ކޮލޮމްބޯ، ސްރީލަންކާ (ޖޫން 18) - ސްރީ ލަންކާ ކައިރިން ރޯވެ ފެތިފައިވާ ބޯޓުގެ ސަބަބުން ލިބެމުންދާ ތިމާވެށީގެ ގެއްލުމުގެ ތެރެއިން ކަނޑުގެ ދިރުންތައް މަރުވެގެން ގޮނޑުދޮށަށް ލެއްގުން އިތުރުވެއްޖެ އެވެ.
ސިންގަޕޫރުގައި ރަޖިސްޓްރީކޮށްފައިވާ އެމްވީ އެކްސް-ޕްރެސް ޕާލް ބޯޓުގައި މިދިޔަ މަހު ރޯވިއިރު، އޭގައި އެތައް ސަތޭކަ ޓަނުގެ ކެމިކަލާއި ޕްލާސްޓިކް ހުއްޓެވެ. ރޯވި އަލިފާންގަނޑު ނިއްވާލެވުނީ ދެ ހަފްތާ ފަހުންނެވެ. އަދި ޖޫން ދެ ވަނަ ދުވަހުން ފެށިގެން ބޯޓުގެ އެއް ބައި އޮތީ ކޮލޮމްބޯއާ ދިމާލުން ކަނޑަށް ފެތިފަ އެވެ.
ކަނޑުގެ ދިރުންތަކާއި ޖަނާވަރު ރައްކާތެރި ކުރުމަށް އުޅޭ އޮފިޝަލުން ބުނީ އިންޓަނޭޝަނަލް ޔޫނިއަން ފޯ ކޮންޒަވޭޝަން އޮފް ނޭޗާ އިން ރައްކާތެރިކޮށްފައިވާ އޮލިވް ރިޑްލީ ބާވަތުގެ ވެލައެއް ކޮލޮމްބޯގެ 80 ކިލޯމީޓަރު ދެކުނުން ބެންތާރާ ރިސޯޓުގެ ގޮނޑުދޮށަށް ލައްގާފައި އޮއްވާ ފެނިފައިވާ ކަމަށެވެ.
ހަމަ އެ ބާވަތުގެ އިތުރު ވެލައެއް މަރުވެފައި އޮއްވާ ފެނުނީ ބެންތާރާގެ ދެކުނުން އޮންނަ އިންދުރުވާ ގޮނޑުދޮށުގަ އެވެ. އޮފިޝަލުން ބުނީ އެ ސަރަހައްދަށް މަރުވެގެން ލައްގާފައިވާ އޮލިވް ރިޑްލީ ވެލާގެ އަދަދު މިހާރު 15 އަށް އަރާފައިވާ ކަމަށެވެ.
"މަރުވަމުންދާ ވެލާތަކާއި އެ ބޯޓާ ސާފު ގުޅުމެއް އޮތް މަންޒަރު އެބަ ފެނޭ،" ނަން ހާމަ ނުކުރާ އިސް އޮފިޝަލަކު އޭއެފްޕީއަށް ބުންޏެވެ.
އޮފިޝަލް ބުނީ މި ހާދިސާ ދިމާވެފައިވަީ ވެލާތައް ބިސް އަޅާ މޫސުމާ ދިމާކޮށްފައި ކަމަށެވެ. އެ މޫސުމުގައި ވެލާ މަރުވުން އާދައިގެ މަތިން އިތުރު ނަމަވެސް މި އަހަރު ފެންނަނީ އެހެން އަހަރުތަކާ އަޅާ ބަލާއިރު ވިއްސަކަށް ގުނަ އިތުރަށް ވެލާ މަރުވަމުންދާ ތަން ކަމަށް އޮފިޝަލް ބުންޏެވެ.
ލަންކާގެ މީޑިއާ ރިޕޯޓުތައް ބުނާ ގޮތުން މޭ 20 ވަނަ ދުވަހު ބޯޓުގައި އަލިފާން ރޯވި ފަހުން 50 އަށް ވުރެ ވެލަ އާއި އަށް ކޯމަސް މަރުވެގެން ގޮނޑުދޮށްތަކަށް ލައްގާފައި ވެ އެވެ.
ބޯޓުގައި އަލިފާންގަނޑު ފެތުރެން ފެށުމުން، ދެ ގޮވުމެއް ގޮވައި، ގިނަ އަދަދެއްގެ ކޮންޓެއިނަރު ކަނޑަށް ވެއްޓުނެވެ. އެ ކޮންޓެއިނަރުތަކުގައި ހުރި ޕްލާސްޓިކް ޕެލެޓުތައް ކަނޑަށް ފެތުރި، ލަންކާގެ ގޮނޑުދޮށަށް ވެސް ލެއްގި އެވެ.
ލަންކާގެ ތިމާވެށީގެ ކަންކަމާ ގުޅޭ އެންމެ އިސް އޮފިޝަލް އަނިލް ޖަސިންގޭ މިދިޔަ ބުރާސްފަތި ދުވަހު ވިދާޅުވީ ކަނޑުގެ ދިރުންތައް މަރުވުމާއި ބޯޓާ ގުޅުމެއްވާ ކަމަށެވެ. ނަމަވެސް އެކަން ޔަގީން ކުރުމަށް އޮޓޮޕްސީގެ ނަތީޖާއަށް އިންތިޒާރު ކުރަމުންދާ ކަމަށް ވިދާޅުވި އެވެ.
ގޮނޑުދޮށުން ނެގި 1،200 ޓަނުގެ ޕްލާސްޓިކް ޕެލެޓާއި އެހެން ކުނިތައް މިހާރު ރައްކާކޮށްފައި ހުރީ 45 ޝިޕިން ކޮންޓެއިނަރުގައި ކަމަށް އޮފިޝަލުން ބުނެ އެވެ.
އެ ހާދިސާއާ ގުޅިގެން ބޯޓު އޮޕަރޭޓް ކުރާ އެކްސް-ޕްރެސް ފީޑާޒްގެ އަތުން ބަދަލުގެ ގޮތުގައި 40 މިލިއަން ޑޮލަރު ހޯދަން ލަންކާ ސަރުކާރުން ދަނީ މަސައްކަތް ކުރަމުންނެވެ.
ލަންކާގެ ތާރީހުގައި ކަނޑުގެ ދިރުންތަކަށް ނުރައްކާވާ ގޮތަށް ދިމާވި އެންމެ ބޮޑު ހާދިސާ ހުއްޓުވަން ސަރުކާރާއި އެކްސް-ޕްރެސް ފީޑާޒް ފެއިލްވި ކަމަށް ބުނެ ތިމާވެށީގެ އެކްޓިވިސްޓުން ވަނީ ކޯޓަށް މައްސަލަ ހުށަހަޅާފަ އެވެ.
އޭގެ އިތުރުން ބޯޓުގެ ކެޕްޓަނާއި ޗީފް އިންޖިނިއަރު އަދި ޗީފް އޮފިސަރާ ދެކޮޅަށް ފުލުހުން ވަނީ ޖިނާއީ ތަހުގީގެއް ވެސް ފަށާފަ އެވެ.
