ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާއެއް ދީފައިވަނިކޮށް ކުރީގެ ރައީސުންގެ ސެކިއުރިޓީ ބަލަހައްޓާ މޯލްޑިވްސް ނެޝަނަލް ޑިފެންސް ފޯސްގެ ސްޕެޝަލް ޕްރޮޓެކްޝަން ގުރޫޕުގެ ލީޑާޝިޕް އެއްކޮށް ބަދަލުކޮށްފި އެވެ.
މިއަދު ގެނައި ބަދަލުތަކުގެ ތެރޭގައި އެސްޕީޖީގެ ކޮމާންޑަރާއި ޑެޕިއުޓީ ކޮމާންޑަރު އަދި ފަސްޓް ސާޖަންޓުގެ މަގާމަށް އާ ބޭފުޅުން ހަމަޖެއްސުން ހިމެނެ އެވެ.
އެސްޕީޖީގެ އާ ކޮމާންޑަރަކަށް އައްޔަން ކޮށްފައިވަނީ ލެފްޓިނެންޓް ކާނަލް އަބްދުލް މުއިއްޒު މުސްތަފާ އެވެ. އޭނާ ސިފައިންގެއިން ވަކިކޮށްފައި ވަނިކޮށް އަލުން ވަޒީފާ ދީފައި ވަނީ ކޯޓުން ހުކުމްކޮށްގެނެވެ.
އެސްޕީޖީގެ ކޮމާންޑަރަކަށް ކުރިން ހުރީ ކާނަލް ނަސްރުއްﷲ އިބްރާހިމް މަޖުދީ އެވެ.
އެސްޕީޖީގެ ޑެޕިއުޓީ ކޮމާންޑަރަކަށް މިއަދު އައްޔަން ކުރީ މޭޖާ މޫސާ އަމީޒެވެ. އަދި އެސްޕީޖީގެ ފަސްޓް ސާޖެންޓްގެ ގޮތުގައި ހަމަޖައްސާފައިވަނީ ފަސްޓް ސާޖެންޓް އަބްދުﷲ ޖަމީލެވެ.
ކުރީގެ ރައީސުންގެ އިތުރުން މަޖިލީހުގެ މެމްބަރުންނާއި މިނިސްޓަރުންގެ ސެކިއުރިޓީވެސް ބަލަހައްޓަނީ އެސްޕީޖީންނެވެ.
ނަޝީދު އަވަހާރަކޮށްލަން ދިން ހަމަލާއާ ގުޅިގެން ސިފައިންގެ ސެކިއުރިޓީއާމެދު ފާޑުކިޔުން ވަނީ އަމާޒުވެފަ އެވެ. ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވި ގޮތުގެ އިންކުއަރީއެއް ހެދުމަށް މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ވެސް ގެންދަވަނީ މަސައްކަތް ކުރަމުންނެވެ.
ނަޝީދު އަވަހާރަކޮށްލަން އައިއީޑީ ގޮއްވާލީ ދިރިއުޅުއްވާ ގެކޮޅު ކައިރީގައި ހުރި ސައިކަލުގެ މަޑިދަށުގައި ބާއްވައިގެންނެވެ. ކެނެރީގެ ހުންނަ ނީލޯފަރުހިނގުމުން އެމަނިކުފާނު ހިންގަވާފައި މަޖީދީ މަގުގައި އޮތް ކާރުކޮޅާ ހަމައަށް ފޯރުމާ އެކު އައިއީޑީ ގޮއްވާލުމުން ލިބުނު ޒަހަމްތަކާ އެކު ބިންމައްޗަށް ވެއްޓިވަޑައިގަތީ އެވެ. އެކުގައި ތިއްބެވި ސެކިއުރިޓީންނަށް ވެސް އަނިޔާވި އެވެ. އެ ހަމަލާގައި ނަޝީދުގެ ފުރާނަ ސަލާމަތްވީ ކިރިޔާ އެވެ.
ބާރުގަދަ މި ހަމަލާގެ އެއްވެސް މައުލޫމާތެއް އިންޓެލްއަށް ލިބިފައިނެތްކަން ސިފައިންނާއި ފުލުހުން ވެސް ވަނީ ބުނެފަ އެވެ.
ނުރައްކާތެރި ހަމަލާގެ ތުހުމަތުގައި މިހާތަނަށް ހަތަރު މީހަކު ހައްޔަރުކޮށްފައިވާއިރު، އެމީހުން ގުޅެނީ ހަރުކަށި ފިކުރާ ކަމަށް ފުލުހުން ވަނީ ހާމަކޮށްފަ އެވެ.
