ކުރިމިނަލް ކޯޓުގެ ގާޒީ ކަމުގެ މަގާމަށް ނުވަ ބޭފުޅަކު ކުރިމަތިލައްވައިފި އެވެ.
ޖުޑީޝަލް ސާވިސް ކޮމިޝަން (ޖޭއެސްސީ)ން ކުރިމިނަލް ކޯޓުގެ ދެ މަގާމެއް ހުސްވެފައިވާތީ، އެ މަގާމަށް ކުރިމަތިލާން ހުޅުވާލި އެވެ.
އެ މުއްދަތުގައި ކުރިމަތިލައްވާފައިވަނީ ނުވަ ބޭފުޅުންކަން ޖޭއެސްސީން މިއަދު ހާމަކުރި އެވެ.
އެގޮތުން ކުރިމަތިލައްވާފައިވާ ބޭފުޅުންގެ ތެރޭގައި އެ ކޯޓުގެ ގާޒީކަން މީގެކުރިން ކުރެއްވި ގާޒީ އާދަމް އާރިފު ވެސް ހިމެނެ އެވެ. ގާޒީ އާދަމް އާރިފު މިހާރު މަސައްކަތް ކުރައްވަނީ ޑްރަގު ކޯޓުގަ އެވެ.
ދެން ކުރިމަތިލައްވާފައިވާ ބޭފުޅުންނަކީ، ރަފީއުއްދީން އަހުމަދާއި އަލީ ނަދީމާއި އިބްރާހިމް އިހުސާނާއި އަހުމަދު ތައުފީގާއި އައިމިނަތު އަޒްލިފާ އާއި އިސްމާއިލް ޝަފީއު އާއި ސުލައިމާން މުހައްމަދު އަދި މުހައްމަދު ސަމީރެވެ.
ކުރިމިނަލް ކޯޓުގެ ގާޒީ ކަމުގެ މަގާމެއް ހުސްވެފައިވަނީ ގާޒީ ކަމުގައި ހުންނެވި އިސްމާއިލް ރަޝީދު، ވަކި ކުރަން ޖޭއެސްސީން ނިންމުމާއެކު އޭނާ އިސްތިއުފާ ދެއްވުމުންނެވެ. އަދި، ކޯޓުގެ ގާޒީ ކަމުގެ މަގާމުގައި ހުންނެވި މުހައްމަދު ސަމީރު ވަނީ އަމިއްލައަށް އެދިވަޑައިގެން ޑްރަގު ކޯޓަށް ބަދަލުކުރުމަށް ނިންމާފަ އެވެ.
