ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ދޫކޮށްލުމަށް ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑޭ)އާ އެކު ވެފައިވާ އެއްބަސްވުމުގެ މުއްދަތު ހަމަވާ ތާރީހަށް ތާވަލުކޮށްފައިވާ އަޑުއެހުން ކަންސަލްކޮށްފި އެވެ.
އަޑުއެހުން ކަންސަލްކޮށްފައިމިވަނީ އަލީ ވަހީދު، ކުރިމިނަލް ކޯޓަށް ފޮނުއްވި ސިޓީއެއްގައި މިއަދުގެ އަޑުއެހުމުގައި އޮންލައިންކޮށް ބައިވެރިވުމަށް ބޭނުންވާ ކަމަށް އެދިފައިވަނިކޮށެވެ.
ރާއްޖޭން ބޭރުގައި ހުންނަވައި، އަލީ ވަހީދު ކުރިމިނަލް ކޯޓަށް ފޮނުއްވި ސިޓީގައި ވަނީ އޭނާގެ ބޭސްފަރުވާ އަދިވެސް ނިމިފައިނުވާ ކަމަށް ބުނެފަ އެވެ. އެނގިފައިވާ ގޮތުގައި އޭނާ ވަނީ މެޑިކަލް ރިޕޯޓްތަކެއް ވެސް ކޯޓަށް ފޮނުވާފަ އެވެ.
ޕްރޮސިކިއުޓާ ޖެނަރަލްގެ އޮފީހުގެ މީޑިއާ އޮފިޝަލް އަހުމަދު ޝަފީއު "އަދަދު"އަށް ވިދާޅުވި ގޮތުގައި އަޑުއެހުން ކެންސަލްކޮށްފައިވާކަން ކޯޓުން އެ އޮފީހަށް މިހާރު ވަނީ އަންގާފަ އެވެ.
"އަޅުގަނޑުމެންނަށް ކޯޓުން އަންގާފައި އޮތީ އަލީ ވަހީދު އޮންލައިންކޮށް ބައިވެރިވުމަށް އެދިފައިވާތީ އާއި ބައެއް މެޑިކަލް ޑޮކިޔުމެންޓްތައް ކޯޓަށް ފޮނުވާފައިވާތީ އަޑުއެހުން ކަންސަލް ކަމަށް،" ޝަފީއު ވިދާޅުވި އެވެ.
މިކަމުގެ ކުރިމިނަލް ކޯޓުން މިހާތަނަށް އެއްޗެއް ނުބުނެ އެވެ.
ޖިންސީ ފުރައްސާރައިގެ ދައުވާތަކެއް ކުރުމާ އެކު، ވަކި މުއްދަތެއް ނެތް ގޮތަށް އަލީ ވަހީދު ފުރުން މަނާކޮށްފައި އޮއްވައި އަމުރު ކްރިމިނަލް ކޯޓުން ބާތިލްކުރި އެވެ. އެ އަމުރު ބާތިލްކުރީ ހަތަރު މަސް ފަހުން އޭނާ ކޯޓަށް ހާޒިރުވާނެ ކަމުގެ ޔަގީންކަން އަސްހަދު ދެއްވައި ޖާމިނުވުމުންނެވެ.
އެ އެއްބަސްވުން އެކުލަވާލީ ފެބުރުއަރީ މަހުގެ ނުވަ ވަނަ ދުވަހު ކަމުން، މިއަދު އެ މުއްދަތު ވަނީ ހަމަވެފަ އެވެ. ހަތަރު މަސް ދުވަހަށް އަސްހަދު ޖާމިނުވެފައިވަނީ، އެ މުއްދަތުގެ ތެރޭގައި އަލީ ވަހީދު އަނބުރާ ރާއްޖެ އަންނާނެ ކަމުގެ ޔަގީންކަން އިގުރާރުގައި އޭނާ ދެއްވާފައިވެ އެވެ.
"...ހަތަރު މަސް ދުވަހުގެ މުއްދަތުގައި އަލީ ވަހީދު ނުފިލާނެ ކަމަށް އަދި ކަނޑައެޅިފައިވާ ދުވަހަށް ރާއްޖެ އަނބުރާ ގެންނާނެ ކަމަށް އިގުރާރުވަމެވެ. އަދި އަހުރެންގެ އިހުމާލުން މި ލިޔުމުގައިވާ ކަންތައްތައް ފުރިހަމަ ނުކުރެވިއްޖެނަމަ އަހުރެންނާމެދު ފިޔަވަޅު އެޅޭނެކަން އަހުރެންނަށް އެނގެއެވެ،" އަސްހަދުގެ އިގުރާރުގައިވެ އެވެ.
އަލީ ވަހީދު ޕާސްޕޯޓް ދޫކުރި އަމުރު ބާތިލް ކުރަން ދައުލަތުން ހައިކޯޓަށާއި ސުޕްރީމް ކޯޓަށް ވެސް ދިޔަ ނަމަވެސް، އެ މައްސަލަ ކުރިއަށް ގެންދެވޭ ގޮތެއް ނުވެފައިވަނީ އަލީ ވަހީދުގެ ޣައިރު ހާޒިރުގައި އެފަދަ މައްސަލައެއް ނުހިނގޭނެތީ އެވެ.
އޭނާ އުޅޭ ތަނެއް ހޯދުމަށް މަތީ މަރުހަލާގެ ދެ ކޯޓުން ވެސް އަސްހަދަށް ގުޅި އެވެ. އެކަމަކު، އޭނާ ވިދާޅުވެފައިވަނީ އަލީ ވަހީދު ވީ ތަނެއް އޭނާއަށް ނޭނގޭ ކަމަށެވެ. ޖާމިނު އެއްބަސްވުމާ ހިލާފުވުމަކީ އެއަށް ގާނޫނުގައި އަދަބުތަކެއް ކަނޑައަޅާފައިވާ ކަމެކެވެ.
އެގޮތުން، އެއް އަހަރު ދުވަހަށްވުރެ ދިގު ނޫން މުއްދަތަކަށް ޖަލަށްލުމާއި ދެ އަހަރު ދުވަހަށް ވުރެ ދިގު ނޫން މުއްދަތަކަށް ގޭގައި ބަންދުކުރުން ނުވަތަ 15,000 ރުފިޔާއަށް ވުރެ ބޮޑުނޫން އަދަދަކުން ޖޫރިމަނާކުރުން އަދި، ބަންދުގައި ހުރި މީހަކު ކަފާލާތުގެ އުސޫލުން ދޫކުރުމުގައި، ވަކި މުއްދަތެއް ވަންދެން ޖާމިނު ނުވެވޭނެ ކަމަށް ކަނޑައެޅުން ފަދަ އަދަބެއް ދެވިދާނެ އެވެ.
