ސްރީ ލަންކާ ކައިރިން ރޯވެ އަނދަމުންދާ މުދާ އުފުލާ ބޯޓަކުން ފައިބާ ތެލާއި ކުނީގެ ސަބަބުން އެ ގައުމުގެ ހުޅަނގުގެ ގޮނޑުދޮށް ތަގައްޔަރުވެއްޖެ އެވެ.
ފަތުރުވެރިންގެ މެދުގައި މަގްބޫލް ނެގޯމްބޯގެ ގޮނޑުދޮށް ތަގައްޔަރުވެފައިވާ މަންޒަރު ފެންނަ ފޮޓޯތައް އާއްމުވުމުން އެ ގައުމުގެ ގިނަ ބަޔަކު އަންނަނީ ނުރުހުން ފާޅުކުރަމުންނެވެ.
ސިންގަޕޫރުގައި ރަޖިސްޓްރީކޮށްފައިވާ "އެކްސް-ޕްރެސް ޕާލް" ބޯޓުގައި ހުރީ ކެމިކަލް އާއި ކޮސްމެޓިކްސް އެވެ. މި ބޯޓުގައި ރޯވެ އަނދަމުންދާތާ މިހާރު އަށް ދުވަސް ވެއްޖެ އެވެ.
އަލިފާންގަނޑު ނިއްވާލަން ލަންކާގެ ކަނޑުގެ ސިފައިން މަސައްކަތް ކުރަމުން ދަނީ އިންޑިއާ ކަނޑުގެ ސިފައިންނާ ގުޅިގެންނެވެ. މި ހާދިސާގެ ސަބަބުން ތިމާވެއްޓަށް ފޫނުބެއްދޭ ވަރުގެ ގެއްލުން ލިބިދާނެތީ ކަމުގެ ތަޖުރިބާކާރުން ވެސް ދަނީ އެހީ ފޯރުކޮށްދެމުންނެވެ.
ބޯޓު އަޑިއަށް ގޮސްފި ނަމަ އެތައް ސަތޭކަ ޓަނުގެ ތެޔޮ ކަނޑަށް ލީކުވުމުގެ ފުރުސަތު އެބަ އޮތެވެ. އޭގެ ސަބަބުން ކަނޑުގެ ދިރުންތަކަށް ނޭދެވޭ އަސަރު ކުރާނެ އެވެ.
އަލިފާންގަނޑު ނިއްވާލަން ބުރަކޮށް މަސައްކަތް ކުރަމުން ދިޔަ ނަމަވެސް، ގަދަ ވަޔާއެކު ކަނޑު ގަދަވެފައި ވާތީ މަސައްކަތަށް ދަނީ ހުރަސް އެޅެމުންނެވެ.
މިހާރު އަލިފާންގަނޑު ކޮންޓްރޯލް ކުރެވިފައިވާ ކަމަށް ލަންކާގެ ޕޯޓްސް އޮތޯރިޓީގެ ޗެއާމަން ދާޔާ ރަތްނަޔަކެ ބީބީސީއަށް ވިދާޅުވި އެވެ. ނަމަވެސް އަދިވެސް ހޫނުގެ އަސަރު ކުރާތީ ބޯޓަށް އެރޭ ގޮތެއް ނުވެ އެވެ.
ކަނޑުގެ ސިފައިން ބޭނުންވަނީ ލަންކާއާ ދުރަށް ކަނޑުގެ ފުން ހިސާބަކަށް އެ ބޯޓު ގެންދިޔުމަށެވެ. ރަތްނަޔަކެ ވިދާޅުވީ އެކަން ކުރުމަށް ތަޖުރިބާކާރުންގެ ލަފާ ހޯދަން ޖެހޭނެ ކަމަށެވެ.
ނެގޯމްބޯ ބީޗުގައި ކަނޑުގެ ސިފައިން.-- ފޮޓޯ: ރޮއިޓާޒް
ފަތުރުވެރިކަމަށް މަގްބޫލް ނެގޯމްބޯގައި ދެ ވަނައަށް އެންމެ ގިނަ ބަޔަކު އާމްދަނީ ހޯދަނީ މަސްވެރިކަމުންނެވެ. އެހެންވެ. ބޮޑު ސަރަހައްދަކަށް ތެޔޮ ފެތުރިއްޖެ ނަމަ އާއްމުންނަށް ވަރަށް ބޮޑަށް އަސަރު ކުރާނެ އެވެ.
މި ހާދިސާއާ ގުޅިގެން އެ ސަރަހައްދުގައި މަސް ބޭނުން ވަނީ ވަގުތީ ގޮތުން މަނާކޮށްފަ އެވެ.
މިހާރު ވެސް ގޮނޑުދޮށަށް ކޮންމެވެސް ވަރަކަށް ތެޔޮ ފެތުރިފައި ވާއިރު، ކުދިކުދި ޕްލާސްޓިކް ޕެލެޓް ކޮޅުތައް ކުނީގެ ގޮތުގައި ވަނީ ލައްގައިފަ އެވެ. އެ ޕްލާސްޓިކްތައް ގިނަ ދުވަސް ވުމުން އިތުރަށް ކުދިކުދިވެ، ކަނޑުގެ ދިރުންތަކަށް ގެއްލުންވުމުގެ ފުރުސަތު ބޮޑު ކަމަށް ޕްރޮފެސަރ ޖާގަތު ގުނަވަރްދެނަ ބީބީސީއަށް ވިދާޅުވި އެވެ.
ލަންކާގެ މެރީން އެންވާރަމަންޓް ޕްރޮޓެކްޝަން އޮތޯރިޓީގެ ޗެއާމަން ދަރްޝަނީ ލަހަންދަޕުރާ އޭއެފްޕީއަށް ވިދާޅުވީ ބޯޓު ލަންކާ ސަރަހައްދަށް ވަތް އިރު އޭގެން ނައިޓްރިކް އެސިޑު ލީކުވަމުން ދިޔަކަން ކްރޫއަށް އެނގޭ ކަމަށާއި އަވަހަށް ފިޔަވަޅު އެޅި ނަމަ އަލިފާން ރޯނުވީސް ކަމަށެވެ.
ލަންކާ އޮފިޝަލުން ވަނީ ބޯޓުގެ ކެޕްޓަނާ ދެކޮޅަށް ފުލުހަށް މައްސަލަ ހުށަހަޅާފަ އެވެ. ބޯޓުގައި ރޯވެ އަނދަން ފެށުމުން ކެޕްޓަނާއި ފަޅުވެރިން ސަލާމަތް ކުރީ މިދިޔަ އަންގާރަ ދުވަހު އެވެ.
