ކެމިކަލް ބަރުކޮށްގެން ދަތުރު ކުރަމުން ދިޔަ ބޯޓެއްގައި ސްރީލަންކާ ކައިރިން ރޯވެ ހިނގި ހާދިސާއަށް ފަހު އެ ސަރަހައްދުގެ ކަނޑުގެ ދިރުންތައް މަރުވެ، ލަންކާގެ ގޮނޑުދޮށަށް ލައްގަން ފަށައިފި އެވެ.
ލަންކާގެ މީޑިއާއިން ރިޕޯޓު ކުރާ ގޮތުގައި އާދީއްތަ ދުވަހުގެ ނިޔަލަށް 10 ވެލާ އާއި ކޯމަހަކާއި، ކަނޑުމަތީގައި އުޅޭ ދޫންޏާއި އެހެނިހެން މަސް ފަދަ ތަކެތި މަރުވެގެން ލައްގާފައި ވެ އެވެ.
ކަނޑުގެ ދިރުންތައް މަރުވެގެން ލައްގަމުން ދަނީ ކީއްވެތޯ ބެލުމުގެ ތަހުގީގު ވަނީ ފަށާފަ އެވެ. ވެލާއަކީ ލަންކާގައި ހިމާޔަތްކޮށްފައިވާ ދިރުމަކަށް ވާތީ އެ ތަކެތި ތަހުލީލުގެ ބޭނުމަށް ނެގީ ކޯޓު އުމުރެއްގެ ދަށުންނެވެ.
މަރުވެގެން ލައްގާފައިވާ ބައެއް ވެލާތަކުގައި އަނިޔާވެފައި ހުރި ކަމުގެ ނިޝާންތައް ފެންނަން ހުއްޓެވެ. ރިޕޯޓުތައް ބުނާ ގޮތުން އަނިޔާގެ ނިޝާން ހުރި އެ ވެލާތަކަކީ ބޯޓުގައި ރޯވެ ހިނގި ހާދިސާގެ ސަބަބުން މަރުވި ވެލާތަކެއް ކަމަށް ނުބެލެވެ އެވެ.
މަރުވެގެން ލައްގާފައިވާ ވެލާތަކެއް.-- ފޮޓޯ: ޑެއިލީ މިރާ
އެ ވެލާތައް ނޫން އެހެން ދިރުންތައް މަރުވެފައި ވަނީ ބޯޓުގައި ރޯވެ ހިނގި ހާދިސާގެ ސަބަބުންތޯ ޔަގީން ކުރުމަށް މެރީން އެންވާރަމަންޓް ޕްރޮޓެކްޝަން އޮތޯރިޓީ އާއި އެހެން އިދާރާތަކުން ދަނީ ތަހުގީގު ކުރަމުންނެވެ.
ރޯވި ބޯޓު އަޑިއަށް ދާތީ ތިމާވެށީގެ ކާރިސާއެއްގެ ނުރައްކާ
ބޯޓުގައި ރޯވި އަލިފާންގަނޑު ނިއްވާލެވިފައި ވަނީ ދެ ހަފްތާގެ މަސައްކަތަށް ފަހު މިދިޔަ ހޯމަ ދުވަހު އެވެ. ލަންކާ ފުލުހުން ދަނީ އެ މައްސަލަ ތަހުގީގު ކުރަމުންނެވެ.
ސިންގަޕޫރުގައި ރަޖިސްޓްރީކޮށްފައި އެމްވީ އެކްސް-ޕްރެސް ޕާލް ބޯޓު އަޑިއަށް ދާން ފެށީ މިދިޔަ ބުދަ ދުވަހު އެވެ. ބޯޓުގެ އެއް ބައި މިހާރު ވެސް އަޑީގައި އޮތް އިރު، އިންޑިއާ އާއި ލަންކާ ކަނޑުގެ ސިފައިން ގުޅިގެން ބޯޓު ލަންކާއާ ދުރަށް ކަނޑުގެ ފުން ހިސާބަކަށް ގެންދެވޭތޯ ކުރާ މަސައްކަތަށް ވަނީ ހުރަސް އެޅިފަ އެވެ.
ކަނޑުގެ ސިފައިންނާއި ބޯޓުގެ ވެރިފަރާތުން ވެސް ބުނީ އޭގެ ފަހަތު ކޮޅު ވަނީ ކަނޑުގެ 21 މީޓަރު އަޑިއަށް ފެތިފައި ކަމަށާއި ކުރީކޮޅު ވެސް މަޑުމަޑުން އަޑިއަށް ދަމުންދާ ކަމަށެވެ.
ބޯޓުގެ ވެރި ފަރަތް އެކްސް-ޕްރެސް ފީޑާޒް އިން ވަނީ އެ ހާދިސާއާ ގުޅިގެން މައާފަށް އެދި، ތެޔޮ ލީކުވެއްޖެ ނަމަ ސާފު ކުރުމުގައި މަސައްކަތް ކުރާނެ ބޮޑު ޓީމެއް ތައްޔާރީ ހާލަތަށް ގެނެސްފަ އެވެ.
ނަމަވެސް މިހާތަނަށް ތެލާއި ކެމިކަލް ލީކުވެފައިވާ ކަމުގެ އެއްވެސް ނިޝާނެއް ފެންނަން ނެތް ކަމަށް އެކްސް-ޕްރެސް ފީޑާޒް އާއި ލަންކާގެ ޕޯޓް އޮތޯރިޓީން ވެސް ބުނެ އެވެ.
ބޯޓުގައި ހުރި މުދަލުގެ ބޮޑު ބައިގައި ވަނީ އަނދައިހުލިވެފަ އެވެ. އޭގެ ތެރޭގައި 25 ޓަނުގެ ނައިޓްރިކް އެސިޑާއި، ސޯޑިއަމް ހައިޑްރޮކްސައިޑާއި، ލުބްރިކަންޓް އަދި އެހެން ކެމިކަލް ހިމެނެ އެވެ.
ނަމަވެސް ބާކީ ހުރި ކެމިކަލާއި ފިޔުލް ޓޭންކުގައި ހުރި ތެޔޮ ކަނޑަށް ލީކުވުމުގެ ބިރު ބޮޑެވެ. އެފަދަ ކަމެއް ހިނގައިފި ނަމަ ކަނޑުގެ ދިރުންތަކަށް އަންދާޒާ ނުކުރެވޭ ވަރުގެއް ގެއްލުމެއް ލިބި، ލަންކާގެ ގޮނޑުދޮށް އިތުރަށް ތަގައްޔަރު ވާނެ އެވެ.
ރިޕޯޓުތައް ބުނާ ގޮތުން މިއީ ލަންކާގެ ތާރީހުގައި ކަނޑުގެ ދިރުންތަކަށް ގެއްލުން ލިބޭ ފަދަ ގޮތަކަށް ދިމާވި އެންމެ ބޮޑު ހާދިސާ އެވެ.
