ސްރީ ލަންކާއަށް ބޯކޮށް ވާރޭވެހި ފެންބޮޑުވުމުގެ ސަބަބުން ހިނގި ހާދިސާތަކުގައި 14 މީހުން މަރުވެ، 240،000 އަށް ވުރެ ގިނަ މީހުން ހާލުގައި ޖެހިއްޖެ އެވެ.
މިދިޔަ ބުރާސްފަތު ދުވަހުން ފެށިގެން ހުއްޓުމެއް ނެތި ލަންކާގެ ބައެއް ޑިސްޓްރިކްޓުތަކަށް ދަނީ ވާރޭ ވެހެމުންނެވެ. އޭގެ ސަބަބުން ގެތަކާއި ދަނޑުތަކުގައި ފެންބޮޑުވެ، މަގުތައް ވަނީ ބަންދުވެފަ އެވެ.
ނޭޝަނަލް ޑިޒާސްޓާ މެނޭޖްމަންޓް ސެންޓަރުގެ ވެރިޔާ މޭޖާ ޖެނެރަލް ސުދާންތާ ރަނަސިންގޭ ވިދާޅުވީ 245،212 މީހުން ހާލުގައި ޖެހިފައިވާ ކަމަށެވެ. އެއީ 10 ޑިސްޓްރިކްޓެއްގެ 60،674 އާއިލާއަށް ނިސްބަތްވާ މީހުންނެވެ.
"3،500 އަށް ވުރެ ގިނަ އާއިލާތައް ތިބީ ވަގުތީ ހިޔާގައި. މީހުން ބޭތިއްބުމަށް 72 ވަގުތީ ހިޔާ ވަނީ ހަދާފައި. އެ ތަންތަނުގައި 15،000 މީހުން ޖާގަ ހުންނާނެ،" އޭނާ ވިދާޅުވި އެވެ.
މޫސުން ގޯސްވެ ފެންބޮޑުވުމުން 10 މީހަކު މަރުވެފައި ވާއިރު، އިތުރު ހަތަރު މީހަކު މަރުވެފައި ވަނީ ބޯ ވާރޭގެ ސަބަބުން ހިނގި ބިންގަނޑު ކަނޑައިގެން ދިޔުމުގެ ހާދިސާތަކުގަ އެވެ.
މީޓިއޮރޮލޮޖީ ޑިޕާޓްމަންޓުން ވަނީ ކުރިއަށް އޮތް ދުވަސްތަކުގައި އިތުރަށް ވާރޭ ވެހޭނެ ކަމުގެ އިންޒާރު ދީފަ އެވެ. ނޭޝަނަލް ބިލްޑިން ރިސާޗް އޮގަނައިޒޭޝަނުން ވަނީ ހަ ޑިސްޓްރިކްޓެއްގައި ބިންގަނޑު ކަނޑައިގެން ދިޔުމުގެ ހާދިސާތައް ހިނގުމުގެ ބިރު އޮތް ކަމަށް ބުނެފަ އެވެ.
