ވޯލްޑް ކަލިނަރީ އެވޯޑްސްގެ އިންޑިއާ ކަނޑުގެ އެންމެ މޮޅު ކަލިނަރީ ޓްރެއިނިން އިންސްޓިޓިއުޝަންތަކުގެ ތެރޭގައި ގައުމީ ޔުނިވާސިޓީ އެމްއެންޔޫގެ ފެކަލްޓީ ފޯ ޓޫރިޒަމް އެންޑް ހޮސްޕިޓާލިޓީ ސްޓަޑީޒް (އެފްއެޗްޓީއެސް) ހިމެނިއްޖެ އެވެ.
ވޯލްޑް ކަލިނަރީ އެވޯޑްސްއަކީ ވޯލްޑް ޓްރެވަލް އެވޯޑްސްގެ ސިސްޓާ އެވޯޑެއް ގޮތަށްދޭ އެވޯޑެކެވެ. މި އެވޯޑަކީ ޓޫރިޒަމް އަދި ހޮސްޕިޓާލިޓީ ދާއިރާގެ މުހިއްމު ކޮމްޕޮނެންޓެއް ކަމުގައިވާ ކަލިނަރީ ސިނާއަތަށް ހާއްސަ ކުރެވިގެން މިދިޔަ އަހަރު ދޭން ފެށި އެވޯޑެކެވެ.
މިއީ އެމްއެންޔޫ އެފްއެޗްޓީއެސް އިންޑިއަން އޯޝަންސް ބެސްޓް ކަލިނަރީ ޓްރެއިނިން އިންސްޓިޓިއުޝަން ކެޓެގަރީން މި އެވޯޑަށް ނޮމިނޭޓްވީ ދެވަނަ ފަހަރެވެ. މިދިޔަ އަހަރުގެ އެވޯޑް ކާމިޔާބުކުރީ މޮރިޝަސްގެ އޮލިވިއޭ ކަލިނަރީ ސްކޫލެވެ.
މި އަހަރުގެ އެވޯޑުގައިވެސް އެމްއެންޔޫއާ ވާދަކުރަނީ ކުރީ އަހަރު ވާދަކުރި އިންސްޓިޓިއުޝަންތަކެވެ. އެއީ ކުރިން އަހަރު އެވޯޑް ކާމިޔާބުކުރި އިންސްޓިޓިއުޓްގެ އިތުރުން ޝީޝެލްސްގެ ޓޫރިޒަމް އެކެޑެމީ އާއި މޮރިޝަސްގެ ކަލިނަރީ މާސްޓާސް އެވެ.
މި އެވޯޑު ލިބޭ ނޮމިނީ ހޮވަނީ އޮންލައިންކޮށް ވޯޓުލައިގެންނެވެ. އަދި މިހާރު މި އަހަރުގެ އެވޯޑަށް ވޯޓު ލުން ވަނީ އާންމުކޮށް ހުޅުވާލާފަ އެވެ.
ވޯލްޑް ކަލިނަރީ އެވޯޑަށް ވޯޓު ހޯދަން އެމްއެންޔޫއިން ބާއްވާ ހަރަކާތްތަކާއި ގުޅިގެން އެފްއެޗްޓީއެސްގެ ލެކްޗަރާ އައިމިނަތު ޝާނީ "އަދަދު" އަށް ވިދާޅުވީ ޝޯޝަލް މީޑިއާއިންނާއި ރިސޯޓްތަކާއި ގުޅިގެން ވޯޓު ހޯދަން މަސައްކަތް ކުރަމުންދާ ކަަމަށެވެ. އަދި އެމްއެންޔޫގެ ކުރީގެ ދަރިވަރުންގެ ފަރާތުން ވެސް ބޮޑު އެހީތެރިކަމެއް ލިބެމުން އަންނަ ކަަމަށް ވިދާޅުވި އެވެ.
އެމްއެންޔޫ އާއި ފެކަލްޓީގެ ފަރާތުން ޝާނީ ވަނީ މިއީ އެމްއެންޔޫއަށާއި ގައުމަށް ލިބޭ ބޮޑު ޝަރަފަކަށް ވާތީ ވީހާ ވެސް ގިނަ ބަޔަކު އެމްއެންޔޫއަށް ވޯޓު ލާން އެދިފަ އެވެ.
އެމްއެންޔޫއަށް ވޯޓު ލާން ކަނޑައެޅިފައިވާ ލިންކަށް ޒިޔާރަތްކުރުމަށް ފަހު އީމެއިލް ނުވަތަ ފޭސްބުކްގެ ޒަރިއްޔާއިން ސައިން އަޕް ކުރުމުން ވޯޓު ލެވޭނެ އެވެ. ވޯޓުލުން ކުރިޔަށް ދަނީ ސެޕްޓެމްބަރު މަހުގެ 17 ވަަނަ ދުވަހުގެ ނިޔަލަށެވެ.
