ޕޯޓް އަލެގްރޭ، ބްރެޒިލް (ޖޫން 5) - ދެކުނު އެމެރިކާގެ ވޯލްޑް ކަޕް ކޮލިފައިންގައި ރޭ އެކުއެޑޯ 2-0 އިން ބަލިކޮށް ބްރެޒިލުން އެއް ވަނައިގައި ލީޑުފުޅާކޮށްފި އެވެ.
ބްރެޒިލް އެއް ވަނައިގައި އޮތީ ސައްތަ އިން ސައްތަ ރެކޯޑަކާ އެކު ކުޅުނު ފަސް މެޗުން ވެސް މޮޅުވެ 15 ޕޮއިންޓް ހޯދައިގެންނެވެ. ބުރާސްފަތި ދުވަހުގެރޭ ޗިލީއާ އެއްވަރުވި އާޖެންޓީނާ ދެ ވަނައިގައި އޮތީ ފަސް މެޗުން 11 ޕޮއިންޓާ އެކު އެވެ. ތިން ވަނައިގައި އޮތް އެކުއެޑޯ އަށް ފަސް މެޗުން ލިބިފައިވަނީ ނުވަ ޕޮއިންޓެވެ.
އެކުއެޑޯ ކޮޅަށް ބްރެޒިލުން ދެ ގޯލު ޖެހީ ވެސް މެޗުގެ ދެ ވަަނަ ހާފުގަ އެވެ. ބްރެޒިލަށް ލީޑުނަގައިދިނީ މެޗުގެ 65 ވަނަ މިނިޓްގައި ނޭމާ ދިން ބޯޅައަކުން ރިޗާލިސަން އެވެ. އަދި މެޗުގެ އިތުރު ވަގުތުގައި ނޭމާ ވަނީ ޕެނަލްޓީ އަކުން ބްރެޒިލްގެ ދެ ވަަނަ ގޯލު ޖަހައިފަ އެވެ.
ކޮލިފައިންގައި ދެން ބްރެޒިލް ކުޅޭ މެޗު އޮންނާނީ އަންގާރަ ދުވަހުގެރޭ ރަށުންބޭރުގައި ޕެރަގުއޭއާ ދެކޮޅަށެވެ. ފަސް މެޗުން ހަތް ޕޮއިންޓް ހޯދައިގެން ޕެރަގުއޭ އޮތީ ތާވަލުގެ ހަތަރު ވަނައިގަ އެވެ.
ލަނޑު ޖެހުމަށް ފަހު ބްރެޒިލް ކުޅުންތެރިން އުފާފާޅުކުރަނީ.
ކޮވިޑް-19ގެ ހާލަތު ބްރެޒިލްގައި ގޯސްވެފައިވާ ވަގުތެއްގައި އެ ގައުމުން މި މަހު 13 ވަނަ ދުވަހު ފަށާ ކޮޕަ އެމެރިކާ ފުޓްބޯޅަ މުބާރާތް ހޯސްޓްކުރަން އޮތީ ނިންމައިފަ އެވެ. އާންމުންގެ ހިތްހަމަަނުޖެހުންތައް އެކަމާ މެދު ހުރުމުން ބްރެޒިލްގެ ގައުމީ ޓީމުގެ ބައެއް ކުޅުންތެރިން މުބާރާތް ބޮއިކޮޓް ކުރުމުގެ ފުރުސަތު ބޮޑު ކަމަށް ބްރެޒިލްގެ ކޯޗު ޓީޓޭ ވަނީ ރޭގެ މެޗުގެ ކުރިން ބުނެފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން ބްރެޒިލް ޓީމުގެ މެޖޯރިޓީ ކުޅުންތެރިން ވަނީ މުބާރާތުގައި ނުކުޅެން ނިންމައިފަ އެވެ. އަދި އެކަން ރަސްމީކޮށް އަންގާރަ ދުވަހުގެ ވޯލްޑް ކަޕް ކޮލިފައިން މެޗަށް ފަހު ބްރެޒިލް ފުޓްބޯޅަ ފެޑެރޭޝަނަށް އަންގާނެ އެވެ.
ރޭގެ މެޗަށް ފަހު ބްރެޒިލްގެ ކެޕްޓަން ކަސެމީރޯ ވަނީ މި ފަހަރުގެ ކޮޕަ އެމެރިކާ ބްރެޒިލްގައި ހޯސްޓްކުރަން ނިންމި ނިންމުމަށް ފާޑުކިޔައިފަ އެވެ.
ސިޔާސީ ހަމަނުޖެހުންތަކާއި ކޮވިޑް-19ގެ ހާލަތުގެ ސަބަބުން މި ފަހަރު ކޮޕަ އެމެރިކާ އެންމެ ފުރަތަމަ ހޯސްޓް ކުރަން ބެލި އާޖެންޓީނާ އާއި ކޮލަމްބިއާގައި އެކަން ނުކުރެވުނެވެ. ބިޑަށް ހުޅުވާލައިގެން ކޮޕަ އެމެރިކާ ހޯސްޓްކުރަން ދިން ފުރުސަތުގައި ބްރެޒިލް އިން މުބާރާތް ބޭއްވުމުގެ ފުރުސަތު ހޯދި އެވެ.
ކޮޕަ އެމެރިކާ ހޯސްޓްކުރަން ބްރެޒިލްގެ ސަރުކާރުގެ ނިންމުމާ މެދު އެ ގައުމުގެ އާންމު ރައްޔިތުންނާއި ސިޔާސީ މީހުން ވެސް ވަރަށް ބޮޑަށް ހިތްހަމަނުޖެހެ އެވެ. ސިއްހީ ތަޖުރިބާކާރުން ލަފާކުރާ ގޮތުގައި މި މަސް ތެރޭ ބްރެޒިލްގައި އަނެއްކާ ވެސް ކޮވިޑްގެ ކޭސްތައް އިތުރުވުމުގެ ފުރުސަތު ވަރަށް ބޮޑެވެ.
