ބްރެޒީލިއާ (ޖޫން 13) - މި ފަހަރުގެ ކޮޕަ އެމެރިކާ ފުޓްބޯޅަ މުބާރާތް ބްރެޒިލްގައި ހޯސްޓް ނުކުރަން ބުނީ ސިޔާސީ މަންފާއެއް ހޯދުމުގެ ބޭނުމުގައި ނޫން ކަމަށް ބްރެޒިލްގެ ކޯޗު ޓީޓޭ ބުނެފި އެވެ.
ސިޔާސީ ހަމަނުޖެހުންތަކާއި ކޮވިޑް-19ގެ ހާލަތުގެ ސަބަބުން މި ފަހަރު ކޮޕަ އެމެރިކާ އެންމެ ފުރަތަމަ ހޯސްޓް ކުރަން ފުރުސަތު ލިބިފައި އޮތް އާޖެންޓީނާ އާއި ކޮލަމްބިއާގައި އެކަން ނުކުރެވުނެވެ. ބިޑަށް ހުޅުވާލައިގެން ކޮޕަ އެމެރިކާ ހޯސްޓްކުރަން މި މަހުގެ ކުރީކޮޅުގައި ދިން ފުރުސަތުގައި ބްރެޒިލް އިން މުބާރާތް ބޭއްވުމުގެ ބިޑް ކާމިޔާބުކުރި އެވެ. ބްރެޒިލްގައި ވެސް ކޮވިޑްގެ ނުރައްކާ ބޮޑުވެފައިވާއިރު، އެ ގައުމުގައި ކޮޕަ އެމެރިކާގެ ބޭއްވިޔަނުދޭން ދެ ފަރާތަކުން ވަނީ އެ މައްސަލަ ސުޕްރީމް ކޯޓަށް ހުށަހަޅައިފަ އެވެ. އެ މައްސަލަ ބެލުމަށް ފަހު ސުޕްރީމް ކޯޓުގެ ފަޑިޔާރުން ކަނޑައެޅީ މުބާރާތް ހުއްޓުވޭނެ ގޮތެއް ފެންނަން ނެތް ކަމަށެވެ.
މި ފަަހަރުގެ ކޮޕަ އެމެރިކާ ފުރަތަމަ މެޗުގައި މިރޭ ބްރެޒިލް ކުޅޭނީ ވެނެޒުއޭލާ އެވެ. ކޮޕަ އެމެރިކާ ކުޅެން ބްރެޒިލަށް ދަތުރުކުރި ވެނެޒުއޭލާގެ ކުޅުންތެރިންނާއި ކޯޗުންގެ ތެރެއިން 12 ޕޮޒިޓިވް ކޭސް ވަނީ ފެނިފަ އެވެ. އޭގެ ތެރޭގައި ޕޮޒިޓިވްވި އަށް ކުޅުންތެރިން ހިމެނެ އެވެ.
ޓީޓޭ ބުނީ އެންމެ ފުރަތަމަ ވެސް މުބާރާތް ބޭއްވުމުގެ ވިސްނުމާ އޭނަ ދެކޮޅު ހެދީ ކުއްލިއަކަށް މި ކަހަލަ ކަންކަން މެނޭޖްކުރެވޭނެ ކަމަށް ގަބޫލު ނުކުރެވޭތީ ކަމަށެވެ. މީގެ ފާޑުކިޔަނީ ހަަަމައެކަނި ބްރެޒިލް ފުޓްބޯޅަ ފެޑެރޭޝަނަށް އެކަނި ނޫން ކަަމަށާއި ދެކުނު އެމެރިކާގެ މައި ފުޓްބޯޅަ އިދާރާ ކޮންމެބޯލަށް ވެސް ގޯސްތަކެއް ހެދިފައިވާ ކަން ޓީޓޭ ފާހަގަކުރި އެވެ.
"އަހަންނަކި ސިޔާސީ ޕާޓީއެއްގައި އުޅޭ މީހެއް ނޫން. އަހަރެން ވޯޓުލާފައި ހުންނާނީ ވެސް ޕާޓީ އަށް ވުރެ ބޮޑަށް މީހާ އަށް. އެހެންވީމަ މި ބުނަނީ ކޮޕަ އެމެރިކާއާ ދެކޮޅަށް މި ވަގުތު މި ވާހަކަ ދައްކަނީ ސިޔާސީ ކަމެއް ހާސިލްކުރާކަށް ނޫނޭ. އެ ކަހަލަ މަންފާއެއް ހޯދުން އެއީ އަހަރެން ދުވަހަކު ވެސް ކުރާނެ ކަމެއް ނޫން،" ޓީޓޭ ބުންޏެވެ.
ޓީޓޭ ބުނީ ކޮޕަ އެމެރިކާ ބްރެޒިލްގައި ބޭއްވުމުގެ ކަންކަން ރޭވިގެންދިޔައީ ވަރަށް އަވަހަށް ކަމަށާއި މީގެ ބަލަން ޖެހޭ ވަރަށް ކަންކަން އޮޅުންފިލުވާފައި ނެތުމުން ހިތާމަކުރާ ކަމަށެވެ.
ބްރެޒިލްގައި މި ފަހަރު ބާއްވާ ކޮޕަ އެމެރިކާ ބޮއިކޮޓްކުރަން ބްރެޒިލް ބައެއް ކުޅުންތެރިން ނިންމާފައިވާ ކަމަށް މީޑިއާތަކުން ރިޕޯޓްކުރި އެވެ. ޝުއޫރު ފާޅުކޮށް ބްރެޒިލްގެ ކުޅުންތެރިން އަމިއްލަ ސޯޝަލް މީޑިއާ އެކައުންޓްތަކުގައި ކޮށްފައިވާ ޕޯސްޓްތަކުގައި ވަނީ ކޮޕަ އެމެރިކާ ހޯސްޓްކުރަން ބްރެޒިލް ސަރުކާރުން ނިންމިއިރު، މީގެ އާންމުން ދެކޭގޮތާއި ކުޅުންތެެރިންގެ ވިސްނުމަކީ ކޮބައިތޯ އޮޅުންފިލުވާފައިނުވަނީ ކީއްވެތޯ ކުޅުންތެރިން ވަނީ ސުވާލުކޮށްފަ އެވެ.
"މީގެ އޮޅުވާލައިގެން ނުވާނެ. ބްރެޒިލް ގައުމީ ޓީމަކީ ވަކި ކަމެއް. އަހަަރެމެންގެ އަމިއްލަ ވިސްނުމުގައި ފާޅުކުރާ ހިޔާލުތަކަކީ ވަކި ކަމެއް. ކޮންމެ ގޮތެއް ވިޔަސް މިހާރު މުބާރާތް މި އޮތީ ކުރިއަށްދާ ގޮތަށް. އެހެންވީމަ އެ ނިންމުމަށް ވެސް އިހުތިރާމް ކުރާނަން. އަމިއްލަ ރައްކާތެރި ކަމަށް ވިސްނައި ގައުމީ ޒިންމާ އަދާކުރަން ކުޅުންތެރިން ތައްޔާރު،" ޓީޓޭ ބުންޏެވެ.
ބްރެޒިލުން ވަނީ އެންމެ ފަހުން 2019 އަހަރު އެ ގައުމުގައި ބޭއްވި މުބާރާތުގެ ޗެމްޕިއަންކަން ހޯދައިފަ އެވެ. އަދި އެ ގައުމުން މިހާތަނަށް މުބާރާތް ހޯސްޓްކުރި ފަސް ފަހަރު ވެސް ޗެމްޕިއަންކަން ހޯދި އެވެ.
ކޮޕަ އެމެރިކާގައި އެންމެ ފަހުން އަމިއްލަ ފަސް ގަނޑުގައި ބްރެޒިލް ކުޅުނު 20 މެޗުން ވެސް ބަލިވެފައިނުވެ އެވެ. އަމިއްލަ ދަނޑުގައި ކޮޕަ އެމެރިކާގެ މެޗަކުން ބްރެޒިލް އެންމެ ފަހުން ބަލިވީ 1975 ވަނަ އަހަރު އެވެ.
ކޮޕަ އެމެރިކާގައި ކުޅެން އެހެން ބައްރުތަކުގެ ދެ ޓީމަކަށް ޖާގަދެ އެވެ. މި ފަހަރު ފުރުސަތު ދިން އޮސްޓްރޭލިއާ އާއި ގަތަރަށް ބައިވެރިނުވެވުނީ އޭޝިއާގެ ވޯލްޑް ކަޕް ކޮލިފައިން މެޗުތައް މިހާރު ކުރިއަށްދާތީ އެވެ.
މި ފަހަރުގެ މުބާރާތުގައި ވާދަކުރަނީ ހަމައެކަނި ދެކުނު އެމެރިކާގެ 10 ޓީމެވެ. ބްރެޒިލާއި ވެނެޒުއޭލާގެ އިތުރުން ދެން އެ ގްރޫޕްގައި އޮތީ ކޮލަމްބިއާ އާއި އެކުއެޑޯ އަދި ޕެރޫ އެވެ. އަނެއް ގްރޫޕްގައި އޮތީ އާޖެންޓީނާ، ބޮލިވިއާ، އުރުގުއޭ، ޗިލީ އަދި ޕެރަގުއޭ އެވެ.
ބްރެޒިލާއި ވެނެޒުއޭލާ ކުޅޭ މެޗު ފަށާނީ މިރޭ ރާއްޖެ ގަޑިން ދަންވަރު 2 ޖަހާއިރު އެވެ.
