ރިއޯ ޑި ޖަނޭރޯ (ޖޫން 9) - ކޮވިޑް-19ގެ ހާލަތު ބްރެޒިލްގައި ގޯސްވެފައިވާ ވަގުތެއްގައި އެ ގައުމުން ކޮޕަ އެމެރިކާ ފުޓްބޯޅަ މުބާރާތް ހޯސްޓްކުރަން ނިންމާފައިވާތީ އެކަމާ މެދު ބްރެޒިލްގެ ކުޅުންތެރިން ވަރަށް ބޮޑަށް ކަންބޮޑުވުން ފާޅުކޮށް ވަކިވަކިން ކޮންމެ ކުޅުންތެރިއަކު ބަޔާނެއް ނެރެފި އެވެ.
މުބާރާތް ހޯސްޓްކުރުމާ މެދު ބްރެޒިލްގެ އާންމުންގެ ހިތްހަމަަނުޖެހުންތައް ހުރުމުން ބްރެޒިލްގެ ގައުމީ ޓީމުގެ ކުޅުންތެރިން މުބާރާތް ބޮއިކޮޓް ކުރުމުގެ ފުރުސަތު ބޮޑު ކަމަށް ބްރެޒިލްގެ ކޯޗު ޓީޓޭ މީގެ ކުރިން ވަނީ ބުނެފަ އެވެ. އެކަަމަކު ކުޅުންތެރިން މިއަދު ނެރުނު ބަޔާނުގައި ބުނެފައިވަނީ އަންނަ އާދިއްތަ ދުވަހު ފަށަން ނިންމާފައިވާ މުބާރާތް ބޮއިކޮޓް ނުކުރާނެ ކަމަށެެވެ.
"ވަރަށް ބައިވަރު ސަބަބުތަކާ ހުރެ އިންސާނިއްޔަތާއި ޕްރޮފެޝަނަލް އުސޫލުން ބަލާއިރު ކޮޕަ އެމެރިކާއާ ގުޅިގެން ކޮންމެބޯލް (ދެކުނު އެމެރިކާގެ ފުޓްބޯޅަ ފެޑެރޭޝަން) އިން އަމަލުކޮށްފައިވަނީ ރަނގަޅަކަށް ނޫން،" ބްރެޒިލް ކުޅުންތެރިންގެ ބަޔާނުގައިވެ އެވެ."މިއީ ބަލައިގަނެވޭނެ ކަމެއް ނޫން،"
ސިޔާސީ ހަމަނުޖެހުންތަކާއި ކޮވިޑް-19ގެ ހާލަތުގެ ސަބަބުން މި ފަހަރު ކޮޕަ އެމެރިކާ އެންމެ ފުރަތަމަ ހޯސްޓް ކުރަން ބެލި އާޖެންޓީނާ އާއި ކޮލަމްބިއާގައި އެކަން ނުކުރެވުނެވެ. ބިޑަށް ހުޅުވާލައިގެން ކޮޕަ އެމެރިކާ ހޯސްޓްކުރަން ދިން ފުރުސަތުގައި ބްރެޒިލް އިން މުބާރާތް ބޭއްވުމުގެ ފުރުސަތު ހޯދި އެވެ.
ފާޑުކިޔުންތައް އަމާޒުވި ނަމަވެސް އެ ނިންމުން ދިފާއުކުރައްވައި ބްރެޒިލްގެ ރައީސް ޖައިރް ބޮލްސޮނާރޯ ވަނީ ވާހަކަ ދައްކަވައިފަ އެވެ.
ބްރެޒިލް ކުޅުންތެރިން އެ ކުޅުންތެރިންގެ ޝުއޫރުތައް ފާޅުކުރީ މި މަހު ކުޅެން އޮތް ވޯލްޑް ކޮލިފައިން ދެކުނު އެމެރިކާ މުބާރާތުގެ ފަހު މެޗަށް ފަހު އެވެ. ޕެރަގުއޭ އަތުން ރޭ ބްރެޒިލް މޮޅުވިއިރު، މިއީ ޕެރަގުއޭގައި 1985 ވަނަ އަހަރަށް ފަހު ބްރެޒިލްގެ ފުރަތަމަ މޮޅެވެ.
ޝުއޫރު ފާޅުކޮށް ކުޅުންތެރިން އަމިއްލަ ސޯޝަލް މީޑިއާ އެކައުންޓްތަކުގައި ކޮށްފައިވާ ޕޯސްޓްތަކުގައި ވަނީ ކޮޕަ އެމެރިކާ ހޯސްޓްކުރަން ބްރެޒިލް ސަރުކާރުން ނިންމިއިރު މީގެ އާންމުން ދެކޭގޮތާއި ކުޅުންތެރިންގެ ވިސްނުމަކީ ކޮބައިތޯ އޮޅުންފިލުވާފައިނުވަނީ ކީއްވެތޯ ކުޅުންތެރިން ވަނީ ސުވާލުކޮށްފަ އެވެ.
ކޮވިޑް ޖެހިގެން މިހާތަނަށް ބްރެޒިލް އިން 475،000 މީހުން ވަނީ މަރުވެފަ އެވެ. އަދި މި މަހު ކޮވިޑްގެ އިތުރު ރާޅެއްގެ އިންޒާރު ބްރެޒިލްގެ ސިއްހީ މާހިރުން ވަނީ ދީފަ އެވެ.
ބްރެޒިލުން ވަނީ 2019 އަހަރު އެ ގައުމުގައި ބޭއްވި މުބާރާތުގެ ޗެމްޕިއަންކަން ހޯދައިފަ އެވެ. މިހާރު އޮތްގޮތުން އަންނަ އާދިއްތަ ދުވަހު މި ފަހަރުގެ ކޮޕަ އެމެރިކާގައި ބްރެޒިލް ކުޅޭ ފުރަތަމަ މެޗުގައި ނުކުންނާނީ ވެނެޒުއޭލާއާ ދެކޮޅަށެވެ. ދެން އެ ގްރޫޕްގައި އޮތީ ކޮލަމްބިއާ އާއި އެކުއެޑޯ އަދި ޕެރޫ އެވެ.
ކޮޕަ އެމެރިކާ ހޯސްޓްކުރުމާ ދެކޮޅަށް ހުށަހެޅި މައްސަލައެއް ބްރެޒިލްގެ ސުޕްރީމް ކޯޓުން ވަނީ ބަލައިގެންފަ އެވެ. ބްރެޒިލްގެ މީޑިއާ ރިޕޯޓްތައް ބުނާގޮތުން ލަސްވެގެން ހުކުރު ދުވަހު ކޮޕަ އެމެރިކާއާ ގުޅޭގޮތުން ސުޕްރީމް ކޯޓުން އަމުރެއް ނެރޭނެ އެވެ.
