ބުޑަޕެސްޓް، ހަންގޭރީ (ޖޫން 15) - މީގެ ފަސް އަހަރު ކުރިން ޕޯޗުގަލް އިން ދުނިޔެ ހައިރާންކޮށްލުމަށް ފަހު ޔޫރަޕްގެ ޗެމްޕިއަންކަން ހޯދިއިއިރު، ސަޕޯޓަރުން ދިން ހިތްވަރު މި ފަހަރު ވެސް ޓީމަށް ދޭން އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އެދިއްޖެ އެވެ.
ޕޯޗުގަލް އިން ވަނީ 2016 ވަނަ އަހަރުގެ ޔޫރޯގެ އިތުރުން 2019 ވަނަ އަހަރުގެ ޔުއެފާ ނޭޝަންސް ލީގު ވެސް ކާމިޔާބުކޮށްފަ އެވެ. މި ފަހަރުގެ ޔޫރޯގެ ފުރަތަމަ މެޗުގައި މިރޭ ހަންގޭރީއާ ދެކޮޅަށް ކުޅޭ މެޗުގެ ކުރިން ރޮނާލްޑޯ ވަނީ ސޯޝަލް މީޑިއާ އަށް މެސެޖެއް ދޫކޮށްލައިފަ އެވެ.
ރޮނާލްޑޯ ބުނީ 2016 ވަނަ އަހަރު ދުނިޔެ ހައިރާން ކޮށްލުމަށް ފަހު ޔޫރަޕްގެ ޗެމްޕިއަންކަން ހޯދި ޕޯޗުގަލްގެ ޓީމުގެ ތެރެއިން 11 ކުޅުންތެރިން މި ވަގުުތު ވެސް ޕޯޗުގަލް ސްކޮޑުގައި އެބަތިބި ކަމަށެވެ. އަދި ޕޯޗުގަލްގެ އެ ޓީމަކީ ފުޓްބޯޅައިގެ ތާރީހުގައި ރަން އަކުރުން ނަން ފަވާލެވުނު ކުޅުންތެރިންތަކެއް ކަމަށާއި އޭގެ ތެރެއިން މި ފަހަރު ސްކޮޑުގައި ނެތް ކުޅުންތެރިން ވެސް ތިބީ ޓީމާ އެކުގައި ކަމަށް ރޮނާލްޑޯ ބުންޏެވެ.
"އަހަރެމެންނަށް އެނގޭ ތި ތިބީ އަހަރެމެންނާ އެކުގައިކަން. އަހަރެމެންނަށް އެކަން އިހުސާސް އެބަ ކުރެވޭ. ތި ސަޕޯޓަރުންނަށްޓަކައި އަހަރެމެން ދަނޑަށް މި ނުކުންނަނީ. ތި ސަޕޯޓަރުންނަށްޓަކައި ގައުމީ ސަލާމް ކިޔަނީ. ތި ސަޕޯޓަރުންނަށް ޓަކައި އަހަރެމެން ކޮންމެ ޕޮއިންޓަކަށް ކޮންމެ މޮޅަކަށް އަދި ކޮންމެ ބޯޅަ އަކަށް މި ފައިޓްކުރަނީ،" ރޮނާލްޑޯ ލިޔެފައިވެ އެވެ.
މެޗުގެ ކުރިން އޮތް ނޫސްވެރިންގެ ބައްދަލުވުމުގައި ރޮނާލްޑޯ ބުނީ އެންމެ ފަހުގެ ޗެމްޕިއަންގެ ހައިސިއްޔަތުން މުބާރާތަކަށް ނުކުންނައިރު ޒިންމާ ބޮޑު ކަމަށާއި އެ ޒިންމާ ނަގާނީ ކާމިޔާބީ ހޯދަން ލިބޭ ހިތްވަރެއްގެ ގޮތުގައި ކަމަށެވެ.
ގައުމީ ޓީމާ އެކު ފަސް ވަނަ ޔޫރޯ ކުޅެން ނުކުންނަން ތައްޔާރުވަމުން އަންނަ ރޮނާލްޑޯ ބުނީ މި ފަަހަރުގެ ޓިމަކީ 2016 ވަނަ އަހަރަށް ވުރެ ޒުވާން ޓީމެއް ކަމަށާއި މި ފަހަރުގެ ޓީމާ މެދު ގޮތެއް ނިންމަން އެނގޭނީ މުބާރާތް ކުރިއަށްދާ ވަރަކުން ކަމަށެވެ.
"މީގެ ކުރިއަށްދާ ވަރަކަށް އެނގޭނީ ޓީމާ މެދު އެއްޗެއް ބުނަން. ދެން ކުރުކޮށް ބުނަންޏާ އަހަންނަކީ މީގެ 10 އަހަރު ކުރިން ހުރި ލެވަލްގައި ހުރި ކުޅުންތެރިޔާ އެއް ނޫން. ތަފާތު ތަކެއް ހުންނާނެ،" ރޮނާލްޑޯ ބުންޏެވެ.
"އަހަރެން އެދެން ސަޕޯޓަރުން އަހަރެެމެންގެ މި ދަތުރުގައި ސާބިތުކަންމަތީ ޓީމާ އެކު ތިބެން،"
އުމުރުން 36 އަހަރުގެ ރޮނާލްޑޯ ވަނީ މިއީ އޭނާގެ ފަހު ޔޫރޯ އަށް ވެދާނެތޯ ކުރިމަތިކުރާ ސުވާލުތަކަށް ޖަވާބުދީފަ އެވެ. ރޮނާލްޑޯ ބުނީ ފުޓްބޯޅައިގެ ހާލަތްތަކަށް ހޭނި ވީހާވެސް ގިނަ ދުވަހަކު ކުޅޭ ކުޅުންތެރިންނަކީ މޮޅު ކުޅުންތެރިން ކަމަށެވެ.
އުމުރުން 18 އަހަރުން ފެށިގެން 36 އަހަރާ ހަމައަށް އަހަރެން މި އަންނަނީ ކޮންމެ ހާލަތަކަށް ބޭނުންވާ ބަދަލަށް ހޭނެމުން. ދެން ކުރިއަށް ވެސް އޮތީ އެހެން - ރޮނާލްޑޯ
މި ވަގުތު ގައުމީ ޓީމަށް ކުޅެމުން އަންނަ ކުޅުންތެރިންގެ ތެރެެއިން އެންމެ ގިނަ ގޯލު ޖެހީ ރޮނާލްޑޯ އެވެ. ރޮނާލްޑޯ ވަނީ ޕޯޗުގަލް އަށް 104 ގޯލު ޖަހައިދީފަ އެވެ. ފުޓްބޯޅަ ތާރީހުގައި ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތީ އީރާންގެ ކުރީގެ ފޯވާޑް އަލީ ދާއީ އަތުގަ އެވެ. އޭނާ ވަނީ 109 ގޯލު ޖަހައިފަ އެވެ.
ހަންގޭރީއާ ދެކޮޅަށް ކުޅުނު 13 މެޗުން ޕޯޗުގަލް ބަލިވެފައިނުވެ އެވެ. ނުވަ މެޗުން މޮޅުވިއިރު، ހަތަރު މެޗު ނިމުނީ އެއްވަރުވެގެންނެވެ. ޕޯޗުގަލް އިން މި ފަހަރުގެ ޔޫރޯގައި ކުޅޭ ފުރަތަމަ މެޗުގައި ހަންގޭރީއާ ދެކޮޅަށް ކުޅޭ މެޗު ފަށާނީ ރާއްޖެ ގަނޑިން 21:00 ގަ އެވެ.
