ސައޮ ޕައޮލޯ (ޖޫން 18) - ކޮޕަ އެމެރިކާ ފުޓްބޯޅަ މުބާރާތުގައި ބްރެޒިލުން ކުޅުނު ދެ ވަނަ މެޗުގައި ރޭ 4-0 އިން ޕެރޫ ބަލިކޮށް ފެންވަރު ދައްކާލައިފި އެވެ.
ބްރެޒިލުން މުބާރާތް ފެށީ ވެނެޒުއޭލާ އަތުން 3-0 އިން މޮޅުވެގެންނެވެ. ރޭގެ މެޗަށް ނުކުތީ އެ މެޗަށް ނުކުތް ފުރަތަަމަ އެގާރަ އަށް ހަ ބަދަލެއް ގެނެސްގެންނެވެ. އެކަމަކު ބްރެޒިލް ފެނުނީ އަސްލު ފެންވަރުގައި ކުޅެލިތަނެވެ. ބްރެޒިލް އިން ވަނީ މި މެޗުގައި ޕެރޫ ކައިރީގައި މޮޅު ކުޅުމެއް ދައްކައިފަ އެވެ.
މެޗުގެ 12 ވަނަ މިނިޓްގައި ގަބްރިއެލް ޖީސޫސް ދިން ބޯޅަ އަކުން ބްރެޒިލަށް ލީޑުނަގައިދިނީ ވާތު ފުލްބެކް އަލެކްސް ސަންޑްރޯ އެވެ. ދެ ވަނަ ލަނޑެއް ޖަހަން ފުރަތަމަ ހާފުގައި ބްރެޒިލް އިން ގިނަ އެޓޭކްތަކެއް ކުރި ނަމަވެސް ދިޔައީ ކާމިޔާބުނުވެ އެވެ. އެ ޓީމުން ދެ ވަނަ ގޯލު ޖެހީ މެޗުގެ 68 ވަނަ މިނިޓްގަ އެވެ. ފްރެޑް ހުސްކޮށްލާފައި ދިން ބޯޅަ ނޭމާ ވަނީ ޕެރޫގެ ގޯލްކީޕަރު ޕެޑްރޯ ގަލޭސީ ކައިރިން ނައްޓާފައި ގޮސް ގޯލަށް ފޮނުވާލައިފަ އެވެ.
ބްރެޒިލްގެ ދެ ވަނަ ގޯލާ އެކު ޕެރޫ ކުރިއަށް ޖެހިގެން ކުޅެން ފެށި ނަމަވެސް މާ ބޮޑު ނުރައްކަލެއް ބްރެޒިލަަށް ކުރިމަތިނުވެ އެވެ. ބްރެޒިލް އިން ތިން ވަނަ ގޯލު ޖެހީ 89 ވަނަ މިނިޓްގައި ރިޗާލިސަން ދިން ބޯޅައަކުން އެވަޓަން ރިބޭރޯ އެވެ. އިތުރު ވަގުތުގައި ރިޗާލިސަން ވަނީ ބްރެޒިލްގެ ހަތަރު ވަނަ ގޯލު ޖަހައިފަ އެވެ. އޭނާ ކުޅެން އެރީ ދެ ވަނަ ހާފްގައި ގަބްރިއެލް ބާބޯސާގެ ބަދަލުގަ އެވެ.
މެޗަށް ފަހު ބްރެޒިލްގެ ކޯޗު ޓީޓޭ ބުނީ ބަދަލުތައް މެޗުތަކުގައި ގެންނަން ބޭނުންވާ ސަބަބަކީ އަންނަ އަހަރުގެ ވޯލްޑް ކަޕް ކޮލިފައިންގައި ރަނގަޅު ނަތީޖާތަކެއް ނެރެން ހުރިހާ ކުޅުންތެރިންނަށް ވެސް ވާދަވެރި މެޗުތަކުގައި ފުރުސަތު ދިނުމަށް ކަމަށެވެ.
މި މޮޅާ އެކު ބްރެޒިލް އޮތީ ގްރޫޕް ބީގެ އެއް ވަަނައިގައި ކުޅުނު ދެ މެޗުން ހަ ޕޮއިިންޓާ އެކު އެވެ. ރޭ މި ގްރޫޕްގައި ވެނެޒުއޭލާއާ އެއްވަރުވި ކޮލަމްބިއާ ދެ ވަނައިގައި އޮތީ ދެ މެޗުން ހަތަރު ޕޮއިންޓާ އެކު އެވެ.
