ރައީސް އިބްރާހިމް މުހައްމަދު ސޯލިހްގެ ސަރުކާރުގެ ބޯހިޔާވަހިކަމުގެ ސިޔާސަތުގެ މުހިއްމު މަޝްރޫއެއްގެ ގޮތުގައި، ރަށްރަށުގައި ދިރިއުޅޭ ފަރާތްތަކަށް ހާއްސަކުރާ ލޯން ސްކީމެއް މާދަމާ ރޭ އިފްތިތާހްކުރަން ނިންމައިފި އެވެ.
ބޯހިޔާވަހިކަމުގެ ދަތިކަމަށް ހައްލު ހޯދައިދޭން ސަރުކާރުން ގެންގުޅުއްވާ ވިސްނުމުގެ ތެރެއިން މާދަމާ އިއުލާންކުރަނީ "ގެދޮރުވެރިޔާ" ލޯން ސްކީމެވެ. ރަށްރަށަށް ލޯން ސްކީމެއް ހާއްސަކުރަން ނިންމާފައިވާ ކަމުގެ އިތުރުން މި ސްކީމްގެ މާބޮޑު ތަފްސީލެއް ސަރުކާރުން މިހާތަނަށް އާއްމެއް ނުކުރެ އެވެ.
އެކަމަކު ބޯހިޔާވަހިކަމުގެ ސިޔާސަތާ ގުޅޭ މުހިއްމު އިވެންޓެއް މާދަމާ ރޭ އޮންނާނެ ކަން ރައީސް އޮފީހުން މިރޭ ވަނީ ބުނެފަ އެވެ.
ރައީސް އޮފީހުގައި މިދިޔަ ފެބުރުއަރީ މަހުގެ ތެރޭގައި ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު މުހައްމަދު އަސްލަމް ވިދާޅުވީ ހައުސިން ލޯން މިހާރު ލިބެނީ މަދު ރަށްތަކަކަށް ކަމަށެވެ. އެކަމަކު، ސަރުކާރުގެ އަމާޒަކީ އެއްވެސް ރަށެއް ބާކީނުކޮށް ހުރިހާ ރަށަކަށް ލޯން ސްކީމެއް ހުޅުވާލުން ކަމަށް ވިދާޅުވި އެވެ.
މެދު ފަންތީގެ މީހުންނަށް ވެސް ލޯނު ލިބޭ ސްކީމުގެ އިންޓްރެސްޓް ރޭޓު ކުޑަވާނެ ކަމުގެ ޔަގީންކަން ވެސް ދެއްވި އެވެ.
މިނިސްޓަރު ވިދާޅުވެފައިވާ ގޮތުގައި އަންނަ އަހަރުގެ ތެރޭގައި އަތޮޅުތަކުގައި 1.5 ބިލިއަން ރުފިޔާގެ ހައުސިން މަޝްރޫއު ކުރިއަށް ގެންދަން ވެސް އޮތީ ނިންމައިފަ އެވެ.
ޕީއެސްއައިޕީގެ ދަށުން ސަރުކާރުގެ ވިސްނުން ހުރީ ޖާގައިގެ ދަތިކަން ހުރި ރަށްތަކުގައި ރޯ ހައުސް އެޅުމަށެވެ.
"އޭގައި އަޅުގަނޑުގެ ޕްރެފަރަންސް އަކީ ޖާގަ، ބިން ހުރި ތަންތަނުގައި ސިންގަލް ސްޓޯރީ ރޯ ހައުސް. ޖާގައިގެ ދަތިކަން ކޮންމެވެސް ވަރަކަށް ހުރި ތަންތަނުގައި ޓޫ ސްޓޯރީ ރޯ ހައުސަސް. ދެން ބިން ވަރަށް ބޮޑަށް ދަތިވެފަ ހުރި ތަންތަނުގަ ފްލެޓްސް," އަސްލަމް "އަދަދު"އަށް ވިދާޅުވި އެވެ.
މިނިސްޓަރު ވިދާޅުވި ގޮތުގައި, ރަށްރަށުގައި ފްލެޓް އަޅާނީ އިމާރާތް ފަސް ބުރިއަށް ވުރެން އުސް ނުވާނެ ގޮތަކަށެވެ.
އަތޮޅުތަކުގައި ބައެއް މަޝްރޫއުތައް ކުރިއަށްދާއިރު މާލެ ސަރަހައްދުގައި 5,000 ފްލެޓް އަޅަން ވަނީ އެކި ފަރާތްތަކާ އެކު ސޮއިކޮށްފަ އެވެ. އޭގެތެރޭގައި އެންމެ ހާލުގައި އުޅޭ މީހުންނަށް ދޭން ނިންމާފައިވާ ކައުންސިލް ހައުސިންގެ ޔުނިޓްތައް ވެސް ހިމެނެ އެވެ.
