އިންޑިއާ ސަރުކާރުން އަލަށް ތައާރަފު ކުރި ގަވާއިދުތަކަށް އަމަލު ކުރަން އަންގާ ޓްވިޓާއަށް ފޮނުވި އެންމެ ފަހުގެ ނޯޓިސްގައި ފިޔަވަޅު އަޅާނެ ކަމުގެ އިންޒާރު ދީފި އެވެ.
މިނިސްޓްރީ އޮފް އިލެކްޓްރޯނިކްސް އެންޑް އިންފޮމޭޝަން ޓެކްނޮލޮޖީން ބުނީ ގަވާއިދަށް އަމަލު ކުރަން ޓްވިޓާއިން ދެކޮޅު ހެދުމުން އެނގެނީ އިންޑިއާ މީހުންނަށް ރައްކާތެރިކަމާއެކު އެ ޕްލެޓްފޯމް ބޭނުން ކުރެވޭނެ ގޮތް ހެދުމަށް ޓްވިޓާއިން ބޭނުން ނުވާކަން ކަމަށެވެ.
"އިންޑިއާގައި އޮޕަރޭޓް ކުރާތާ 10 އަހަރަށް ވުރެ ގިނަ ދުވަސް ވެފައި ވީ ނަމަވެސް، އިންޑިއާ ރައްޔިތުންނަށް އަވަސްކޮށް އަދި ދެ ފުށް ފެންނަ ގޮތަށް ޓްވިޓާގައި ދިމާވާ މައްސަލަތައް ހައްލު ކުރެވޭނެ ގޮތެއް ހެދުމަށް ދެކޮޅު ހެދުމަކީ ގަބޫލު ކުރަން އުނދަގޫ ކަމެއް،" އެ މިނިސްޓްރީން ބުންޏެވެ.
ގަވާއިދަށް އަމަލު ނުކުރާ ކުންފުނިތަކާ މެދު މޭ 26 އިން ފެށިގެން ފިޔަވަޅު އަޅަމުން ދިޔަ ނަމަވެސް، އިންޑިއާ ސަރުކާރުން ޓްވިޓާއަށް ފަހުގެ ނޯޓިސް ފޮނުވީ "އިތުރު ފުރުސަތެއް" ދިނުމަށް ކަމަށް އެ މިނިސްޓްރީން ބުނެފައި ވެ އެވެ.
ފިޔަވަޅު އަޅާނެ ކަމުގެ އިންޒާރު ޓްވިޓާއަށް ދިން އިރު، ގަވާއިދަށް އަމަލު ކުރުން ފަށަން ސުންގަޑިއެއް ނޯޓިސްގައި ދީފައެއް ނުވެ އެވެ.
މިދިޔަ ފެބްރުއަރީ މަހު އިންޑިއާ ސަރުކާރުން ހެދި ގަވާއިދުގެ ދަށުން ސޯޝަލް މީޑިއާ އަދި ސްޓްރީމިން ޕްލެޓްފޯމުތަކުގެ ކޮންޓެންޓު ރެގިއުލޭޓް ކުރާނެ ފިޔަވަޅުތަކެއް ކަނޑައަޅާފައި ވެ އެވެ.
އާ ގަވާއިދުގައި ވަނީ ކޯޗެއް؟
އާ ގަވާއިދުގެ ދަށުން އިންޑިއާ ސަރުކާރުން ވަކި ކޮންޓެންޓެއް ނެގުމަށް އަންގާތާ 36 ގަޑިއިރު ތެރޭގައި އެގޮތަށް އަމަލު ކުރަން ޖެހޭނެ އެވެ.
ފަސް މިލިއަނަށް ވުރެ ގިނަ އިންޑިއާ މީހުން އުޅޭ ސޯޝަލް މީޑިއާ ޕްލެޓްފޯމުތަކުގައި ކޮމްޕްލަޔަންސް އޮފިސަރަކާއި، ނޯޑަލް ކޮންޓެކްޓު އޮފިސަރަކާއި ރެޒިޑެންޓް ގްރީވެންސް އޮފިސަރެއް އައްޔަނު ކުރުން ވެސް މަޖުބޫރެވެ.
އޭގެ އިތުރުން ވަކި މެސެޖެއް ދައުރު ވާން ފެށި ގޮތް ހޯދަން ކޯޓުން ނުވަތަ ސަރުކާރުން އެދެފި ނަމަ އެކަން ކޮށްދޭން ވެސް މަޖުބޫރު ވާނެ އެވެ.
ޓްވިޓާ އާއި ފޭސްބުކް އަދި ވަޓްސްއެޕް ފަދަ ޕްލެޓްފޯމުތަކަށް އެ ގަވާއިދަށް އަމަލު ކުރަން ފެށުމުގެ ކުރިން ތައްޔާރުވުމުގެ ގޮތުން ތިން މަސް ދިނެވެ.
ޓްވިޓާއާ މެދު ފިޔަވަޅު އަޅާނެ ކަމުގެ އިންޒާރު ދީފައި ވާއިރު، ގަވާއިދާ މެދު ހިތްހަމަނުޖެހި ވަޓްސްއެޕުން ނިންމާފައިވަނީ ކޯޓަށް ދިޔުމަށެވެ.
ގަވާއިދުގެ ދަށުން ޗެޓު ލޮގުތައް ޓްރޭސް ކުރެވޭނެ ގޮތް ހަދަން ވަޓްސްއެޕަށް މަޖުބޫރެވެ. ވަޓްސްއެޕުން ބުނީ އެއީ އެ އެޕްލިކޭޝަނުން ފޮނުވާ ކޮންމެ މެސެޖެއްގެ އިނގިލީގެ ނިޝާން ރައްކާ ކުރުން ކަހަލަ ކަމެއް ކަމަށެވެ. ހަތަރު ސަތޭކަ މިލިއަން މީހުންނާ އެކު ވަޓްސްއެޕްގެ އެންމެ ބޮޑު މާކެޓަކީ އިންޑިއާ އެވެ.
ވަޓްސްއެޕުން ދިއްލީ ހައި ކޯޓަށް ހުށަހެޅި މައްސަލާގައި ބުނީ ޗެޓެއްގެ އޮރިޖިން ނުވަތަ ފެށުނު ގޮތް ޓްރޭސް ކުރުމަކީ ގާނޫނު އަސާސީއާ ހިލާފު ކަމެއްގެ ގޮތުގައި ކަނޑައަޅައި ދިނުމަށް އެދޭ ކަމަށެވެ.
ޗެޓުތައް ފެށުނު ގޮތް ޓްރޭސް ކުރުމަކީ މީހުން ނުބުނާ އަދި ނުކުރާ ކަންކަމުގެ ތުހުމަތުގައި ދައުވާ އުފުލުމުގެ ފުރުސަތު ބޮޑު ވާނެ ކަމެއްގެ ގޮތުގައި ވަޓްސްއެޕުން ސިފަކުރެ އެވެ.
