ކާބުލް، އަފްގާނިސްތާން (ޖޫން 20) - އަފްގާނިސްތާނަށް ސުލްހަ ގެނެވޭނީ އިސްލާމީ ޝަރީއަތް ގާއިމްކޮށްގެން ކަމަށް ތާލިބާނުން ބުނެފި އެވެ.
ސެޕްޓެމްބަރު 11 ގެ ކުރިން އެމެރިކާ އާއި ނޭޓޯގެ ފައުޖުތައް އަފްގާނިސްތާނުން ފައިބަން މަސައްކަތް ކުރާ މި ދަނޑިވަޅުގައި އެ ގައުމުގެ ހަމަނުޖެހުން ވަނީ ބޮޑުވެފަ އެވެ.
ތާލިބާނާއި ސަރުކާރާ ދެމެދު ސުލްހައިގެ މަޝްވަރާތައް ކުރަމުން ދާއިރު، ހަމަނުޖެހުމުގެ ސަބަބުން މަޝްވަރާތަކުން މާ ބޮޑު ކުރިއެރުމެއް ނުލިބެ އެވެ.
ތާލިބާނުންނަށް އަލުން ވެރިކަން ލިބިއްޖެ ނަމަ، އިސްލާމީ ޝަރީއަތް ހިންގުމުގެ ނަމުގައި ހަރުކަށި ފިޔަވަޅުތައް އަޅައި، އަންހެނުންނާއި އަންހެން ކުދިން ތައުލީމުން މަހުރޫމު ކުރާނެ ކަމުގެ ބިރު ވަނީ ބޮޑުވެފަ އެވެ.
ހަމަނުޖެހުން އިތުރުވަމުން ދިޔަ ނަމަވެސް ތާލިބާނުންގެ ކޯ ފައުންޑަރު އަދި ޑެޕިއުޓީ ލީޑަރު މުއްލާ އަބްދުލް ގަނީ ބަރަދަރް ބުނީ ސުލްހައިގެ މަޝްވަރާއަށް ބޮޑު ސަމާލުކަމެއް ދޭ ކަމަށެވެ.
ނަމަވެސް އަފްގާނިސްތާނުގެ ހަމަނުޖެހުން ނިމުމަކަށް ގެނެސް، ސުލްހަ ގާއިމް ކުރެވޭނީ އިސްލާމީ ޝަރީއަތް ފުރިހަމައަށް ހިންގައިގެން ކަމަށް އޭނާ ނެރުނު ބަޔާނެއްގައި ބުންޏެވެ.
އޭގެ އިތުރުން ފުރިހަމަ އިސްލާމީ ޝަރީއަތް ތަންފީޒު ކުރާއިރު، އަންހެނުންގެ ހައްގުތައް ވެސް ރައްކާތެރި ވާނެ ކަމަށް އެ ބަޔާނުގައި ފާހަގަކޮށްފައި ވެ އެވެ.
އަފްގާން ސިފައިންނާއި ތާލިބާނުންނާ ދެމެދު ހަމަލާ ބަދަލު ކުރުން އިތުރުވެފައި ވާތީ ގިނަ އަދަދެއްގެ ރައްޔިތުން އަންނަނީ އަފްގާނިސްތާން ދޫކޮށް ދާން މަސައްކަތް ކުރަމުންނެވެ.
ކުރިން އޮތް ތާލިބާނުންގެ ވެރިކަން ނިމުމަކަށް އައީ 2001 ގައި އަލް ގައިދާއިން އެމެރިކާއަށް ދިން ހަމަލާއަށް ފަހު އެމެރިކާ އާއި ނޭޓޯގެ ފައުޖުތައް އަފްގާނިސްތާނަށް އަރާ ފެށި ހަނގުރާމައިގެ ސަބަބުންނެވެ.
އޭގެ ކުރިން އަފްގާނިސްތާނުގައި އަންހެން ކުދިން ކިޔަވަން ދިޔުން ވެސް އޮތީ މަނާކޮށްފަ އެވެ. ނަމަވެސް 2001 ގެ ފަހުން އަންހެން ކުދިންނަށް ސްކޫލަށް ކިޔަވަން ދެވޭއިރު، މިހާރު ވެސް އެ ކުދިންނަށް އަމާޒުކޮށް ދޭތެރެއަކުން ބޮޑެތި ހަމަލާތައް ދެ އެވެ.
އެގޮތުން މިދިޔަ ރޯދަ މަހު އަންހެން ދަރިވަރުންގެ ހައި ސްކޫލެއް ކައިރީ ބިންތަކެއް ގޮއްވާލާ އެތައް ސަތޭކަ ބަޔަކު މަރުވި އެވެ. އޭގެ ތެރޭގައި ގިނައީ ދަރިވަރުންނެވެ.
