ބާސެލޯނާ (ޖޫން 4) - ބާސެލޯނާ އިން އެ ޓީމުގެ ކޯޗަކަށް ރޮނާލްޑް ކޫމަން އަންނަ ސީޒަނުގައި ވެސް ބަހައްޓަން ނިންމާފައިވާ ކަމަށް އެ ކްލަބްގެ ރައީސް ޖޮއާން ލަޕޯޓާ ވިދާޅުވެއްޖެ އެވެ.
ލަޕޯޓާ، ބާސެލޯނާގެ ރައީސް ކަމަށް މިދިޔަ މާޗް މަހު އިންތިހާބުވުމަށް ފަހު އެ ކްލަބަށް އާ ކޯޗެއް ގެންނާނެ ކަމަށް މީޑިއާގައި ވާހަކަ ދެކެވުނެވެ. ލަޕޯޓާ ވަނީ ބައެއް ކޯޗުންނާ މަޝްވަރާ ވެސް ކޮށްފަ އެެވެ. ބަޔާން މިއުނިކް ދޫކޮށް ޖަރުމަނު ގައުމީ ޓީމާ ހަވާލުވާން ނިންމާފައިވާ ކޯޗު ހަންސީ ފްލިކްއާ ވާހަކަ ދެއްކި ކްލަބްތަކުގެ ތެރޭގައި ބާސެލޯނާ ހިމެނެ އެވެ.
ކޫމަން ދޫކޮށްލަން ބާސެލޯނާ އިން އުޅުނު އެންމެ ބޮޑު ސަބަބަކީ އޭނާ އަކީ ކުރީގެ ރައީސް ޖޯސެފް ބާޓޮމެއު ހަމަޖެއްސި ކޯޗަކަށްވާތީ އެވެ. އެކަމަކު މި ފަހަރުގެ ސީޒަނުގެ އުނދަގޫ ހާލަތުގައި ވެސް ކޫމަން ވަނީ ބާސެލޯނާ އަށް ސްޕެނިޝް ކަޕް ކާމިޔާބުކޮށްދީ ފަހު ތިން މެޗާ ހަމައަށް ދިޔައިރު ވެސް ލީގަށް ވާދަކޮށްފަ އެވެ. ކޫމަން ބާސެލޯނާއާ އެކު ހަދާފައިވާ އެއްބަސްވުމުގައި ބާކީ އެއް އަހަރު އެބައޮތެވެ.
"އަހަރެމެން ބޯޑް މެމްބަރުންގެ މެދުގައި ބޭއްވި ބައްދަލުވުންތަކަށް ފަހު ނިންމީ ކޫމަންއާ އެކު އަންނަ ސީޒަނުގައި ވެސް ކުރިއަށް ދާން،" ލަޕޯޓާ ސްޕެއިނުގެ ނޫހަކަށް ވިދާޅުވި އެވެ.
ބާސެލޯނާ އަށް 1989 އިން 1995 އަށް ކުޅެދިން ކޫމަން ވަނީ ކުޅުނު ދުވަސް ވަރު އެ ޓީމާ އެކު ޗެމްޕިއަންސް ލީގުގެ ޗެމްޕިއަންކަން ހޯދައިފަ އެވެ. ކޫމަން ވަނީ ޔޫރަޕްގެ ގިނަ ކްލަބްތަކެއްގައި ކޯޗިން މަސައްކަތްކޮށްފަ އެވެ. އޭނާ ބާސެލޯނާއާ ހަވާލުވުމުގެ ކުރިން އެންމެ ފަހުން ހުރީ ނެދަލެންޑްސްގެ ކޯޗަކަށެވެ.
މި ފަހަރުގެ ޓްރާންސްފާ މާކެޓްގައި ބާސެލޯނާ ފެންނަނީ ވަރަށް އެކްޓިވްކޮށެވެ. އެ ޓީމުން ވަނީ ހިލޭ ޓްރާންސްފާއެއްގައި މެންޗެސްޓާ ސިޓީގެ ދެ ކުޅުންތެރިން ކަމަށްވާ ސާޖިއޯ އަގުއޭރޯ އާއި އެރިިކް ގާސިއާގެ ސޮއި ހޯދައިފަ އެވެ. އޭގެ އިތުރުން ރެއާލް ބެޓިސްގެ ކަނާތު ބެކް އެމަސަން ރޯޔާލް ވަނީ ނުވަ މިިލިއަން ޔޫރޯ އަށް ބާސެލޯނާ އަށް ބަދަލުވެފަ އެވެ.
ހިލޭ ޓްރާންސްފާއެއްގައި އިތުރު ތިން ކުޅުންތެރިން ހޯދަން ބާސެލޯނާ އިން މަސައްކަތްކުރެ އެވެ. އެއީ ލިވަޕޫލްގެ ޖިއޮޖީނިއޯ ވައިނަލްޑަމް އާއި ލިޔޯންގެ މެމްފިސް ޑިޕާއި އަދި އޭސީ މިލާންގެ ޖިއަންލުއީޖީ ޑޮންނަރޫމާ އެވެ. މީގެ ތެރެއިން ޑިޕާއި އާއި ވައިނަލްޑަމް ގެންނަނީ ކޫމަންގެ އެދުމަށް ކަމަށް ރިޕޯޓްތައް ބުނެ އެވެ.
ބާސެލޯނާގެ ކެޕްޓަން ލިއޮނަލް މެސީ އެ ޓީމާ އެކު ކޮންޓްރެކްޓްގައި ހުރީ މި މަހުގެ ނިޔަލަށެވެ. އޭނާ އާ ކޮންޓްރެކްޓެއްގައި ސޮއިކުރާނެ ކަމުގެ ޔަގީންކަން އެބައޮތް ކަމަށް ލަޕޯޓާ ވަނީ ވިދާޅުވެފަ އެވެ.
