ޓޫރިޒަމް މިނިސްޓަރަކަށް ހުންނަވައި، އެ މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތު އުފުލާފައިވާ އަލީ ވަހީދުގެ މައްޗަށް ކްރިމިނަލް ކޯޓުން މިހާރު ކުރިއަށް ގެންދާ ޝަރީއަތް ތަފާތެވެ؛
އޮންލައިންކޮށް ކުރިއަށް ޝަރީއަތުގައި އަލީ ވަހީދު ބައިވެރިވެވަޑައިގަންނަވަނީ އިނގިރޭސި ވިލާތުގެ ލަންޑަނުގައި ހުންނަ ރާއްޖޭގެ ހައި ކޮމިޝަނުގައި ހުންނަވައިގެންނެވެ. ޝަރީއަތުގައި ދައުލަތް ތަމްސީލްކުރައްވަނީ ޕްރޮސިކިއުޓާ ޖެނެރަލް ހުސެއިން ޝަމީމެވެ. މިއީ ކްރިމިނަލް ކޯޓުގެ އަޑުއެހުމަކަށް އޭނާ ވަކާލާތު ކުރެއްވުމަށް ވަދެވަޑައިގެންނެވި ފުރަތަމަ ފަހަރެވެ.
މައްސަލައިގެ ބާވަތުން ސިއްރުން ކުރިއަށްގެންދާ ޝަރީއަތުގެ މަޖިލީހުގައި އިއްޔެ، އޮންލައިންކޮށް ޝަރީއަތް ކުރިއަށް ގެންދިއުމާ ގުޅޭ ގޮތުން ޝަމީމް ސުވާލު އުފެއްދެވުމުން، އަލީ ވަހީދުއާ ދެމެދު ދެބަސްވުމެއް ވަނީ ހިނގައިފަ އެވެ.
"އަދަދު" އަށް އެނގިފައިވާ ގޮތުގައި އަޑުއެހުމުގައި ޝަމީމް ވަނީ އިއްޔެ ކުރިއަށް ގެންދިޔައީ ޝަރީއަތުގެ އަޑުއެހުމެއް ކަމަށް ގަބޫލު ނުކުރައްވާ ކަމާއި ޝަރީއަތުގެ އަޑުއެހުމެއް ބާއްވާނެ ހާލަތެއް އޮތް ކަމަށް ގަބޫލު ނުކުރައްވާ ކަމަށް ވިދާޅުވެފަ އެވެ. އަދި، އޮންލައިންކޮށް އަޑުއެހުން ކުރިއަށް ގެންދިޔުމާއެކު އިއުތިރާޒު ކުރައްވާ ކަމަށް ވިދާޅުވި އެވެ.
ނަމަވެސް، މައްސަލަ ބައްލަވާ ގާޒީ ހަސަން ސައީދު ވަނީ އެއީ މިހާރު ގޮތެއް ނިންމާފައި އޮތް ކަމެއް ކަމަށް ވިދާޅުވެފަ އެވެ. އެއީ ކިހިނެއް، ކޮން ކަމަކަށް ރިއާޔަތްކޮށް ނިންމި ނިންމުމެއްތޯ ޝަމީމް ސުވާލުކުރެއްވުމުން ގާޒީ ވިދާޅުވީ އެއީ ކްރިމިނަލް ކޯޓުގެ އިސްގާޒީގެ ލަފާގެ މަތިން ނިންމާފައިވާ ނިންމުމެއް ކަމަށް ވިދާޅުވެފަ އެވެ.
ދެން ވެސް އެކަމާ އިއުތިރާޒު ކުރައްވައި ޝަމީމް ވާހަކަ ދައްކަވަން ފެއްޓެވުމުން އަލީ ވަހީދު ވަނީ ނުރުހުން ފާޅުކުރައްވާފަ އެވެ. އަލީ ވަހީދަށް ބޭސް ފަރުވާއަށް ރާއްޖެއިން ބޭރަށް ދެވޭ ގޮތަށް ގާޒީ ނިންމެވި ނިންމުމާ ގުޅިގެން ގާޒީގެ ސުލޫކީ މައްސަލައެއް ވެސް ޖޭއެސްސީއަށް ހުށަހަޅާފައިވާއިރު އަނެއްކާވެސް ޝަމީމް އެ މަސައްކަތް ކުރަނީ ގާޒީއަށް ބިރުދެއްކުމުގެ ގޮތުން ކަމަށް ޝަރީއަތުގައި އަލީ ވަހީދު ވިދާޅުވި އެވެ.
އެއް ގަޑިއިރަށްވުރެ ގިނައިރުވި އަޑުއެހުމުގައި ޝަމީމް ވަނީ އިސްގާޒީގެ ނިންމުން އިސްތިއުނާފުކުރަން ބޭނުންވާ ކަމާއި އެހެންވެ، އެ ނިންމުން ލިޔުމުން ދޭން އެދިވަޑައިގެންފަ އެވެ.
އެ ދެބަސްވުންތަކާއެކު ވެސް ޝަރީއަތް ކުރިއަށް ގެންދިޔުމަށް ގާޒީ ނިންމާފައިވާއިރު، ޝަރީއަތް ފެށުމުގެ ކުރިން ހުށަހަޅާ ހުށަހެޅުންތައް ކޯޓަށް ފޮނުވުމަށް އަލީ ވަހީދަށް އިތުރު ފަސް ދުވަހުގެ މުއްދަތެއް ދީފައިވާ ކަމަށް އެނގިފައިވެ އެވެ. އަދި، މައްސަލާގައި އިތުރު އަޑުއެހުމެއް އަންނަ މަހުގެ 11 ވަނަ ދުވަހު ބޭއްވުމަށް ވެސް ވަނީ ނިންމަވާފަ އެވެ.
އެ އަޑުއެހުން ވެސް ކުރިއަށް ގެންދަން ނިންމާފައިވަނީ އޮންލައިންކޮށެވެ.
އަލީ ވަހީދަށް އޮންލައިންކޮށް ޝަރީއަތުގައި ބައިވެރިވެވޭނެ ގޮތަށް ކޯޓުން ނިންމާފައިވަނީ އޭނާގެ ބޭސްފަރުވާ ނުނިމޭ ކަމަށް ވިދާޅުވެ، މެޑިކަލް ޑޮކިއުމެންޓްތަކެއް ފޮނުވާފައިވާތީ އެކަމަށް ރިއާޔަތްކޮށެވެ.
އަލީ ވަހީދު ރާއްޖޭން ބޭރަށް ވަޑައިގެންނެވީ ހަތަރު މަސް ފަހުން އޭނާ ރާއްޖެ ވަޑައިގެން ކޯޓަށް ހާޒިރުވާނެ ކަމުގެ ޔަގީންކަން ދެއްވައި، ޖާމިނު އެއްބަސްވުމެއްގައި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ ސޮއިކުރެއްވުމުންނެވެ.
މި މަހުގެ ނުވަ ވަނަ ދުވަހަށް އެ މުއްދަތު ވަނީ ހަމަވެފަ އެވެ.
ކްރިމިނަލް ކޯޓުން އަލީ ވަހީދުއާއެކު މުއާމަލާތްތަކެއް ކޮށްފައިވީ ނަމަވެސް، ހައިކޯޓާއި ސުޕްރީމް ކޯޓަށް ވެސް އޭނާއާ މުއާމަލާތް ކުރެވޭނެ ގޮތެއް ނުވި އެވެ. އަލީ ވަހީދު ޕާސްޕޯޓް ދޫކުރި އަމުރު ބާތިލް ކުރަން ދައުލަތުން ހައި ކޯޓަށާއި ސުޕްރީމް ކޯޓަށް ދިޔަ ނަމަވެސް، އެ މައްސަލަ ކުރިއަށް ގެންދެވޭ ގޮތެއް ނުވީ އަލީ ވަހީދު އުޅޭނޫޅޭ ތަނެއް ނޭނގި، ޣައިރު ހާޒިރުގައި އެފަދަ މައްސަލައެއް ނުހިނގޭނެތީ އެވެ.
