ސްރީ ލަންކާ ކައިރިން ރޯވެ އަނދަން ފެށި މުދާ އުފުލާ ބޯޓަކުން ތެލާއި ކުނި ބޭރުވެ އެ ގައުމުގެ ހުޅަނގުގެ ގޮނޑުދޮށްތައް ތަގައްޔަރުވި މައްސަަލައިގައި ޖިނާއީ ތަހުގީގެއް ފަށައިފި އެވެ.
ރިޕޯޓުތައް ބުނާ ގޮތުން މިއީ ލަންކާގެ ތާރީހުގައި ކަނޑުގެ ދިރުންތަކަށް ގެއްލުން ލިބޭ ފަދަ ގޮތަކަށް ދިމާވި އެންމެ ބޮޑު ހާދިސާ އެވެ.
ހުޅަނގު އައްސޭރިފަށުގައިވާ ނެގޯމްބޯގެ ގޮނޑުދޮށް ވަނީ ތެލާއި ކުދިކުދި ޕްލާސްޓިކުން ތަގައްޔަރުވެފަ އެވެ.
ފަތުރުވެރިކަމަށް މަގްބޫލް ނެގޯމްބޯގައި ދެ ވަނައަށް އެންމެ ގިނަ ބަޔަކު އާމްދަނީ ހޯދަނީ މަސްވެރިކަމުންނެވެ. އެހެންވެ، ބޮޑު ސަރަހައްދަކަށް ތެޔޮ ފެތުރިއްޖެ ނަމަ އާއްމުންނަށް ވަރަށް ބޮޑަށް އަސަރު ކުރާނެ އެވެ.
މި ހާދިސާއާ ގުޅިގެން އެ ސަރަހައްދުގައި މަސް ބޭނުން ވަނީ ވަގުތީ ގޮތުން މަނާކޮށްފަ އެވެ.
ސިންގަޕޫރުގައި ރަޖިސްޓްރީކޮށްފައިވާ "އެކްސް-ޕްރެސް ޕާލް" ބޯޓުގައި ހުރީ ކެމިކަލް އާއި ކޮސްމެޓިކްސް އެވެ. މި ބޯޓުގައި ރޯވެ އަނދަމުންދާތާ މިހާރު އެގާރަ ދުވަސް ވެއްޖެ އެވެ. ބޯޓުގައި ރޯވީ އިންޑިއާގެ ގުޖަރާތުން ކޮލޮމްބޯއަށް ދަތުރު ކުރަމުން ދަނިކޮށެވެ.
ބޯޓުގެ ކްރޫ މެމްބަރުންގެ ތެރޭގައި ހިމެނޭ 25 މީހުން މިދިޔަ އަންގާރަ ދުވަހު ސަލާމަތް ކުރުމަށް ފަހު މިހާރު ތިބީ ކަރަންޓީނުގަ އެވެ. ނަމަވެސް ތަހުގީގުގެ ބޭނުމަށް އަންނަ ހޯމަ ދުވަހު އެ މީހުންނާ ސުވާލު ކުރާނެ އެވެ.
މައްސަލަ ބަލައި ދިނުމަށް އެދި ފުލުހުންނަށް ހުށަހެޅީ ލަންކާގެ މެރީން އެންވާރަމަންޓް ޕްރޮޓެކްޝަން އޮތޯރިޓީންނެވެ.
މިދިޔަ ހަފްތާގައި ކަމާބެހޭ އިދާރާތަކުން ބުނީ ބޯޓުގައި ރޯވީ ނައިޓްރިކް އެސިޑު ލީކުވެގެން ކަމަށާއި ލީކުވަމުންދާކަން ބޯޓުުގެ ކްރޫއަށް މޭ 11 ވަނަ ދުވަހުން ފެށިގެން އެނގޭ ކަމަށެވެ.
"ތަގައްޔަރުވެފައިވާ ކަނޑުގެ ލޮނުފެނާއި ބޯޓުގެ ބައެއް ކުނީގެ ސާމްޕަލް މިހާރު ވާނީ ފޮރެންސިކް ތަހުލީލަށް ނަގާފައި،" ފުލުހުންގެ ތަރުޖަމާނު އަޖިތު ރޮހާނާ އޭއެފްޕީއަށް ވިދާޅުވި އެވެ.
ބޯޓުގައި ރޯވި އަލިފާންގަނޑު މިހާރު ވަނީ ކޮންޓްރޯލް ކޮށްފަ އެވެ. ނަމަވެސް އަދިވެސް އެއްކޮށް ނިއްވާލެވިފައެއް ނުވެ އެވެ.
ބޯޓުގެ ވެރި ފަރާތް ކަމުގައުވާ "އެކްސް-ޕްރެސް ފީޑާޒް" އިން ބުނީ އޭގެ ފިޔުލް ޓޭންކުތަކަށް އެއްވެސް ގެއްލުމެއް މިހާތަނަށް ލިބިފައި ނުވާ ކަމަށެވެ.
ނަމަވެސް ބޯޓުގައި ހުރި މުދަލުގެ ބޮޑު ބައިގައި ވަނީ އަނދައިހުލިވެފަ އެވެ. އޭގެ ތެރޭގައި 25 ޓަނުގެ ނައިޓްރިކް އެސިޑާއި، ސޯޑިއަމް ހައިޑްރޮކްސައިޑާއި، ލުބްރިކަންޓް އަދި އެހެން ކެމިކަލް ހިމެނެ އެވެ.
