ބްރުސެލްސް (ޖޫން 6) - ޗެމްޕިއަންސް ލީގުގެ ފައިނަލުގައި މެންޗެސްޓާ ސިޓީގެ ބެލްޖިއަމް މިޑްފީލްޑަރު ކެވިން ޑިބްރޭނާ ލޯ ކައިރިއަށް ލިބުނު އަނިޔާއިން ރަނގަޅުވާން ކުރި އޮޕަރޭޝަނަށް ފަހު އޭނާ މާސްްކް އަޅައިގެން ކުޅެން ޑޮކްޓަރު ލަފާދީފި އެވެ.
މިދިޔަ ހަފްތާގެ ހޮނިހިރު ދުވަހު ޗެމްޕިއަންސް ލީގުގެ ފައިނަލުގައި 1-0 އިން ޗެލްސީ އަތުން މެންޗެސްޓާ ސިޓީ ބަލިވި މެޗުގެ ތެރެއިން ޑިބްރާނާ އާއި ޗެލްސީގެ އެންޓޯނިއޯ ރޫޑިގާ ބޯޅަ ހޯދަން ވެގެން އުޅުމުގެ ތެރޭގައި ޑިބްރޭނާގެ އައިސޮކެޓާއި މޫނު ކަށިގަނޑަށް އަނިޔާވެ، ބަދަލުކުރަން ޖެހުނެވެ. އެ އަނިޔާ އަށް ފަރުވާ ހޯދަން ކުޑަ އޮޕަރޭޝަނެއް ކޮށްފައިވާއިރު، ރިކަވަރީ ދަނީ ރަނގަޅަށެވެ. އަދި މާދަމާ ބެލްޖިއަމްގެ ޓްރެއިނިންގައި ބައިވެރިވާނެ އެވެ.
އޮޕަރޭޝަން ކުރި ޑޮކްޓަރު ވަނީ މި ފަހަރުގެ ޔޫރޯގައި ޑިބްރޭނާ ކުޅޭއިރު ފޭސް ޕްރޮޓެކްޓް މާސްކެއް އަޅަން އަންގައިފަ އެވެ. އެއާ އެކު ބެލްޖިއަމުން ވަނީ މީގެ ކުރިން އެ ޓީމުގެ ޑިފެންޑަރު ޔެން ވަޓޯންގެން މޫނު ކަށިގަނޑަށް ލިބުނު އަނިޔާގެ ސަބަބުން އެޅި ކަހަލަ މާސްކެެއް ޑި ބްރޭނާ އަށް ހާއްސަކޮށް ތައްޔާރުކުރަން ނިންމައިފަ އެވެ.
ވަޓޯންގެން ފޭސް ޕްރޮޓެކްޓް މާސްކެއް އަޅައިގެން: ޑިބްރޭނާ ވެސް ޔޫރޯގައި ކުޅޭނީ މި ކަހަލަ މާސްކެއް އަޅައިގެން.
ބެލްޖިއަމްގެ ކޯޗު ރޮބާޓޯ މާޓީނޭޒް އެންމެ ފުރަތަމަ ބުނީ އަންނަ ހޮނިހިރު ދުވަހު ޔޫރޯގައި ރަޝިއާ ކުޅޭ ފުރަތަމަ މެޗަށް ޑިބްރޭނާ ފިޓްވުމުގެ ފުރުސަތު ކުޑަކަމަށެވެ. އެކަމަކު އޮޕަރޭޝަން ވަރަށް ކާމިޔާބުކޮށް ގޮސްފައިވާތީ މާޓީނޭޒް ހުރީ ޑިބްރޭނާ އަށް ޔޫރޯގައި ބެލްޖިއަމް އިން ކުޅޭ ފުރަތަމަ މެޗުގައި ކުޅެވޭނެ ކަމުގެ އުއްމީދުގަ އެވެ.
އުމުރުން 29 އަހަރުގެ ޑި ބްރޭނާ އަކީ ފާއިތުވި ތިން އަހަރެއްހާ ދުވަހަށް ބަލާއިރު، ޔޫރަޕްގައި އެއް ލެވަލެއްގައި މޮޅު ކުޅުން ދެމެހެއްޓި މިޑްފީލްޑަރުންގެ ތެެރޭގައި ހިމެނޭ ކުޅުންތެރިއެކެވެ. އަދި ބެލްޖިއަމްގެ ކޯޗު މާޓީނޭޒްގެ ޕްލޭނުގެ މުހިއްމު ކުޅުންތެރިއެކެވެ.
ޔޫރޯ އަށް ތައްޔާރުވުމުގެ ގޮތުން ބެލްޖިއަމް ކުޅޭ އެކުވެރިކަމުގެ ފަހު މެޗުގައި މިރޭ ނުކުންނާނީ ކްރޮއޭޝިއާއާ ދެކޮޅަށެވެ. މީގެ ތިން ދުވަސް ކުރިން ބެލްޖިއަމް ކުޅުނު އެކުވެރިކަމުގެ މެޗެއްގައި ވަނީ ގްރީސްއާ 1-1 އިން އެއްވަރުވެފަ އެވެ.
މި ފަހަރުގެ ޔޫރޯ އަށް ނުކުންނައިރު ބެލްޖިއަމަކީ ފޭވަރިޓުންގެ ގޮތުގައި ގުނާ ޓީމެކެވެ. އެ ޓީމު އޮތީ ދުނިޔޭގެ ރޭންކިންގެ އެއް ވަނައިގަ އެވެ. ބެލްޖިއަމް ވާދަކުރަން ޖެހެނީ ރަޝިއާ އާއި ފިންލެންޑް އަދި ޑެންމާކާ އެއް ގްރޫޕެއްގަ އެވެ.
