މާލޭ ސިޓީ ކައުންސިލްގެ ބައްދަލުވުންތައް އާންމުކޮށް ހުޅުވާލުމަށާއި ލައިވް ކުރުމަށް ފުރަތަމަ ޖަލްސާގައި ވެސް ނިންމާފައިވާނެ ކަމަށް މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ކައުންސިލްގެ ބައްދަލުވުންތައް ކުރިއަށްދާ ވަގުތު ޖާގަ އޮތް މިންވަރަކުން އާންމުންނަށް ހުޅުވާލުމަށާއި ސޯޝަލް މީޑިއާ މެދުވެރިކޮށް ބައްދަލުވުންތައް ލައިވްކުރުމަށް ކައުންސިލްގައި ތިއްބަވާ އެމްޑީޕީގެ މެންބަރުންގެ ފަރާތުން އެންމެ ފަހުން ބޭއްވި ބައްދަލުވުމަށް ހުށަހެޅި އެވެ.
ނަމަވެސް އެ ހުށަހެޅުން ފާހެއް ނުވި އެވެ.
އެ ހުށަހެޅުމުގެ އިތުރުން ޖަލްސާތަކުގެ އޯޑިއޯ ރެކޯޑިންގް ނަގާ، ބެލެހެއްޓުމަށް ހުށަހެޅި ހުށަހެޅުން ވެސް ފާހެއް ނުވި އެވެ. އަދި، ކައުންސިލް މެންބަރުންގެ މާލީ ބަޔާން ހާމަކުރުމަށާއި މަސްލަހަތު ފުށުއަރާ ހާލަތްތައް ބަޔާންކުރުމަށް ވެސް ފާހެއް ނުވި އެވެ.
އެކަމާ ގުޅިގެން ސިޓީ ކައުންސިލަށް ފާޑުކިޔުން އަމާޒުވެފައިވަނިކޮށް މޭޔަރު މުއިއްޒު ވިދާޅުވި ގޮތުގައި، ޖަލްސާތައް ލައިވް ކުރުމަކީ ކައުންސިލްގެ ފުރަތަމަ ރަސްމީ ޖަލްސާގައި ފާސްކޮށްފައިވާ އެސްއޭޕީގައި ކަނޑައަޅާ ފާސްކޮށްފައިވާ ކަމެއް ކަމަށެވެ.
މުއިއްޒު ވިދާޅުވި ގޮތުގައި، ޖަލްސާތައް ލައިވް ކުރުމަށް އޮފީހުގެ އައިޓީ އިންތިޒާމްތައް ފުރިހަމަ ކުރުމަށް މަސައްކަތް އަންނަނީ ކުރަމުންނެވެ. އަދި، ކައުންސިލްގެ ޓްރާންސްޕޭރެންސީ ކަށަވަރު ކުރުމަށްޓަކައި ހުރިހާ ކައުންސިލަރުން ވެސް މާލީ ތަފްސީލުތައް ވެބްސައިޓްގައި އެންމެންނަށް ފެންނަން ޝާއިއުކުރުމަކީ ކޮންމެހެން ވެސް ކުރަން ޖެހޭ ކަމެއް ކަމަށް ވިދާޅުވި އެވެ.
ސިޓީ ކައުންސިލްގެ އެސްއޭޕީ ފާސްކޮށްފައިވަނީ ފުރަތަމަ ޖަލްސާގައި އެމްޑީޕީ މެންބަރުން ވެސް ހިމެނޭހެން ކައުންސިލްގެ އަގުލަބިއްޔަތުންނެވެ. އެ ބައްދަލުވުމަށް ފަހު މުއިއްޒު ވަނީ ކައުންސިލްގެ ބައްދަލުވުންތައް ވީހާވެސް ބޮޑަށް އާންމުންނާ ކައިރިން ބާއްވާނެ ކަމަށް ވިދާޅުވެފަ އެވެ.
