ސްރީ ލަންކާ ކައިރިން ރޯވެ އަނދަން ފެށި މުދާ އުފުލާ ބޯޓުގެ އެއްބައި ކަނޑު އަޑިއަށް ގޮސް، ބޮޑު ސަރަހައްދަކަށް ތެޔޮ ފެތުރުމުގެ ބިރު ބޮޑުވެއްޖެ އެވެ.
ކެމިކަލް ހިފައިގެން ދަތުރު ކުރަމުން ދިޔަ ސިންގަޕޫރުގައި ރަޖިސްޓްރީކޮށްފައިވާ އެކްސް-ޕްރެސް ޕާލް ބޯޓުގައި ރޯވި އަލިފާންގަނޑު ނިއްވާލެވުނީ ދެ ހަފްތާ ފަހުން މިދިޔަ ހޯމަ ދުވަހު އެވެ.
ބޯޓު އަޑިއަށް ގޮސްފި ނަމަ އޭގެ ފިޔުލް ޓޭންކުތަކުގައި ހުރި އެތައް ސަތޭކަ ޓަނުގެ ތެޔޮ ކަނޑަށް ލީކުވެ، ކަނޑުގެ ދިރުންތަކަށް ބޮޑު ގެއްލުމެއް ލިބުމުގެ ބިރު ބޮޑެވެ.
އަލިފާންގަނޑު ނިއްވާލެވުނީ ސްރީލަންކާ އާއި އިންޑިއާ ކަނޑުގެ ސިފައިން ގުޅިގެން ކުރި މަސައްކަތުންނެވެ. މިހާރު އެ މީހުން މަސައްކަތް ކުރަމުން ދަނީ ބޯޓު އަޑިއަށް ހިނގައިދާނެތީ އެކަން ހުއްޓުވުމަށެވެ.
ނަމަވެސް ގަދަވަޔާއެކު ކަނޑު ވެސް ގަދަވެފައި ވާތީ އެ މީހުންގެ މަސައްކަތަށް ވަނީ ހުރަސް އެޅިފަ އެވެ.
"ބޯޓު އެ ދަނީ ފެތެމުން. މަސައްކަތް ކުރަމުން ދަނީ އެއްކޮށް ފެތުމުގެ ކުރިން ކަނޑުގެ ފުން ހިސާބަކަށް ގެންދަން. އޭރުން ކަނޑުގެ ދިރުންތަކަށް ލިބޭ ގެއްލުން ކުޑަ ކުރެވިދާނެ. އެކަމަކު ބޯޓުގެ ފަހަތް ކޮޅު މިހާރު ވެސް އޮތީ ކަނޑު އަޑީގައި،" ލަންކާ ކަނޑުގެ ސިފައިންގެ ތަރުޖަމާނު ކެޕްޓަން އިންދިކާ ސިލްވާ ބީބީސީއަށް ވިދާޅުވި އެވެ.
ބޯޓުގެ ފަހަތު ބައި ކަނޑު އަޑީގައި.-- ފޮޓޯ: އީޕީއޭ
ބޯޓު އަނދަން ފެށުމުން ފޭބި ކުނިތަކާއި ތެލުން މިހާރު ވެސް ނެގޮމްބޯގެ ގޮނޑުދޮށް ވަނީ ތަގައްޔަރުވެފަ އެވެ. އެހެންވެ އެ މައްސަލާގައި ބޯޓު ކްރޫއާ ދެކޮޅަށް ޖިނާއީ ތަހުގީގެއް ވަނީ ފަށާފަ އެވެ.
ރިޕޯޓުތައް ބުނާ ގޮތުން މިއީ ލަންކާގެ ތާރީހުގައި ކަނޑުގެ ދިރުންތަކަށް ގެއްލުން ލިބޭ ފަދަ ގޮތަކަށް ދިމާވި އެންމެ ބޮޑު ހާދިސާ އެވެ.
ފަތުރުވެރިކަމަށް މަގްބޫލް ނެގޯމްބޯގައި ދެ ވަނައަށް އެންމެ ގިނަ ބަޔަކު އާމްދަނީ ހޯދަނީ މަސްވެރިކަމުންނެވެ. އެހެންވެ، ބޮޑު ސަރަހައްދަކަށް ތެޔޮ ފެތުރިއްޖެ ނަމަ އާއްމުންނަށް ވަރަށް ބޮޑަށް އަސަރު ކުރާނެ އެވެ.
މި ހާދިސާއާ ގުޅިގެން އެ ސަރަހައްދުގައި މަސް ބޭނުން ވަނީ ވަގުތީ ގޮތުން މަނާކޮށްފަ އެވެ.
ބޯޓުގެ ކްރޫ މެމްބަރުންގެ ތެރޭގައި ހިމެނޭ 25 މީހުން މިދިޔަ އަންގާރަ ދުވަހު ސަލާމަތް ކުރުމަށް ފަހު މިހާރު ތިބީ ކަރަންޓީނުގަ އެވެ. ނަމަވެސް ތަހުގީގުގެ ބޭނުމަށް މިދިޔަ ހޯމަ ދުވަހު އެ މީހުންނާ ސުވާލު ކުރި އެވެ.
މައްސަލަ ބަލައި ދިނުމަށް އެދި ފުލުހުންނަށް ހުށަހެޅީ ލަންކާގެ މެރީން އެންވާރަމަންޓް ޕްރޮޓެކްޝަން އޮތޯރިޓީންނެވެ.
މިދިޔަ ހަފްތާގައި ކަމާބެހޭ އިދާރާތަކުން ބުނީ ބޯޓުގައި ރޯވީ ނައިޓްރިކް އެސިޑު ލީކުވެގެން ކަމަށާއި ލީކުވަމުންދާކަން ބޯޓުުގެ ކްރޫއަށް މޭ 11 ވަނަ ދުވަހުން ފެށިގެން އެނގޭ ކަމަށެވެ.
ބޯޓުގައި ހުރި މުދަލުގެ ބޮޑު ބައިގައި ވަނީ އަނދައިހުލިވެފަ އެވެ. އޭގެ ތެރޭގައި 25 ޓަނުގެ ނައިޓްރިކް އެސިޑާއި، ސޯޑިއަމް ހައިޑްރޮކްސައިޑާއި، ލުބްރިކަންޓް އަދި އެހެން ކެމިކަލް ހިމެނެ އެވެ.
