކު އެމީހާ ދޫކޮށްލުމަށް ފުލުހުން އިއުތިރާޒު ނުކުރާތީ އެވެ.
އެމީހާގެ މައްޗަށް ފުލުހުން ތުހުމަތުކޮށްފައިވާ ގޮތުގައި ދައުލަތުގެ ބެލުމުގެ ދަށުގައި ހުރި ކުއްޖާ ފެނިފައިވަނީ ހައްޔަރުކުރި މީހާގެ ކޮޓަރިން ކަމާއި އެ ކުއްޖާއާމެދު ބަދުއަހްލާގީ އަމަލު ހިންގާފައިވާ ކަމަށް ބެލެވެ އެވެ.
އޭގެއިތުރުން، އެމީހާ ކުއްޖާއަށް ކަންތައްތަކެއް ކޮށްދީ، އެ ކުއްޖާ ގްރޫމްކުރުމަށް އެމީހާ މަސައްކަތް ކުރަމުންދާ ކަމަށް ވެސް ތުހުމަތުކުރި އެވެ.
އެ ތުހުމަތަށް ހައްޔަރުކުރި މީހާ އިންކާރުކޮށް ބުނެފައިވަނީ، ކުއްޖާއާމެދު ގޯސް އެއްވެސް ކަމެއް ކޮށްފައިނުވާނެ ކަމަށެވެ. އެ ކުއްޖާއަކީ ހިޔާއިން ނުކުމެގެން އޭނާގެ ގެއަށް ގޮސް އުޅޭ ކުއްޖެއް ކަމާއި އެކަން ހިޔާގެ މުވައްޒަފުންނަށް ވެސް އެނގޭނެ ކަމަށް އޭނާ ބުނެފައިވެ އެވެ.
