ބްރެޒީލިއާ (ޖޫން 14) - ކޮޕަ އެމެރިކާ ފުޓްބޯޅަ މުބާރާތުގެ އެންމެ ފަހުގެ ޗެމްޕިއަން ބްރެޒިލުން މި ފަހަރުގެ މުބާރާތުގައި ކުޅުނު ފުރަތަމަ މެޗުން ރޭ 3-0 އިން ވެެނެޒުއޭލާ އަތުން މޮޅުވެއްޖެ އެވެ.
ރޭގެ މެޗުގައި ބްރެޒިލަށް ލީޑު ނަގައިިދިނީ މެޗުގެ 23 ވަނަ މިނިޓްގައި ޑިފެންޑަރު މާކުއީނިއޯސް އެވެ. އޭރިއާތެރެއިން ލިބުނު ބޯޅައެއް މާކުއީނިއޯސް ވަނީ ތިރިތިރިން ގޯލުގެ ތެރެއަށް ފޮނުވާލައިފަ އެވެ. އޭގެ އިރުކޮޅެއް ފަހުން ރިޗާލިސަން ވަނީ ބްރެޒިލަށް ދެ ވަނަ ގޯލެއް ޖަަހައިދީފަ އެވެ. އެކަަމަކު އޮފްސައިޑްވުމުން އެ ލަނޑު ބަލައެއް ނުގަތެވެ.
ފުރަތަމަ ހާފުގައި އިތުރު ގޯލެއް ޖަހަން ލިބުނު އެހެން ފުރުސަތުތަކުގެ ބޭނުމެއް ނުހިފުނެވެ.
ބްރެޒިލްގެ ދެ ވަަނަ ގޯލު ޖެހީ މެޗުގެ 64 ވަނަ މިނިޓްގައި ނޭމާ އެވެ. މިއީ ވެނެޒުއޭލާގެ ޔޯހަން ކުމާނޯ އޭރިއާތެރެއިން ޑަނީލޯ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ. ނޭމާ އެ ޕެނަލްޓީ ކާމިޔާބުކުރިއިރު، މިއީ ގައުމީ ޓީމަށް އޭނާ ޖަަހައިދިން 67 ގޯލެވެ. ޕެލޭގެ ރެކޯޑާ ހަމަކުރަން ބޭނުންވަނީ 10 ގޯލެވެ.
މެޗުގެ ފަހު މިނިޓްގައި ބްރެޒިލް އަށް ފަހު ގޯލު ޖަހައިދިނީ ގަބްރިއެލް ބާބޯސާ އެވެ. މިއީ ނޭމާ މުޅިން ހުސްކޮށްލާފައި ދިން ބޯޅައަކުން ބާބޯސާ ޖެހި ގޯލެކެވެ.
ވެނެޒުއޭލާ އިން ރޭގެ މެޗަށް ތައްޔާރުވިއިރު، އެ ޓީމުގެ 12 މީހެއް ކޮވިޑަށް ޕޮޒިޓިވްވި އެވެ. އޭގެ ތެރޭގައި އަށް ކުޅުންތެރިން ހިމެނެ އެެވެ.
ބްރެޒިލުން ވަނީ އެންމެ ފަހުން 2019 އަހަރު އެ ގައުމުގައި ބޭއްވި މުބާރާތުގެ ޗެމްޕިއަންކަން ހޯދައިފަ އެވެ. އެއީ 12 އަހަރަށް ފަހު އެވެ. އަދި އެ ބްރެޒިލުން މިހާތަނަށް މުބާރާތް ހޯސްޓްކުރި ފަސް ފަހަރު ވެސް ޗެމްޕިއަންކަން ހޯދީ އެ ޓީމުންނެވެ.
ރޭ ކުޅުނު އަނެއް މެޗުން ކޮލަމްބިއާ އިން ވަނީ 1-0 އެކުއެޑޯ ބަލިކޮށްފަ އެވެ.
މި ފަހަރުގެ ކޮޕަ އެމެރިކާ ހޯސްޓް ކުރަން އެންމެ ފުރަތަމަ ދީފައި އޮތީ އާޖެންޓީނާ އާއި ކޮލަމްބިއާ އަށެވެ. އެކަމަކު ކޮވިޑްގެ ހާލަތާއި އެހެނިހެން ސަަބަބުތަކާ ހުރެ އެ ދެ ގައުމުގައި މުބާރާތް ހޯސްޓް ނުކުރެވުމުން ފުރުސަތު ދިނީ ބްރެޒިލަށެވެ. ބްރެޒިލްގައި ވެސް ކޮވިޑްގެ ހާލަތު ގޯސްކޮށް އޮއްވައި މި މުބާރާތް ބާއްވާތީ ގިނަ ބަޔަކު ހިތްހަމަ ނުޖެހުނެވެ. އޭގެ ތެރޭގައި ގައުމީ ޓީމުގެ ކުޅުންތެރިން ވެސް ހިމެނެ އެވެ. އެކަމަކު މުބާރާތް ކުރިއަށްގެންދަން ނިންމީ ބްރެޒިލްގެ ސުޕްރީމް ކޯޓުން ވެސް އެގޮތަށް ނިންމުމުންނެވެ.
