ލަކްޝަދީބުގެ ރައްޔިތުން އަދިވެސް ތިބީ ނުތަނަވަސްކަމުގައި!

ލަކްޝަދީބް ރައްޔިތުންގެ ހައްގުތަކަށް ރައްކާތެރި ކުރުމަށް ގޮވާލާ ބޭއްވި އެއްވުމެއް.--

ލަކްޝަދީބް ރައްޔިތުންގެ ހައްގުތަކަށް ރައްކާތެރި ކުރުމަށް ގޮވާލާ ބޭއްވި އެއްވުމެއް.--

އިންޑިއާގެ ލަކްޝަދީބް ރަށްތަކަށް ތަރައްގީ ގެންނަން ކަމަށް ބުނެ، ރައްޔިތުން ނުރުހޭ ގިނަ ގަވާއިދުތަކެއް ތަންފީޒު ކުރަން މައި ސަރުކާރުން މަސައްކަތް ކުރުމުން އަމާޒުވި ފާޑުކިޔުމާއެކު، ހޯމް މިނިސްޓަރު އަމިތު ޝާހް ވިދާޅުވީ ރައްޔިތުން ހިތްހަމަނުޖެހޭ އެއްވެސް ނިންމުމެއް ތަންފީޒު ނުކުރާނެ ކަމަށެވެ.

ލަކްޝަދީބްގެ އިދާރީ ވެރިޔާގެ ގޮތުގައި މިދިޔަ ޑިސެމްބަރު މަހު ހަމަޖެއްސި ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) އަށް ނިސްބަތްވާ ޕްރަފުލް ހޯދާ ޕަޓޭލް ހުށަހެޅުއްވި އާ ގަވާއިދުތަކާ މެދު ހިތްހަމަނުޖެހި، ލަކްޝަދީބްގައި ދިރިއުޅޭ ބީޖޭޕީގެ ގިނަ ވެރިންތަކެއް ވެސް ވަނީ މަގާމުތަކުން އިސްތިއުފާ ދެއްވާފަ އެވެ.

ލަކްޝަދީބުގެ ޕާލިމެންޓު މެމްބަރު މުހައްމަދު ފައިޒަލް ވަނީ ޕަޓޭލް މަގާމުން ވަކި ކުރުމަށް ހޯމް މިނިސްޓަރުގެ ކިބައިން އެދިވަޑައިގެންފަ އެވެ. ލަކްޝަދީބުގެ ރައްޔިތުން ވެސް ޑިމާންޑު ކުރަނީ ޕަޓޭލް މަގާމުން ދުރު ކުރުމަށެވެ. ރައްޔިތުން ނުރުހޭ ކަމެއް ނުކުރާނެ ކަމުގެ ޔަގީންކަން ހޯމް މިނިސްޓަރު ދެއްވި ނަމަވެސް، ރައްޔިތުން ތިބީ ނުތަނަވަސްކަމެއްގެ ތެރޭގަ އެވެ.

އިންޑިއާގެ ހުރިހާ ސްޓޭޓެއްގައި ކޮވިޑުގެ ބަލިމަޑުކަން ހަލުވިކަމާއެކު ފެތުރެމުން ދިޔައިރު، ބަލީގެ އަސަރު ނުކުރާ ހަމައެކަނި ސަރަހައްދަކަށް އޮތީ އެ ގައުމުގެ ހުޅަނގު ދެކުނު އައްސޭރިފަށާ 200 ކިލޯމީޓަރު ދުރުގައި އޮންނަ ލަކްޝަދީބުގެ ރަށްތަކެވެ.

ޖުމްލަ 36 ރަށުގެ މައްޗަށް އެކުލެވޭ ލަކްޝަދީބުގެ މީހުން ދިރިއުޅޭ 10 ރަށުން އެންމެ ކޭސްއެއް ވެސް ނުފެނި، އާއްމުން ދިރިއުޅުމައިގެން ކުރިއަށް ދިޔެއީ އެއްވެސް ހާސްކަމެއް ނެތި އެވެ. އެ ރަށްތައް ކޮވިޑުން ސަލާމަތް ކުރުމަށް ރައްކާތެރިކަމުގެ ފިޔަވަޅުތަކެއް ދިޔެއީ އަޅަމުންނެވެ. އެގޮތުން ލަކްޝަދީބަށް އަންނަ މީހުން ބައްޔަށް ޓެސްޓުކޮށް 14 ދުވަހުގެ ކަރަންޓީނަށް ދާން ޖެހުނެވެ.

އެކަމަކު މިއަދު ވަނީ މަންޒަރު ބަދަލުވެފަ އެވެ. އެންމެ 65،000 މީހުންގެ އާބާދީއެއް އޮންނަ ލަކްޝަދީބުގައި މޭ 30 ވަނަ ދުވަހާ ހަމައަށް 7000 އަށް ވުރެ ގިނަ މީހުން ކޮވިޑަށް ޕޮޒިޓިވްވެއްޖެ އެވެ. މުޅި ލަކްޝަދީބުގައި ހުންނަނީ ކުޑަކުޑަ ތިން ހޮސްޕިޓަލެވެ. ސިއްހީ ފަރުވާއަށް ބޭނުންވާ އެންމެ އާދައިގެ ބައެއް ހިދުމަތްތައް ވެސް އެ ރަށްތަކުން ނުލިބެ އެވެ. ބަލިވާ މީހުން ޖެހެނީ ފެރީގައި ކެރަލާއަށް ދަތުރު ކުރާށެވެ.

ލަކްޝަދީބުގައި އޮތް ހަމަޖެހުމަށް ލޮޅުން އެރީ ޑިސެމްބަރު 2020 ގައި ލަކްޝަދީބުގެ އިދާރީ ވެރިޔަކަށް ސިޔާދީ ބޭފުޅަކު އައްޔަނު ކުރަން މައި ސަރުކާރުން ނިންމި ހިސާބުންނެވެ. މިއީ 1956 ގައި ލަކްޝަދީބު އުފެދުނު ފަހުން ސިޔާސީ މީހަކު އެ މަގާމަށް އައްޔަނު ކުރި ފުރަތަމަ ފަހަރެވެ.

ޕްރަފުލް ހޯދާ ޕަޓޭލްއަކީ ކާކު؟

ޕްރަފުލް ހޯދާ ޕަޓޭލްއަކީ ބޮޑު ވަޒީރު ނަރެންދްރަ މޯދީ އާއި ހޯމް މިނިސްޓަރު އަމިތު ޝާހް ވަރަށް އިތުބާރު ކުރައްވާ ބޭފުޅެކެވެ. ލަކްޝަދީބުގެ އިދާރީ ވެރިޔަކަށް އޭނާ އައްޔަނު ކުރީ ސީދާ މައި ސަރުކާރުންނެވެ.

ގުޖަރާތުގެ ޗީފް މިނިސްޓަރަކަށް މޯދީ ހުންނެވިއިރު، އޭރު އެ ސްޓޭޓުގެ ހޯމް މިނިސްޓަރަކަށް ހުންނެވި އަމިތު ޝާހުގެ މައްޗަށް ކުރެވުނު ދައުވާއަކާ ގުޅިގެން ޖަލަށް ލުމާއެކު، ދެން ހޯމް މިނިސްޓަރަކަށް މޯދީ އައްޔަނު ކުރެއްވީ ޕަޓޭލް އެވެ.

ޕްރަފުލް ހޯދާ ޕަޓޭލް.--
ޕްރަފުލް ހޯދާ ޕަޓޭލް.--

ޕްރަފުލް ހޯދާ ޕަޓޭލް.

ނަމަވެސް މީގެ ކުރިން މީޑިއާގެ ސަމާލުކަން އޭނާއަށް ލިބިފައެއް ނުވެ އެވެ. މިހާރު އޭނާގެ ވާހަކަތައް މީޑިއާގެ ފަލަ ސުރުހީއަށް އަރަން ފަށާފައި މި ވަނީ ހުދުމުހްތާރު ލީޑަރެއްގެ ސިފަތަކާއެކު އެއްވެސް މަޝްވަރާ ކުރުމެއް ނެތި، ލަކްޝަދީބުގެ ރައްޔިތުންގެ ދިރިއުޅުމަށް ބޮޑެތި ނޭދެވޭ ބަދަލުތަކެއް ގެނުވާނެ ފަދަ ގަވާއިދުތަކެއް ތަންފީޒު ކުރަން މަސައްކަތް ކުރައްވާތީ އެވެ.

ލަކްޝަދީބުގެ ރައްޔިތުން ނުރުހުނީ ޕަޓޭލްގެ ކޮން ނިންމުންތަކަކާ މެދު؟

ލަކްޝަދީބުގެ އިދާރީ ވެރިޔާގެ މަގާމު ލިބުމާއެކު އެންމެ ފުރަތަމަ އޭނާ ކުރި ކަމަކީ ވަކި ރަށްތައް ނުވަތަ އަވަށްތަކުގެ ކައުންސިލަށް ލިބިދޭ ބާރުތައް އޭނާގެ ދަށަށް ގެންދިޔުމެވެ. އޭގެ ފަހުން މުހިއްމު ޑިޕާޓްމަންޓުތައް ވެސް އޭނާގެ ބާރުގެ ދަށަށް ގެންދިޔަ އެވެ. އޭގެ ތެރޭގައި ސިއްހަތާއި، ދަނޑުވެރިން، ތައުލީމް އަދި މަސްވެރިކަމާ ގުޅޭ ޑިޕާޓްމަންޓު ހިމެނެ އެވެ.

ކޮވިޑުގެ ބަލިމަޑުކަން ލަކްޝަދީބަށް ނުފޯރާ އޮތީ އެ ތަނުގެ ވެރިން އެޅި ހަރުދަނާ ފިޔަވަޅުތަކުގެ ސަބަބުންނެވެ. ނަމަވެސް ޕަޓޭލްއަށް މަގާމު ލިބުމާއެކު ކޮޗިންއިން ލަކްޝަދީބަށް އަންނަ މީހުން 14 ދުވަހަށް ކަރަންޓީން ވާން ނުޖެހޭ ގޮތަށް ހެދި އެވެ. އެއާއެކު އެ ރަށްތަކުގައި ބަލި ފެތުރި މިހާރު ވެސް 2000 އަށް ވުރެ ގިނަ އެކްޓިވް ކޭސް އެބަ އުޅެ އެވެ.

އޭގެ އިތުރުން ވެސް ލަކްޝަދީބު ރައްޔިތުންގެ ނުރުހުމުގައި ގިނަ ކަންކަން ތަންފީޒު ކުރަން އޭނާ ބޭނުންވެ އެވެ. ތިރީގައި އެ ވަނީ ތަންފީޒު ކުރަން އެދި، މައި ސަރުކާރުގެ ރުހުން ހޯދަން ފޮނުވާފައިވާ ބައެއް ކަންކަމެވެ.

ބިންވެރިކަން ނިގުޅައިގަތުން

ހުށަހެޅި ކަންކަމުގެ ތެރެއިން އެންމެ ބޮޑު ހިތްހަމަނުޖެހުމެއް އުފެދިފައި ވަނީ ލަކްޝަދީބް ޑެވެލޮޕްމަންޓް އޮތޯރިޓީ ރެގިއުލޭޝަން ނަމުގައި ހަދާފައިވާ ގަވާއިދާ މެދު އެވެ. އެ ގަވާއިދުގެ ދަށުން ލަކްޝަދީބުގެ އިދާރީ ވެރިންނަށް ރައްޔިތުންގެ ހުއްދަ ނެތި ބިން އަތުލެވޭނެ އެވެ. އެއީ ހައިވޭ އާއި ރެއިލްވޭ އަދި އެހެން ޕްރޮޖެކްޓުތައް ހިންގުމަށެވެ.

އެގޮތުން 15 މީޓަރު ފުޅާ މަގުތައް ހަދަން ރާވާފައި ވާއިރު، ލަކްޝަދީޕަށް ހައިވޭތައް ބޭނުން ނުވާ ކަމަށާއި އެފަދަ ޕްރޮޖެކްޓުތަކުގެ ސަބަބުން އިކޮލޮޖީއަށް އަސަރު ކުރާނެ ކަމަށް ރައްޔިތުން ދެކެ އެވެ. ލަކްޝަދީބުގެ އެންމެ ބޮޑު ރަށް، އެންޑްރޮތުގެ ބޮޑުމިނަކީ 4.9 އަކަ ކިލޯމީޓަރެވެ.

ގެރި މަސް މަނާ ކުރުމާއި ރާ ހުއްދަ ކުރުން

އެނިމަލް ޕްރިޒަވޭޝަން ގަވާއިދުގެ ނަމުގައި ހެދި ގަވާއިދުގެ ދަށުން ގެރި މަސް ވިއްކުމާއި، ސަޕްލައި ކުރުމާއި ގަތުން ލަކްޝަދީބުގައި މަނާ ވާނެ އެވެ. އެ ގަވާއިދާ ހިލާފުވެއްޖެ ނަމަ 10 އަހަރަށް ޖަލަށް ލެވޭނެ އެވެ.

އޭގެ އިތުރުން ރާ ވިއްކާ ބާތަކާއި ފިހާރަތައް އަލުން ހުޅުވަން ވެސް އޭނާ ވަނީ ހުށަހަޅާފަ އެވެ. އެގޮތަށް ހުށަހެޅީ ފަތުރުވެރިކަން ކުރިއެރުވުމުގެ ނަމުގަ އެވެ. ލަކްޝަދީބުގައި މީހުން ދިރިއުޅޭ އެއްވެސް ރަށެއްގައި ރާ ވިއްކާ ބޭނުން ކުރުން މަނަ އެވެ. ނަމަވެސް މީހުން ދިރިނޫޅޭ ބަންގަރަމް ރަށުގައި ހިންގާ ރިސޯޓުގައި މިހާރު ވެސް ރާ ހުއްދަ އެވެ.

ޝަރީއަތް ކުރުމެއް ނެތި ބަންދުގައި ބެހެއްޓުން

ޕްރިވެންޝަން އޮފް އެންޓި ސޯޝަލް އެކްޓިވިޓީޒް ރެގިއުލޭޝަންގެ ދަށުން އެއްވެސް ޝަރީއަތެއް ހިންގުމެއް ނެތި އެއް އަހަރުގެ މުއްދަތަށް މީހުން ބަންދުކޮށްފައި ބެހެއްޓޭނެ އެވެ. އެ މުއްދަތު އިތުރު ކުރުމުގެ ބާރު ވެސް ހިމަނާފައި ވެ އެވެ. ލަކްޝަދީބަކީ މުޅި އިންޑިއާގައި ވެސް އެންމެ ކުށް މަދު އެއް ސަރަހައްދަށް ވާއިރު އެފަދަ ގަވާއިދެއް ހެދުމުގެ މަގްސަދާ މެދު އާއްމުން ސުވާލު އުފައްދަ އެވެ.

މި ބަދަލުތައް ގެންނަން ޕަޓޭލް ބޭނުން ވަނީ ކީއްވެ؟

އޭނާ ބުނެފައި ވަނީ ލަކްޝަދީބަކީ ރާއްޖެ ފަދަ މަގްބޫލް ފަތުރުވެރިންގެ މަންޒިލަކަށް ހަދަން ބޭނުންވާ ކަމަށެވެ. އޭނާ ބޭނުންވަނީ ރާއްޖެއާ ވާދަވެރި މަންޒިލެއްގެ ގޮތުގައި އެތަން ތަރައްގީ ކުރުމަށެވެ. ނަމަވެސް އެއީ ހުސް ބަހަނާގެ ގޮތުގައި ލަކްޝަދީބުގެ ރައްޔިތުން ގަބޫލު ކުރަނީ ސަބަބުތަކެއް ނެތިއެއް ނޫނެވެ.

ފަތުރުވެރިކަން ކުރިއެރުވުމުގެ މަގްސަދުގައި ގެރި މަސް މަނާ ކުރަނީ ކީއްވެތޯ އާއި ދެ ދަރިންނަށް ވުރެ ގިނަ ދަރިން ތިބޭ މީހުން ކައުންސިލަށް ވާދަނުކުރެވެނީ ކީއްވެތޯ އެ މީހުން ސުވާލު އުފައްދަ އެވެ. އެމީހުން ދެކޭ ގޮތުގައި ޕަޓޭލް މަސައްކަތް ކުރައްވަނީ ހިންދޫންގެ ބީޖޭޕީގެ ކަނާއަތު ފިޔައިގެ ވިސްނުންތައް 97 ޕަސެންޓު މުސްލިމުން ދިރިއުޅޭ ލަކްޝަދީބުގައި ހިންގުމަށެވެ.

ކޮމެންޓް

ފަހުގެ ޚަބަރު

ސްޕޭސްއެކްސްއަށް ފަންޑިން ހުއްޓުވުމުގެ އިންޒާރު

ޔޫކްރެއިންގައި ބޭނުންކުރާ ސްޓާޝީލްޑްގެ ޚިދުމަތަށް ބަދަލުތަކެއް އައި މައްސަލައިގައި، ސްޕޭސްއެކްސްއަށް ދޭ ފަންޑިން ހުއްޓާލާނެ ކަމުގެ އިންޒާރު އެމެރިކާގެ ކޮންގްރެސް މެންބަރު ޖިމް ހައިމްސް ދެއްވައިފިއެވެ. އޭނާ އެދިވަޑައިގަންނަވަނީ މި ބަދަލުތަކަކީ ކުންފުނިން އަމިއްލައަށް ނިންމި ނިންމުމެއްތޯ ނުވަތަ ސަރުކާރުގެ އެންގުމަކަށް ކުރި ކަމެއްތޯ ސާފުކޮށްދިނުމަށެވެ. ސަރުކާރުގެ ފުރިހަމަ ކޮންޓްރޯލް ނެތް ނިޒާމުތަކަށް ފައިސާ ދޫނުކުރާނެ ކަމަށް ވިދާޅުވެ، މިކަމާ ގުޅޭގޮތުން އީލޮން މަސްކާ ބައްދަލުކުރުމަށްވެސް ހައިމްސް ވަނީ އެދިވަޑައިގެންފައެވެ.

ރަޝިޔާ އާއެކު މަޝްވަރާއަށް ތައްޔާރު: ޔޫރަޕުގެ ލީޑަރުން

ޔޫކްރެއިން ހަނގުރާމަ ހުއްޓާލުމަށް ރަޝިޔާއާއެކު މަޝްވަރާކުރުމަށް ތައްޔާރަށް ތިބިކަން ޔޫރަޕުގެ ލީޑަރުން ހާމަކޮށްފައިވާއިރު، މި މަޝްވަރާތަކުގައި ވިލާތުގެ ބައިވެރިވުން ހިމެނުމަށް އެމެރިކާއިން ދަނީ ބާރުއަޅަމުންނެވެ. ރަޝިޔާގެ ރައީސް ޕޫޓިން ވަނީ ވިލާތުގެ ގައުމުތަކުގެ ސިޔާސަތުތައް ސާފުކުރުމަށްޓަކައި މޮސްކޯއަށް ޒިޔާރަތްކުރުމަށް އެ ގައުމުތަކަށް ދައުވަތު ދެއްވާފައެވެ.

އެންތްރޮޕިކް 1.76 ޓްރިލިއަން ޑޮލަރުގެ ކުންފުންޏަކަށް

އޭއައި ކުންފުނި އެންތްރޮޕިކް ހިއްސާގެ ބާޒާރަށް ނުކުތުމާއެކު، އެ ކުންފުނީގެ އަގު 1.76 ޓްރިލިއަން ޑޮލަރަށް އަރައި ދުނިޔޭގެ އެންމެ އަގުބޮޑު ކުންފުނިތަކުގެ ތެރޭގައި ހިމެނިއްޖެއެވެ. ހިއްސާގެ އަގަށް އައި ކުރިއެރުމާއެކު އޭއައި ދާއިރާއަށް އޮތް ބޮޑު ޝައުގުވެރިކަން ހާމަވީ ނަމަވެސް، މިއީ އިގްތިސާދީ "ބަބުލް" އެއްގެ ގޮތުގައި ބައެއް މާހިރުން ސިފަކުރެއެވެ. ކްލޯޑް ޗެޓްބޮޓް އުފެއްދި މި ކުންފުނިން އެންމެ ބޮޑު އިސްކަމެއް ދެނީ އޭއައިގެ ރައްކާތެރިކަމަށެވެ.

ވެން ގޯގެ ކުރެހުމެއް 190 މިލިއަން ޑޮލަރަށް ވިއްކާލައިފި

ވިންސެންޓް ވެން ގޯގެ "ޗެސްޓްނަޓް ޓްރީޒް އިން ބްލޮސަމް" ކުރެހުން 190.4 މިލިއަން ޑޮލަރަށް ވިއްކާލައި، ދުނިޔޭގެ އާ ރެކޯޑެއް ގާއިމުކޮށްފިއެވެ. މި ކުރެހުން ނީލަމުގައި ވިއްކާލާފައިވަނީ، ނާޒީންގެ ދުވަސްވަރު މަޖުބޫރުވެގެން މި ކުރެހުން ވިއްކާލަން ޖެހުނު އާއިލާއާއި މިހާރުގެ މިލްކުވެރިންގެ މެދުގައި އުފެދުނު ގާނޫނީ މައްސަލައަށް ހައްލެއް ހޯދުމަށްފަހުގައެވެ.

ރޮހިންޔާ ގަތުލުއާންމުގައި މިޔަންމާ ކުށްވެރިވެއްޖެ

މި މައްސަލައިގައި ދަ ގެމްބިއާއަށް ތާއީދުކޮށް، ރާއްޖެއިން ވަނީ ބައިނަލްއަގުވާމީ ވަކީލުންނާއެކު ކޯޓުގައި މިޔަންމާއާ ދެކޮޅަށް ވަކާލާތުކޮށް އިސް ދައުރެއް އަދާކޮށްފަ. ކޯޓުގެ ހުކުމުގައި މިޔަންމާ ކުށްވެރިކޮށް، ގެއްލުމުގެ ބަދަލު ދިނުމުގެ ޕްރޮގްރާމެއް އެކުލަވާލުމަށް ވެސް ވަނީ އަމުރުކޮށްފަ.

ޕެޓިންސަން ހަތްވަނަ ބޮންޑަށް ހޮވުމުގައި ބޭޒޯސްގެ ބޮޑު ދައުރެއް

އާ ޖޭމްސް ބޮންޑުގެ ރޯލަށް އެކްޓަރު ރޮބަޓް ޕެޓިންސަން ހަމަޖެއްސުމުގައި އެމެޒޯންގެ ޗެއާމަން ޖެފް ބޭޒޯސް މުހިންމު ދައުރެއް އަދާކޮށްފައިވާކަން އޭނާ ހާމަކުރައްވައިފިއެވެ. ޑެނިއަލް ކްރެއިގްގެ ފަހުން ހަތްވަނަ ބޮންޑުގެ ގޮތުގައި ޕެޓިންސަން ފެނިގެންދާ 26 ވަނަ ފިލްމު، ޑެނިސް ވިލެނޫވްގެ ޑައިރެކްޝަނުގެ ދަށުން 2028 ވަނަ އަހަރު ރިލީޒްކުރުމަށް ވަނީ ތާވަލުކޮށްފައެވެ.

އެންތްރޮޕިކް އުފެއްދި 7 ބާނީން ބިލިއަނަރުންގެ ލިސްޓަށް

އޯޕަން އޭއައި އިން ވަކިވި ހަތް މީހަކު 2021 ވަނަ އަހަރު އުފެއްދި އެންތްރޮޕިކް ކުންފުނި ހިއްސާގެ ބާޒާރަށް ނެރުމާއެކު، އެ ކުންފުނީގެ ބާނީން ބިލިއަނަރުންގެ ލިސްޓަށް އެރުމަށް ވަނީ ތައްޔާރުވެފައެވެ. އޭއައިގެ ރައްކާތެރިކަމަށް އިސްކަންދޭ މި ޒުވާން ޓީމުގެ ކުންފުނިން އުފެއްދި "ކްލޯޑް" އާއެކު، އެންތްރޮޕިކް މިހާރު ވަނީ ޓެކްނޮލޮޖީގެ ދާއިރާގެ ބޮޑު ބާރަކަށް ބަދަލުވެފައެވެ.

Newsletter

Get the latest news delivered straight to your inbox