ހުޅަނގު އިންޑިއާގެ ޕޫނާ ސިޓީގައި ސެނިޓައިޒާ އުފައްދާ ފެކްޓްރީއެއްގައި ރޯވެ ހިނގި އަލިފާނުގެ ހާދިސާއެއްގައި 15 މީހުން މަރުވެއްޖެ އެވެ.
ޕޫނާގެ ފުލުހުންގެ ފަރާތުން ވާހަކަދެއްކި އޮފިޝަލަކު އޭއެފްޕީ އަށް ބުނީ މިހާތަނަށް 15 މީހެއްގެ ހަށިގަނޑު ފެނިފައިވާ ކަމަށެވެ.
"އަލިފާން ރޯވެފައި ވަނީ [އިއްޔެ] ހަވީރު 4:15 ހާއިރު. ރޯވާން ދިމާވި ސަބަބު އަދިވެސް ހޯދިފައެއް ނުވޭ،" އޭނާ ބުންޏެވެ.
މި ހާދިސާގައި ބަޔަކަށް އަނިޔާވެފައިވާ ކަމެއް ނުވަތަ ބަޔަކު ގެއްލިފައިވާ ކަމެއް ސާފު ނޫން ކަމަށް ވެސް ފުލުހުންގެ އޮފިޝަލް ބުންޏެވެ.
ފެކްޓްރީ ގާއިމްކޮށްފައި ހުރީ ޕޫނާ ސިޓީގައި މީހުން މަދު ހިސާބުގަނޑެއްގެ އަވަށެއްގަ އެވެ. ޓައިމްސް އޮފް އިންޑިއާއިން ބުނީ އަލިފާން ރޯވީ މެޝިނަކުން އެއްޗެއް ގޮވުމަށް ފަހު ކަމަށެވެ.
އަދި މީހުން މަރުވާން މެދުވެރިވީ އަލިފާންގަނޑު މުޅި ތަނަށް ފެތުރި، އިމާރާތުގެ ތެރޭގައި ތާށިވުމުން ކަމަށް އެ ނޫހުން ރިޕޯޓުކޮށްފައި ވެ އެވެ.
ސިނާއީ މަސައްކަތް ކުރާ ތަންތަނުގައި ނުރައްކާތެރި ހާދިސާތައް ހިނގުމަކީ އިންޑިއާގައި އާއްމު ކަމެކެވެ. އެގޮތަށް ދިމާވަނީ އެއްވެސް ރޭވުންތެރިކަމެއް ނެތި އަދި ރައްކާތެރިކަމުގެ ގަވާއިދުތަކަށް ބޯނުލަނބާ ފެކްޓްރީތައް ހިންގާތީ އެވެ.
ބޮޑު ވަޒީރު ނަރެންދްރަ މޯދީ ވިދާޅުވީ އެ ހާދިސާއާ ގުޅިގެން ހިތާމަ ކުރައްވާ ކަމަށާއި މަރުވި މީހުން އާއިލާތަކަށް މާލީ ބަދަލު ދެއްވާނެ ކަމަށެވެ.
