މެޑްރިޑް (ޖޫން 2) - ދުނިޔޭގެ ފުޓްބޯޅައިގައި ހަތަރު ވަނަ އަށް އެންމެ އަގުބޮޑުކޮށް ކްލަބް ބަދަލުކުރި ޕޯޗުގީސް ފޯވާޑް ޔާއޯ ފެލިކްސް، އެތުލެޓިކޯ މެޑްރިޑް ދޫކޮށްލަން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 21 އަހަރުގެ ޔާއޯ ފެލިކްސް މީގެ ދެ އަހަރު ކުރިން އެތުލެޓިކޯއާ ގުޅުނީ ބޮޑު އަގުގައި ގިނަ ޓީމުތަކުގެ ހުށަހެޅުމަށް ފުރަގަސްދީފަ އެވެ. އެތުލެޓިކޯ އިން ވަނީ ޔާއޯ ފެލިކްސްގެ ސޮއި ހޯދަން 142 މިލިއަން ޑޮލަރުގެ ޓްރާންސްފާ ފީ އެއް ޕޯޗުގަލްގެ ބެންފީކާ އަށް ދައްކައިފަ އެވެ. ޔާއޯ ފެލިކްސް އަށް ވުރެ އަގު ބޮޑުކޮށް ކްލަބް ބަދަލުކުރި ކުޅުންތެރިންނަކީ ޕީއެސްޖީން ގެންދިޔަ ނޭމާ އާއި ކިލިއަން އެމްބާޕޭގެ އިތުރުން ބާސެލޯނާ އިން ގަތް ފިލިއްޕޭ ކުޓީނިއޯ އެވެ.
މި ސީޒަނުގައި ގިނައިން ބަދަލު ކުޅުންތެރިއެއްގެ ގޮތުގައި ބޭނުންކުރި ޔާއޯ ފެލިކްސް ވަނީ ކްލަބް ބަދަލުކުރަން ބޭނުންވާކަން އެތުލެޓިކޯ އަށް އަނގަބަހުން އަންގައިފަ އެވެ. އަދި ޕޯޗުގީސް މީޑިއާ ރިޕޯޓްތައް ބުނާގޮތުގައި ވަރަށް އަވަހަށް ލިޔުމުން އޭނާ އެތުލެޓިކޯ ދޫކޮށްލަން ބޭނުންވާކަން އަންގާނެ އެވެ.
ޔާއޯ ފެލިކްސް އަކީ ދުނިޔޭގެ ފުޓްބޯޅައިގައި ދެ ވަނަ އަށް އެންމެ އަގުބޮޑު ޒުވާން ކުޅުންތެރިޔާ އެވެ. އެންމެ އަގުބޮޑު ޒުވާން ކުޅުންތެރިޔަކީ 203 މިިލިއަން ޑޮލަރަށް 2018 ވަނަ އަހަރު ޕީއެސްޖީން ގެނައި އެމްބާޕޭ އެވެ.
އެތުލެޓިކޯ އިން ޔާއޯ ފެލިކްސްގެ ސޮއި ހޯދީ ރެއާލް މެޑްރިޑާއި މެންޗެސްޓާ ޔުނައިޓެޑް އަދި ލިވަޕޫލުން ވެސް މީގެ ކުރިން އޭނާ ހޯދަން މަސައްކަތްކޮށްފައި ވަނިކޮށެވެ. އޭރު އެ ކްލަބްތަކުން ޔާއޯ ފެލިކްސް ގެންނަން ކުރި މަސައްކަތް ހުއްޓާލީ ބެންފީކާ އިން އޭނާ ވިއްކާލަން ކިޔާ އަގުބޮޑުވުމުންނެވެ.
ހަތް އަހަރު ފަހުން ސްޕެއިނުގެ ޗެމްޕިއަންކަން ހޯދި އެތުލެޓިކޯ އިން އަންނަ ސީޒަނަށް ޓީމު އެކުލަވާލާއިރު، ވިއްކާލާ ކުޅުންތެރިންގެ ތެރޭގައި ޔާއޯ ފެލިކްސް ހިމެނޭ ކަމަށް މީގެ ކުރިން ސްޕެއިނުގެ ނޫސްތަކުން ވަނީ ރިޕޯޓްކޮށްފަ އެވެ. އެކަމަކު ޔާއޯ ފެލިކްސް ވިއްކާލަން އެތުލެޓިކޯ އިން ކިޔާ އަގު ކަމަށްވާ 100 މިިލިއަން ޑޮލަރަށް އޭނާ ގަންނާނެ ކްލަބެއް ނުވާނެތީ އޭނާ އެ ޓީމުގައި މަޑުކުރުމުގެ ފުރުސަތު އެބައޮތެވެ.
ޔާއޯ ފެލިކްސްގެ އިތުރުން ދެން އެތުލެޓިކޯ ދޫކޮށްލާނެ ކަމަށް ބެލެވޭ ކުޅުންތެރިންނަކީ ސްޕެއިނުގެ މިޑްފީލްޑަރު ސައުލް ނިގޭޒާއި ފްރާންސްގެ ވިންގް ތޯމަސް ލެމާގެ އިތުރުން އިނގިރޭސި ފުލްބެކް ކިއެރަން ޓްރިޕިއޭ އެވެ.
