ލަންޑަން (މެއި 31) - ޔޫރޯ ފުޓްބޯޅަ މުބާރާތުގައި ބީބީސީގެ އެނަލިސްޓެއްގެ ގޮތުގައި މަސައްކަތްކުރަން ނިންމައިގެން ހުރި ފްރާންސްގެ ފުޓްބޯޅަ ލެޖެންޑް ތިއަރީ އޮންރީ އަލުން ބެލްޖިއަމް ގައުމީ ޓީމުގެ އެސިސްޓަންޓަކަށް މަސައްކަތް ކުރަން ލިބުނު ފުރުސަތުގެ ބޭނުން ހިފަން ނިންމައިފި އެވެ.
އޮންރީ ބެލްޖިއަމް އެސިސްޓަންޓް ކޯޗުކަމާ ހަވާލުވީ 2016 ވަަނަ އަހަރު އެވެ. އޭނާ ވަނީ ބެލްޖިއަމުން 2018 ވަނަ އަހަރު ރަޝިއާގައި ބޭއްވި ފީފާ ވޯލްޑް ކަޕްގެ ތިން ވަނަ ހޯދި ޓީމުގައި މުހިއްމު މަސައްކަތްތަކެއް ކޮށްފަ އެވެ. އަލުން އޮންރީ ހަވާލުވިކަން އިއުލާނުު ކުރަން ބެލްޖިއަމް ޓީމުން ކުރި ޓްވީޓްގައި ބުނެފައިވަނީ "ނުނިމި ހުރި މަސައްކަތެއް ފުރިހަމަަ ކުރަން އޮންރީ އަލުން ޓީމާ ގުޅުމުން" މަރުހަބާ ކިޔާ ކަމަށެވެ.
ބީބީސީ އިން ނެރުނު ބަޔާނެއް މެދުވެރިކޮށް އޮންރީ ބުނީ ބީބީސީ ޓީމާ އެކު ޔޫރޯގައި ރަނގަޅު މަސައްކަތްތަކެއް ކުރަން ބޭނުންވި ނަމަވެސް އެކަން މިހާރު ކުރެވެން ނެތްކަން ހިތާމައާ އެކު އިއުލާނުކުރަން ޖެހިފައިވާ ކަމަށެވެ.
"ބީބީސީން ދިން ފުރުސަތަށް ވަރަށް ބޮޑަށް ޝުކުރު އަދާކުރަން. އެކަމަކު ބެލްޖިއަމް އެސިސްޓަންޓް ކޯޗަކަށްވާން އަލުން ލިބުމަކީ ދޫކޮށްލެވޭ ވަރަށް ވުރެ ބޮޑު ފުރުސަތެއް،" އޮންރީ ބުންޏެވެ.
ބެލްޖިއަމް ގައުމީ ޓީމާ އޮންރީ ހަވާލުވީ މުއްދަތެއް އިއުލާން ކޮށްފައިނުވެ އެވެ. އޮންރީ ވަނީ 2018 ވަނަ އަހަރުގެ ވޯލްޑް ކަޕަށް ފަހު ބެލްޖިއަމްގެ ވަޒީފާ ދޫކޮށްލި ފަހުން ދެ ޓީމަކަށް ކޯޗުކަން ކޮށްދީފަ އެވެ. އެއީ ފްރާންސްގެ މޮނާކޯ އާއި އެމެރިކާ ލީގުގައި ކުޅޭ މޮންޓްރެއާލް އިމްޕެކްޓަށެވެ. މޮންޓްރެއާލުން އޮންރީ ވަކިވީ މިދިޔަ ފެބްރުއަރީ މަހު އެވެ. އެއީ ލަންޑަނުގައި އުޅޭ އޮންރީގެ އާއިލާއާ އެކު ވަގުތު ހޭދަކުރަން ބޭނުންވާތީ އެވެ.
ރޮބާޓޯ މާޓިނޭޒްގެ ކޯޗުކަމުގައި ކުޅޭ ބެލްޖިއަމް މި ފަހަރު ޔޫރޯގައި ވާދަކުރަނީ ރަޝިއާ، ފިންލެންޑް، ޑެންމާކާ އެކު ގްރޫޕް ބީގަ އެވެ. ބެލްޖިއަމްގެ ފުރަތަަމަ މެޗު ކުޅޭނީ ޖޫން މަހު 12 ވަނަ ދުވަހު ރަޝިއާއާ ދެކޮޅަށެވެ.
މޮނާކޯ، ޔުވެންޓަސް، އާސެނަލް އަދި ބާސެލޯނާ އަށް ކުޅުނު އޮންރީ ކުޅުން ހުއްޓާލީ އެމްއެލްއެސްގެ ނިއުޔޯކް ރެޑްބުލްސް އަށް ކުޅުމަށް ފަހު 2014 ވަނަ އަހަރު އެވެ. ކުޅުން ހުއްޓާލުމަށް ފަހު އޮންރީ މަސައްކަތް ކުރަމުން އައީ މަޝްހޫރު ކުޅިވަރު މީޑިއާ ސްކައި ސްޕޯޓްސްގެ ފުޓްބޯޅަ އެނަލިސްޓެއްގެ ގޮތުގައި އަދި އާސެނަލްގެ 18 އަހަރުން ދަށުގެ އެކަޑަމީ ކޯޗެއްގެ ގޮތުގަ އެވެ. އެހެން ނަމަވެސް އާސެނަލްގެ އޭރުގެ ކޯޗު އާސެން ވެންގާއާ މައްސަލަ ޖެހިގެން އޮންރީ ވަނީ އާސެނަލްގެ އެކަޑަމީގެ ކޯޗުކަން ދޫކޮށްލައިފަ އެވެ.
