ސްރީލަންކާ ކައިރިން ރޯވުމުގެ ސަބަބުން ބޮޑެތި ގެއްލުންތަކާއެކު އަޑިއަށް ދަމުންދާ ބޯޓުގެ ކަޅު ފޮށި ނަގައިފި އެވެ.
ބޯޓުގައި ރޯވި އަލިފާންގަނޑު ނިއްވާލެވިފައި ވަނީ ދެ ހަފްތާގެ މަސައްކަތަށް ފަހު މިދިޔަ ހޯމަ ދުވަހު އެވެ. ލަންކާ ފުލުހުން ދަނީ އެ މައްސަލަ ތަހުގީގު ކުރަމުންނެވެ.
ސިންގަޕޫރުގައި ރަޖިސްޓްރީކޮށްފައި އެމްވީ އެކްސް-ޕްރެސް ޕާލް ބޯޓު އަޑިއަށް ދާން ފެށީ މިދިޔަ ބުދަ ދުވަހު އެވެ. ބޯޓުގެ އެއް ބައި މިހާރު ވެސް އަޑީގައި އޮތް އިރު، އިންޑިއާ އާއި ލަންކާ ކަނޑުގެ ސިފައިން ގުޅިގެން ބޯޓު ލަންކާއާ ދުރަށް ކަނޑުގެ ފުން ހިސާބަކަށް ގެންދެވޭތޯ ކުރާ މަސައްކަތަށް ވަނީ ހުރަސް އެޅިފަ އެވެ.
ބޯޓުގެ ވޮޔޭޖް ޑާޓާ ރިކޯޑަރު ނުވަތަ ކަނޑުމަތީގެ ކަޅު ފޮށީގެ އެހީގައި އަލިފާންގަނޑު ރޯވުމުގެ ކުރިން ބޯޓުގައި އަމަލު ކުރި ގޮތް ދަނެގަނެވޭނެ އެވެ.
ލަންކާގެ ކަމާ ބެހޭ އިދާރާތަކުން ބުނީ އޭގައިވާ މައުލޫމާތު ބޭނުންކޮށްގެން ބޯޓު ދަތުރު ކުރަމުން ދިޔަ ގޮތާއި ކޮލޮމްބޯ ބަނދަރާ ކުރި މުއާސަލާތުގެ ތަފްސީލް ހޯދޭތޯ ބަލާނެ ކަމަށެވެ.
ކަނޑުގެ ސިފައިންނާއި ބޯޓުގެ ވެރިފަރާތުން ވެސް ބުނީ އޭގެ ފަހަތު ކޮޅު ވަނީ ކަނޑުގެ 21 މީޓަރު އަޑިއަށް ފެތިފައި ކަމަށާއި ކުރީކޮޅު ވެސް މަޑުމަޑުން އަޑިއަށް ދަމުންދާ ކަމަށެވެ.
ބޯޓުގެ ވެރި ފަރަތް އެކްސް-ޕްރެސް ފީޑާޒް އިން ވަނީ އެ ހާދިސާއާ ގުޅިގެން މައާފަށް އެދި، ތެޔޮ ލީކުވެއްޖެ ނަމަ ސާފު ކުރުމުގައި މަސައްކަތް ކުރާނެ ބޮޑު ޓީމެއް ތައްޔާރީ ހާލަތަށް ގެނެސްފަ އެވެ.
ނަމަވެސް މިހާތަނަށް ތެލާއި ކެމިކަލް ލީކުވެފައިވާ ކަމުގެ އެއްވެސް ނިޝާނެއް ފެންނަން ނެތް ކަމަށް އެކްސް-ޕްރެސް ފީޑާޒް އާއި ލަންކާގެ ޕޯޓް އޮތޯރިޓީން ވެސް ބުނެ އެވެ.
ލަންކާގެ ކަނޑުގެ ސިފައިންނާއި، ކޯސްޓުގާޑާއި، އެހެން އިދާރާތަކުން ވެސް ވަނީ ތެޔޮ ލީކުވެދާނެ ކަމަށް ބަލައި ތައްޔާރީ ހާލަތަށް ގެނެސްފަ އެވެ.
ބޯޓުގައި ހުރި މުދަލުގެ ބޮޑު ބައިގައި ވަނީ އަނދައިހުލިވެފަ އެވެ. އޭގެ ތެރޭގައި 25 ޓަނުގެ ނައިޓްރިކް އެސިޑާއި، ސޯޑިއަމް ހައިޑްރޮކްސައިޑާއި، ލުބްރިކަންޓް އަދި އެހެން ކެމިކަލް ހިމެނެ އެވެ.
ނަމަވެސް ބާކީ ހުރި ކެމިކަލާއި ފިޔުލް ޓޭންކުގައި ހުރި ތެޔޮ ކަނޑަށް ލީކުވުމުގެ ބިރު ބޮޑެވެ. އެފަދަ ކަމެއް ހިނގައިފި ނަމަ ކަނޑުގެ ދިރުންތަކަށް އަންދާޒާ ނުކުރެވޭ ވަރުގެއް ގެއްލުމެއް ލިބި، ލަންކާގެ ގޮނޑުދޮށް އިތުރަށް ތަގައްޔަރު ވާނެ އެވެ.
ރިޕޯޓުތައް ބުނާ ގޮތުން މިއީ ލަންކާގެ ތާރީހުގައި ކަނޑުގެ ދިރުންތަކަށް ގެއްލުން ލިބޭ ފަދަ ގޮތަކަށް ދިމާވި އެންމެ ބޮޑު ހާދިސާ އެވެ.
ފަތުރުވެރިކަމަށް މަގްބޫލް ނެގޯމްބޯގައި ދެ ވަނައަށް އެންމެ ގިނަ ބަޔަކު އާމްދަނީ ހޯދަނީ މަސްވެރިކަމުންނެވެ. އެހެންވެ، ބޮޑު ސަރަހައްދަކަށް ތެޔޮ ފެތުރިއްޖެ ނަމަ އާއްމުންނަށް ވަރަށް ބޮޑަށް އަސަރު ކުރާނެ އެވެ.
މި ހާދިސާއާ ގުޅިގެން އެ ސަރަހައްދުގައި މަސް ބޭނުން ވަނީ ވަގުތީ ގޮތުން މަނާކޮށްފަ އެވެ.
އޮފިޝަލުން ބުނީ ބޯޓުގައި 300 ޓަނުގެ ތެޔޮ ހުރި ކަމަށެވެ. ތަޖުރިބާކާރުން ބުނެފައިވާ ގޮތުގައި އަލިފާން ރޯވުމުގެ ސަބަބުން ތެޔޮ އަނދައިގެން ގޮސްފައިވުން އެކަށީގެންވެ އެވެ.
އެސޯސިއޭޓެޑް ޕްރެސްއިން ރިޕޯޓު ކުރި ގޮތުގައި ބޯޓުގައި 1،500 ކޮންޓެއިނަރު ހުރިއިރު، އޭގެ ތެރެއިން 81 ކޮންޓެއިނަރުގައި "ނުރައްކާތެރި" މުދާ ހުރި ކަމަށް ފާހަގަކޮށްފައި ވެ އެވެ.
