ސްޓޮކްހޯމް، ސްވިޑަން (ޖޫން 21) - ސަރުކާރަށް އިތުބާރު ނެތް ކަމަށް ޕާލިމެންޓުން ފާސް ކުރުމުން ސްވިޑަންގެ ބޮޑު ވަޒީރު ސްޓެފަން ލޮފްވެންއަށް މަގާމު ގެއްލިއްޖެ އެވެ.
އޭނާއަކީ ސްވިޑަންގެ ތާރީހުގައި އިތުބާރު ނެތް ކަމުގެ ވޯޓަކުން ބަލިވި ފުރަތަމަ ބޮޑު ވަޒީރެވެ. އެއާއެކު އިސްތިއުފާ ދެއްވުން ނުވަތަ އާ އިންތިހާބެއް ބޭއްވުމުގެ ފުރުސަތު އޭނާއަށް ލިބިވަޑައިގަންނަވަ އެވެ.
އިތުބާރު ނެތް ކަމަށް ފާސްކޮށްފައިވަނީ ޕާލިމެންޓުގެ 349 މެމްބަރުންގެ ތެރެއިން 181 މެމްބަރުންގެ މެޖޯރިޓީއާ އެކު އެވެ.
ކަނާއަތު ފިޔައިގެ ޕާޓީ ސްވިޑަން ޑިމޮކްރެޓްސް އާއި ވައަތު ފިޔައިގެ ލެފްޓް ޕާޓީ އެއްބައިވެގެން އިތުބާރު ނެތް ކަމަށް ފާސް ކުރީ ކުލި ކޮންޓްރޯލް ކުރުމުގައި ދޫދޭން ސަރުކާރުން މަސައްކަތް ކުރާތީ އެވެ.
އެ ޕާޓީތަކުން ބުނީ ސަރުކާރުގެ އެ މަސައްކަތަކީ ސްވިޑަންގައި އޮންނަ ސޯޝަލް މޯޑެލްއާ ދެކޮޅު މަސައްކަތެއް ކަމަށެވެ. މޮޑަރޭޓް ޕާޓީ އާއި ކްރިސްޓިއަން ޑިމޮކްރެޓްސް ވެސް އެކަމާ އެއްބަސްވި އެވެ.
ހަތަރު ޕާޓީ ގުޅިގެން ސަރުކާރުގެ އިތުބާރު ނެތް ކަމަށް ކަނޑައަޅާފައި ވާއިރު، އެއާއެކު ސޯޝަލް ޑިމޮކްރެޓް އަދި ގްރީން ޕާޓީގެ ކޯލިޝަން ސަރުކާރު ވަނީ އުވާލަން މަޖުބޫރުވެފަ އެވެ.
ލޮފްވެންގެ ސަރުކާރުން މަސައްކަތް ކުރަމުން ދިޔެއީ ކުލި ކޮންޓްރޯލް ކުރުމުގެ އުސޫލު މުރާޖައާކޮށް، ގެދޮރު ކުއްޔަށް ދޫކުރާ މީހުން ބޭނުން އަގެއްގައި އަލަށް ހަދާ އެޕާޓްމަންޓުތައް ދޫކުރުމުގެ ހުއްދަ ދޭށެވެ.
