ޓްރާންސްޕޯޓް މިނިސްޓްރީން މާލެ ސިޓީ ކައުންސިލަށް ގަރާޖު ސިޓީ ދޫކުރާ ގޮތަށް ބަދަލުކުރަން ނިންމި ނަމަވެސް، ދީފައިވާ ތާރީހަށް އެކަން ފޭށޭނެ ކަމާމެދު ސުވާލު އުފެދިއްޖެ އެވެ.
ޓްރާންސްޕޯޓް އޮތޯރިޓީން ގަރާޖު ހުއްދަ ދޫކުރުމުގެ ކަންކަން ސިޓީ ކައުންސިލާ މަތިކޮށް ކުރި އިއުލާނުގައި އޮތް ތާރީހަކީ އޮގަސްޓު އެއް ވަނަ ދުވަހެވެ.
އެ އިއުލާނުގައި ވަނީ އެ ތާރީހުން ފެށިގެން އުޅަނދު ބާއްވާ ގަރާޖް ޗެކް ކުރުމާއި ގަރާޖާއި ގުޅޭ ކަންކަމުގައި ވެވޭ އެއްބަސްވުންތަކުގެ ސައްހަކަން ކަށަވަރު ކުރުމުގެ މަސައްކަތް ކުރާނީ ސިޓީ ކައުންސިލުން ކަމަށެވެ.
މާލޭގެ މޭޔަރު ޑރ. މުހައްމަދު މުއިއްޒު "އަދަދު" އަށް ދެއްވި އިންޓަވިއުއެއްގައި ވިދާޅުވީ ޖަރާޖު ސިޓީ ފެށުމަށް އެކަށީގެންވާ މުވައްޒަފުން ނެތް ކަމަށާއި މުވައްޒަފުން ހަމަޖެއްސުމަށް ބަޖެޓެއް ހަމަޖައްސައި ދިނުމަށް ފިނޭންސް މިނިސްޓްރީގައި އެދިފައިވާނެ ކަމަށެވެ.
"ސަރުކާރު ހުޅުވޭ ދުވަހަކީ [އެކެއް އޮގަސްޓަކީ] އެ ބޭފުޅުން އިއުލާން ކޮށްފަ އޮތް ގޮތުން ވިއްޔާ ހިދުމަތް ފެށޭނެ ދުވަސް. އެބޭފުޅުން އަޅުގަނޑުމެންނަށް ބަޖެޓެއް ދެއްވައިފިއްޔާ ވަރަށް އަވަހަށް މުވައްޒަފުން ނަގާ ފެށޭނެ. އެކެއް އޮގަސްޓަށް އެކަން ވާނެ ކަމެއް އަޅުގަނޑަކަށް ނޭނގޭ،" މުއިއްޒު ވިދާޅުވި އެވެ.
މުއިއްޒު ވިދާޅުވީ ޓްރާންސްޕޯޓުން އެ ނިންމުން ނިންމާ މާލެ ސިޓީއާ ހަވާލު ކުރުމަށް ފޮނުވި ސިޓީއަށް ފަހުވެސް އެ އިދާރާއަށް ދެ ސިޓީއެއް ފޮނުވާ ބޭނުންވާ މައުލޫމާތުތައް ލިބޭނެ ގޮތް ހަމަޖައްސާ ދިނުމަށް ސިޓީ ކައުންސިލުން އެދިފައިވާނެ ކަމަށެވެ.
އެގޮތުން ގަރާޖު ހުއްދަ ދިނުމާ ބެހޭ ކަންކަން މިހާތަނަށް އެ އޮތޯރިޓީގަ ކޮށްފަ ހުރި މަސައްކަތްތަކާއި ގަރާޖު ތަކާ ބެހޭ ހުރިހާ ޑޭޓާ ބޭސްތަކެއް ދިނުމަށް އެދިފައިވާ ނަމަވެސް މިހާތަނަށް އެއްވެސް ޖަވާބެއް ލިބިފައި ނުވާ ކަމަށް މުއިއްޒު ވިދާޅުވި އެވެ.
"މިސާލަކަށް ގަރާޖެއް ދޭއިރު އެ ގަރާޖަކީ އެތަނަށް އެކަށީގެންވާ ތަނެއްތޯ ނިންމާނީ ކިހިނެއްތޯއޭ އަޅުގަނޑުމެންނަށް އެ މައުލޫމާތު ނުލިބެންޏާ. މީގެ ކުރީގަ އޮވެދާނެ ޓްރާންސްޕޯޓުގަ އެ ގަރާޖަށް އެހެން ކާރެއް ރަޖިސްޓްރީ ކޮށްފަ. އެ މައުލޫމާތު ނޭނގި އެ ތަނުގަ ޖާގަ އޮތްތޯ އަޅުގަނޑުމެންނަކަށް ނުނިންމޭން،" މުއިއްޒު ވިދާޅުވި އެވެ.
އެގޮތަށް އެދިފައިވާ ސަބަބަކީ މިހާރު ގަރާޖު ސިޓީ ގެ ކަންކަން ކުރިއަށް ގެންދިއުމަށް އޮންނަ ގޮތުން އާންމު މީހާއަށް އެކަމުން އުނދަގޫ ތަކެއް ކުރިމަތި ވާނެތީ ކަމަށެވެ. އެއީ ގަރާޖު ރަޖިސްޓްރީ ކުރުމަށް މާލެ ސިޓީ ކައުންސިލުން ހުއްދައެއް ހޯދުމަށްފަހު ޓްރާންސްޕޯޓަށް އެހެން ހުއްދަތައް ހޯދަން ދާން ޖެހޭތީ ކަމަށެވެ.
"އެކަން ހައްލުކޮށް ރަޖިސްޓްރީ ކުރުމާ އެކު ސިޓީ ކައުންސިލްގެ ދަށަށް ބަދަލުކޮށްދޭށޭ ނޫނީ ޓްރާންސްޕޯޓަށް ހުރިހާ ކަމެއް ބަދަލު ކުރާށޭ،" މުއިއްޒު ވިދާޅުވި އެވެ.
ނަމަވެސް އޭގެ ތެރެއިން އެއްވެސް ކަމަކަށް ޓްރާންސްޕޯޓުން ޖަވާބެއް ލިބިފައި ނުވާ ކަމަށް އޭނާ ވިދާޅުވި އެވެ.
މުއިއްޒު ވިދާޅުވީ އެ މަސައްކަތް ކުރަން މާލެ ސިޓީ ކައުންސިލުން ތައްޔާރަށް އޮތް ކަމަށާއި ނަމަވެސް ޓްރާންސްޕޯޓުން އެކަން ނިންމާފައި ވަނީ ސިޓީ ކައުންސިލާ އެއްވެސް މަޝްވަރާއެއް ކުރުމެއް ނެތި ކަމަށެވެ.
ސިޓީ ކައުންސިލްގައިވެސް އެކަމާ ގުޅޭ މަޝްވަރާތައް ކުރަމުންދާ ކަމަށާއި އެ ކައުންސިލްގެ ވެސް އެދުމަކީ ވީހާވެސް އަހަވަކަށް އެ ހިދުމަތް ރައްޔިތުންނަށް ދޭން ފެށުން ކަމަށް ވެސް މުއިއްޒު ވިދާޅުވި އެވެ.
ނަމަވެސް މުއިއްޒު ވިދާޅުވީ ސިޓީ ކައުންސިލުން އެ ހިދުމަތް ފެށުމަށް ބޭނުންވާ މައުލޫމާތާއި ބޭނުންވާ މުވައްޒަފުން ނެގުމަށް ބަޖެޓެއް ހަމަޖެހިފައި ނުވާތީ އެކަން ފެށޭނެ ތާރީހެއް ދަންނަވަން ނޭނގޭ ކަމަށެވެ.
ގަރާޖު ސިޓީ ދޫކުރަން ފަށަން މިހާރު އިއުލާންކޮށްފައިވާ ތާރީހު ފަސްކޮށްދޭން ވެސް ޓްރާންސްޕޯޓް އޮތޯރިޓީގައި މާލެ ސިޓީ ކައުންސިލުން ވަނީ އެދިފަ އެވެ.
