މާލީ ތަނަވަސްކަން ނެތިގެން އަމިއްލަ ބޯހިޔާވަހިކަމަށް ހުރަސްއެޅިފައި ތިބި އާއިލާތަކަށް ހާއްސަކޮށްގެން "ގެދޮރުވެރިޔާ" ލޯން ސްކީމް ސަރުކާރުން މިރޭ އިއުލާންކޮށްފި އެވެ.
ރައީސް އިބްރާހިމް މުހައްމަދު ސޯލިހްގެ ބޯހިޔާވަހިކަމުގެ ސިޔާސަތުގެ ތެރޭގައި ވައުދުވެވަޑައިގަތް މި ލުއި ލޯން ސްކީމަކީ ރަށްރަށުގައި އަމިއްލަ ގޯތީގައި ގެއެއް އަޅަން ނުވަތަ ހަދަން ފަށައި ނުނިމި ހުރި ގެ އިމާރާތްކުރަން ނުވަތަ މަރާމާތުކޮށް ނިންމައި ދިރިއުޅެން އަރާސްތުކުރެވޭނެ ގޮތް ހަމަޖައްސައިދިނުމެވެ.
މި ސްކީމުން ސަރުކާރުގެ އަމާޒަކީ ދެމެހެއްޓެނިވި ބޯހިޔާވަހިކަން ރާއްޖޭގެ ހުރިހާ ކަންކޮޅުތަކަކަށް ކަށަވަރުކޮށްދިނުމެވެ.
އަމިއްލަ ބޯހިޔާވަހިކަމަކަށް އެދި ދިގު އިންތިޒާރެއްގައި ތިބި ފަރާތްތަކަށް ހުޅުވާލާ މި ފުރުސަތުގައި، އެކަކަށް ގިނަވެގެން 700,000ރ.އާ ހަމައަށް ލޯން ދޫކުރާނެ އެވެ. ކުޑަ އިންޓްރެސްޓެއްގައި ދޫކުރާ މި ލޯން ދައްކައި ހަލާސްކުރަން ޖެހޭނީ ދިގު މުއްދަތަކުންނެވެ.
ރައީސް އިބްރާހިމް މުހައްމަދު ސޯލިހް: ހުރިހާ ރަށަކަށް އަމާޒުކޮށްގެން މިރޭ މިވަނީ ލޯން ސްކީމެއް ހުޅުވާލާފައި. -- ފޮޓޯ/ރައީސް އޮފީސް
އެޗްޑީއެފްސީ މެދުވެރިކޮށް ކުރިއަށް ގެންދާ ސްކީމްގައި, ހަ ޕަސެންޓުގެ އިންޓްރެސްޓެއްގައި ދޫކުރާ މި ލޯން ދައްކައި ނިންމަން ޖެހޭނީ ގިނަވެގެން 20 އަހަރުގެ ތެރޭގަ އެވެ. ގްރޭސް ޕީރިއަޑްގެ ގޮތުގައި 12-15 މަހުގެ މުއްދަތެއް ލިބޭއިރު މި ލޯނަށް ޑިޕޮސިޓް ދައްކަން ނުޖެހޭނެ އެވެ.
ގެދޮރުވެރިޔާ ލޯންގެ ތަފްސީލް
- ލޯން ދޫކުރާނީ އަމިއްލަ ގޯތީގައި އަލަށް ގެއެއް އަޅަން ނުވަތަ ނުނިމި ހުރި މަސައްކަތްތައް ކުރަން.
- ހަދަން ފަށާފައި ނުނިމި ހުރި އިމާރާތަށް ބައެއް އިތުރުކުރަން ވެސް ލޯނަށް އެދެވިދާނެ.
- އެކަކަށް އެންމެ ގިނައިން ދޫކުރަން ނިންމާފައި ވަނީ 700,000ރ.
- 15 އަހަރަށް ބަހާލުމުން މަހަކު ދައްކަން ޖެހޭނީ 5,907ރ.
- 16 އަހަރަށް ބަހާލުމުން މަހަކު ދައްކަން ޖެހޭނީ 5,680ރ.
- 17 އަހަރަށް ބަހާލުމުން މަހަކު ޖެހޭނީ 5,485ރ.
- 18 އަހަރަށް ބަހާލުމުން މަހަކު ދައްކަން ޖެހޭނީ 5,307ރ.
- 19 އަހަރަށް ބަހާލުމުން މަހަކު ދައްކަން ޖެހޭނީ 5,153ރ.
- 20 އަހަރަށް ބަހާލުމުން މަހަކު ދައްކަން ޖެހޭނީ 5,015ރ.
މި ލޯނަށް އެދުމުގައި މަދުވެގެން ދެ ފަރާތް ބައިވެރިވާނެ ޖެހެ އެވެ. ލޯނަށް އެދެނީ އަލަށް އިމާރާތް ކުރުން ކަމުގައި ވާ ނަމަ ލޯނަށް އެދޭ ފަރާތުން މުޅި ޕްރޮޖެކްޓުގެ 20 ޕަސެންޓް ޕްރޮޖެކްޓަށް ލާން ޖެހެ އެވެ. ނަމަވެސް މި ފައިސާ، ނަގުދު ފައިސާގެ ގޮތުގައި ނުވަތަ ބޭންކް އެކައުންޓެއްގައި ހުރުން ލާޒިމެއް ނުވެ އެވެ.
މި ލޯނަށް އެދޭ މީހާގެ ނަންމަތީގައި އަމިއްލަ ބިމެއް ރަޖިސްޓްރީވެފައި އޮންނަން ޖެހެ އެވެ. އަދި އެ ބިން ލިބިފައިވާ ރަށުގެ ރަށްވެއްސަކަށް ވުމާއި އެ ރަށުގައި އާއިލާއެކު ދިރިއުޅޭތާ މަދުވެގެން ތިން އަހަރު ވެފައިވާން ޖެހެ އެވެ.
މާލީ ތަނަވަސްކަމެއް ނެތިގެން އަމިއްލަ ބޯހިޔާވަހިކަމެއް ނުލިބި ތިބި އާއިލާތަކަށް މި ސްކީމަކީ ވަރަށް ބޮޑު ލުޔެއް -- ގްރެފިކްސް: އަބްދުﷲ ޝަފީޢު (އަބޯ) / އަދަދު
ސަރުކާރުން ބުނިގޮތުގައި މި ސްކީމާ އެކު އަމިއްލަ ބޯހިޔާވަހިކަމަށް ނުވަދެވި ތިބި އެތައް ބަޔަކަށް ލުއި ފަސޭހަކޮށް އެ އިންތިޒާމް ހަމަޖެހިގެންދާނެ އެވެ. ގެދޮރު ލޯންތައް ބޭންކްތަކުން ދޫކުރަމުން އަންނަނީ ބޮޑު އިންޓްރެސްޓް ރޭޓުގަ އެވެ. މިކަމާ ހެދި, އެތައް ބަޔަކަށް ލޯނު ނުލިބި އަމިއްލަ ގެދޮރަށް ނުވަދެވި ތިބެން ޖެހިފައި އެބަތިއްބެވެ.
