ކޮލޮމްބޯ، ސްރީ ލަންކާ (ޖޫން 20) - ލޮކްޑައުންގެ ފިޔަވަޅުތަކާ ހިލާފުވި ކަމަށް ތުހުމަތު ކުރެވޭ ސްރީ ލަންކާގެ މުސްލިމުންތަކެއް މަގުމަތީގައި ކުޑަ ކަކޫ މައްޗަށް ތިރި ކުރި ކަމަށް ބުނާ ޕޯސްޓުތަކެއް ސޯޝަލް މީޑިއާގައި ދައުރުވާތީ އަސްކަރިއްޔާއިން ތަހުގީގެއް ފަށައިފި އެވެ.
ވެރިރަށް ކޮލޮމްބޯގެ 300 ކިލޯމީޓަރު އިރުން އެރަވުރް އަވަށުގެ މަގުމަތީގައި އަތް މައްޗަށް ނަގައިގެން ކުޑަ ކަކޫ މައްޗަށް ތިރިވެގެން ތިބެން ސިފައިން މުސްލިމުންތަކަކަށް އެންގި ކަމަށް ވެ އެވެ.
އަވަށުގެ ރައްޔިތުން ބުނީ އެއީ އިހްތިރާމް ކުޑަ އަދި ފުރައްސާރަ ކުރުމުގެ އަމަލެއްގެ ގޮތުގައި ދެކޭ ކަމަށެވެ. އޮފިޝަލުން ވެސް ބުނީ އެފަދަ އަދަބުތައް ދިނުމުގެ ބާރު ސިފައިންނަށް ނެތް ކަމަށެވެ.
ސިފައިންގެ ފުރައްސާރައާ ކުރިމަތިވި މީހުން މަގުމަތީގައި އުޅުނީ ކާ އެއްޗެހި ގަންނަން ދެ ރެސްޓޯރެންޓަކަށް ދިޔުމަށެވެ.
"އެރަވުރް ސަރަހައްދުގައި ފުރައްސާރަ ކުރި ކަމަށް ތުހުމަތު ކުރެވޭ ފޮޓޯތައް ވައިރަލްވުމުން، އަސްކަރީ ތަހުގީގެއް ވަނީ ފަށާފައި،" އަސްކަރިއްޔާއިން ނެރުނު ބަޔާނެއްގައި ބުންޏެވެ.
އެ ބަޔާނުގައި ބުނީ ހާދިސާ ހިނގިއިރު އިސްކޮށް ހުރި އޮފިސަރު ސަސްޕެންޑުކޮށްފައިވާ ކަމަށާއި ދެން ތިބި ސިފައިން އެ އަވަށް ދޫކޮށް ދާން އަމުރުކޮށްފައިވާ ކަމަށެވެ.
"ގަވާއިދުތަކާ ހިލާފަށް އުޅޭ އަސްކަރީ މުވައްޒަފުންނާ ދެކޮޅަށް ހަރުކަށި އިސްލާހީ ފިޔަވަޅު އަޅާނެ،" ބަޔާނުގައި ބުންޏެވެ.
ކޮވިޑުގެ ތިން ވަނަ ރާޅުގައި ކޭސްތައް އިތުރުވެފައި ވާތީ ލަންކާ އޮތީ ލޮކްޑައުންކޮށްފަ އެވެ. އޭޕްރިލް މަހުން ފެށިގެން މަރުވި މީހުންގެ އަދަދު ހަތަރު ގުނަ އިތުރުވެ، 2،531 އަށް ވަނީ އަރާފަ އެވެ.
ލޮކްޑައުންގެ ތެރޭގައި ފުލުހުންނާއި ސިއްހީ އޮފިޝަލުންނަށް އެހީވާން އަސްކަރިއްޔާއިން ދަނީ މަސައްކަތް ކުރަމުންނެވެ.
