އެންމެ ފަހުން 2018 ވަނަ އަހަރު ބޭއްވި ފީފާ ވޯލްޑްގެ ޗެމްޕިއަންކަން ހޯދި ފްރާންސަކީ މި ފަހަރުގެ ޔޫރޯގެ ފޭވަރިޓެކެވެ. އެ ޓީމުން ވަނީ މީގެ ކުރިން 1984 ވަނަ އަހަރާއި 2000 ވަނަ އަހަރުގެ ޔޫރޯ ޗެމްޕިއަންކަން ހޯދައިފަ އެވެ. މިއީ ފްރާންސް އިން ޔޫރޯގައި ކުޅޭނެ 10 ވަނަ ފަހަރެވެ. އެންމެ ފަހުން ފްރާންސް އިން އަމިއްލަ ގައުމުގައި ހޯސްޓްކުރި ޔޫރޯގެ ފައިނަލުގައި ބަލިވީ ޕޯޗުގަލް އަތުންނެވެ.
ފްރާންސް މި ފަހަރުގެ ޔޫރޯ އަށް ކޮލިފައިވީ ކޮލިފައިން ގްރޫޕް އެޗްގެ އެއް ވަނަ ޓީމުގެ ގޮތުގަ އެވެ. ކޮލިފައިންގައި ފްރާންސް ކުޅުނު 10 މެޗުގެ ތެރެއިން ވަނީ އަށް މެޗުން މޮޅުވެފަ އެވެ. ކޮލިފައިންގައި ފްރާންސަށް މޮޅުނުވެވުނީ ތުރުކީ އަތުންނެވެ. ތުރުކީގެ ހޯމް މެޗުން ފްރާންސް ބަލިވިއިރު، ފްރާންސްގައި ކުޅުނު މެޗު ވަނީ އެއްވަރުވެފަ އެވެ. މި ފަހަރުގެ ޔޫރޯ އަށް ނުކުންނައިރު، ފްރާންސް އޮތް ގްރޫޕްގައި ދެން އޮތް ޓީމުތަކަށް ބަލާއިރު، އެ ޓީމަށް ފަސޭހައެއް ނުވާނެ އެވެ. އެ ގްރޫޕްގައި ދެން އޮތީ ޖަރުމަނާއި ޕޯޗުގަލްގެ އިތުރުން ހަންގޭރީ އެވެ.
ފްރާންސްގެ ޓީމަކީ ތަރިންގެ ޓީމެކެވެ. އެޓީމުގެ ސްކޮޑުގައި ހިމެނޭ ކޮންމެ ކުޅުންތެރިއަކީ ވެސް ކްލަބް ލެވަލްގައި މުހިއްމު ދައުރެއް އަދާކުރާނެ ކުޅުންތެރިއެކެވެ. ފްރާންސް ސްކޮޑު ނެގިއިރު މި ފަހަރު ވަނީ ތަފާތެއް ފެނިފަ އެވެ. އެއީ ފަސް އަހަރު ފަހުން ރެއާލް މެޑްރިޑްގެ ފޯވާޑް ކަރިމް ބެންޒެމާ ޓީމުގައި ހިމެނުމެވެ. މި ސީޒަނުގައި ރެއާލްގައި މޮޅު ކުޅުމެއް ދެއްކި ބެންޒެމާ އަށް ފުރުސަތު ދޭން ނިންމީ ފްރާންސްގެ ކޯޗު ޑިޑިއޭ ޑެޝޯމްޕްސް އެވެ. ދެން އެ ޓީމުގެ ގޮތުގައި ފާހަަގަކުރެވޭ ކުޅުންތެރިންނަކީ ކީލިއަން އެމްބާޕޭ، އެންޓޮއިން ގްރީޒްމަން، ޕައުލް ޕޮގްބާ އަދި އެންގޯލޯ ކާންޓޭ އެވެ.
ފްރާންސްގެ ކޯޗު ޑެޝޯމްޕްސް
ކޯޗު:ޑިޑިއޭ ޑެޝޯމްޕްސް
ޑެޝޯމްޕްސް ވަނީ ކެޕްޓަނެއްގެ ގޮތުގައި ފްރާންސަށް 1998ގެ ވޯލްޑް ކަޕާއި 2000 ވަނަ އަހަރުގެ ޔޫރޯ ކާމިޔާބުކޮށްފަ އެވެ. މި ފަހަރުގެ ޔޫރޯ ފްރާންސް އިން ކާމިޔާބު ކޮށްފިނަމަ ޑެޝޯމްޕްސް ވެގެންދާނީ ކުޅުންތެރިއެއްގެ ގޮތުގަޔާއި ކޯޗެއްގެ ގޮތުގައި މި ދެ މުބާރާތް ކާމިޔާުބުކުރާ ފުރަތަމަ މީހާ އަށެވެ. ޑެޝޯމްޕްސް ވަނީ 2018 ވަނަ އަހަރު ރަޝިއާގައި ބޭއްވި ވޯލްޑް ކަޕްގެ ޗެމްޕިއަންކަން ފްރާންސަށް ހޯދައިދީފަ އެވެ. އޭނާ ފްރާންސްގެ ކޯޗުކަމާ ހަވާލުވީ 2012 ވަަނަ އަހަރު އެވެ. ޑެޝޯމްޕްސް ހަވާލުވި ފަހުން އޭނާ އަށް އެކި ފާޑުކިޔުންތައް އަމާޒުވި ނަަމަވެސް ފްރާންސް ފުޓްބޯޅަ ފެޑެރޭޝަނުން ވަނީ އޭނާ މަގާމުގައި ދަމަހައްޓައިފަ އެވެ.
ސްކޮޑު
ކީޕަރުން: ހޫގޯ ލޮރީސް (ޓޮޓެންހަމް)، މައިކް މައިގްނަން (ލިލް)، ސްޓީވް މަންޑަންޑާ (މާސޭ)
ޑިފެންޑަރުން: ލޫކަސް ޑީނިއޭ (އެވަޓަން)، ލިއޯ ޑެބޮއިސް (ލިޔޯން)، ލޫކަސް ހެނާންޑޭޒް (ބަޔާން މިއުނިކް)، ޕްރެސްނެލް ކިމްޕެމްބޭ (ޕީއެސްޖީ)، ޖޫލްސް ކޫންޑޭ (ސެވިއްޔާ)، ކްލެމެންޓް ލޯންގްލޭ (ބާސެލޯނާ)، ބެންޖަމިން ޕަވާޑް (ބަޔާން މިއުނިކް)، ރަފައެލް ވަރާން (ރެއާލް މެޑްރިޑް)، ކާޓް ޒޫމާ (ޗެލްސީ)
މިޑްފީލްޑަރުން: އެންގޯލޯ ކާންޓޭ (ޗެލްސީ)، ތޯމަސް ލެމާ (އެތުލެޓިކޯ މެޑްރިޑް)، ޕައުލް ޕޮގްބާ (މެންޗެސްޓާ ޔުނައިޓެޑް)، އޭޑްރިއަން ރަބިއޯ (ޔުވެންޓަސް)، މޫސާ ސިސޯކޯ (ޓޮޓެންހަމް)، ކޮރެންޓިން ޓޮލީސޯ (ބަޔާން މިއުނިކް)
ފޯވާޑުން: ވިސާމް ބެން ޔެޑާ (މޮނާކޯ)، ކަރިމް ބެންޒެމާ (ރެއާލް މެޑްރިޑް)، ކިންގްސްލީ ކޯމަން (ބަޔާން މިއުނިކް)، އޮސްމާން ޑެމްބެލޭ (ބާސެލޯނާ)، އޮލިވިއޭ ޖިރޫޑް (ޗެލްސީ)، އޮންޓޮއިން ގްރީޒްމަން (ބާސެލޯނާ)، ކީލިއަން އެމްބާޕޭ (ޕީއެސްޖީ)، މާކަސް ތުރާމް (މުންޗެންގްލަޑްބެކް)
