މާލޭ ނޯތު ހާބަރުގައި މިހާރު ދެމުން އަންނަ ހިދުމަތްތައް ބަދަލުކޮށް، ވިޔަފާރި ބަނދަރު ތަރައްގީކުރަން ހިންގާ މަޝްރޫއުގައި ހިމެނޭ ގުޅިފަޅުން އިތުރު ގޯތި ދޫކުރަން ޕްލޭނަށް ބަދަލު ގެންނަން މަޝްވަރާކުރަން ރައީސް އިބްރާހިމް މުހައްމަދު ސޯލިހު އެއްބަސްވެވަޑައިގެންފައިވާ ކަމަށް މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ކުރީ ސަރުކާރުގައި ހައުސިން މިނިސްޓަރަކަށް މުއިއްޒު ހުންނެވިއިރު ނިންމާފައިއޮތީ މާލެ ވިޔަފާރި ބަނދަރު ތިލަފުއްޓަށް ބަދަލުކޮށް، ގުޅިފަޅު ހިއްކައި އެތަނުން ގޯއްޗާއި ފްލެޓު ދޫކުރުމަށެވެ.
ނަމަވެސް، ރައީސް ސޯލިހުގެ ސަރުކާރުން އެ ނިންމުން ބަދަލުކޮށް، ވިޔަފާރި ބަނދަރު ތަރައްގީކުރުމުގެ މަޝްރޫއު ހިންގަން ނިންމާފައިވަނީ ގުޅިފަޅުގަ އެވެ.
އެކަމާ ދެކޮޅަށް އެންމެ ހަރުއަޑުން ވަކާލާތު ކުރައްވަމުން މޭޔަރު ކަމަށް އިންތިހާބުވުމާއެކު، ކުރިން އޮތް ގޮތަށް ގުޅިފަޅަކީ ގެދޮރުވެރި މަންޒިލެއްގެ ގޮތުގައި ތަރައްގީކުރަން މުއިއްޒު އިސްވެ ހުންނަވައިގެން އާ ސިޓީ ކައުންސިލުން ވަނީ ނިންމައިފަ އެވެ.
ރައީސް ސޯލިހާ މިއަދު ބައްދަލުކުރެއްވުމަށްފަހު މިރޭ ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ ގުޅިފަޅުގައި ޕޯޓު މަޝްރޫއު ހިންގުން ހުއްޓާލުމާ ގުޅޭގޮތުން މަޝްވަރާ ކުރެވުނު ކަމަށެވެ.
މުއިއްޒު ވިދާޅުވި ގޮތުގައި ގުޅިފަޅުގައި ޕޯޓު އެޅުމަށް ނިންމީ ފަންނީ ގިނަ ބޭފުޅުންގެ މަޝްވަރާތަކުގެ އިތުރުން ކުރީ ސަރުކާރުގައި ނިންމާފައި އޮތް ކަރުދާހެއްގެ މައްޗަށް ބިނާކޮށް ކަމަށް ރައީސް ވިދާޅުވި ކަމަށެވެ.
ނަމަވެސް، ގުޅިފަޅުގައި ލައިޓް އިންޑަސްޓްރިއަލް ތަނެއްގެ ގޮތުގައި ތަރައްގީ ކުރަން ފުރަތަމަ ނިންމީ އޭރު ތިލަފުށީގައި ކުނި އަންދާތީ ކަމަށާއި، ނަމަވެސް ފަހުން އެހެން ގޮތަކަށް ކުނި މެނޭޖުކުރެވޭ ގޮތް ވުމުން އެތަނުގައި ޕޯޓު އެޅުމަށް ނިންމާފައިވާ ކަމަށް ރައީސަށް ދެންނެވި ކަމަށެވެ.
"މާލެ ރައްޔިތުންނަށް އޮތް އެންމެ ބޮޑު ކަމަކީ ދާއިމީ ގެދޮރުވެރިކަން ނޫނީ ގޯތި ލިބޭނެ ގޮތެއް ނެތުން. އެހެންވީމާ މާލޭގެ ރައްޔިތުން އެންމެ ބޭނުންވަނީ ގުޅިފަޅު ހިއްކައިގެން ގޯތި ލިބޭނެ ރެޒިޑެންޝަލް ސިޓީއަކަށް ވެގެންދިޔުން،" މުއިއްޒު ވިދާޅުވި އެވެ.
މޭޔަރު ވިދާޅުވީ ގުޅިފަޅު ޑިޒައިން ކުރެވިފައިއޮތީ ޕޯޓު ހަދަންކަމުން، މިހާރު އެކަމަށް ހެދިފައިވާ އެއްބަސްވުމަށް ބަދަލެއް ގެނައުމަކީ ފަސޭހަ ނިންމުމަކަށް ނުވާނެ ކަމަށް ގަބޫލުކުރައްވާ ކަމަށެވެ.
އެކަމަކު މިހާރު މާލެ ރައްޔިތުން އުޅޭ ނިކަމެތި ހާލަށް ބަލައި، އެންމެ ރަނގަޅު ގޮތަކީ ގުޅިފަޅަކީ ގެދޮވެރި މަންޒިލެއްގެ ގޮތުގައި ތަރައްގީކުރުން ކަމަށް ރައީސަށް ތަކުރާރުކޮށް ދެންނެވި ކަމަށް މުއިއްޒު ވިދާޅުވި އެވެ.
ގުޅިފަޅުގެ ޕްލޭން ފައިނަލް ކުރުމުގަ ސިޓީ ކައުންސިލް ވަރަށް މުހިއްމު ދައުރެއް އަދާކުރަންޖެހޭ ފާހަގަކުރައްވައި، މިހާރު ހެދިފައި އޮތް ޕޯޓު އެޅުމުގެ ޕްލޭނަށް ބަދަލު ގެންނަން ކައުންސިލާ އެކީގައި މަސައްކަތް ކުރުމަށް ކަމާބެހޭ އިދާރާތަކުގައި ދަންނަވާނެ ކަމުގެ ޔަގީންކަން އެމަނިކުފާނު ދެއްވިކަމަށް މޭޔަރު ވިދާޅުވި އެެވެ.
މި ސަރުކާރުން ގުޅިފަޅުގައި ޕޯޓު ހެދުމުގެ ޕްލޭން ހާމަކުރުމާއެކު ގިނަ ބަޔަކު ޝަކުވާ ކުރަން ފެށުމުން، އެތަނުން ވަކި ސަރަހައްދަކުން 1،200 ގޯތި ދޫކުރާނެ ކަމަށް މީގެ ކުރިން ވަނީ ބުނެފަ އެވެ.
މުއިއްޒު މިރޭ ވިދާޅުވި ގޮތުގައި މި ސަރުކާރުން މިހާރު ކަނޑައަޅާފައިވާ 1،200 ގޯތީގެ ޖާގަ ކަނޑައެޅިފަ އޮތް ނަމަވެސް، އެ ނިންމުން ބަދަލުކުރުމުގެ ވިސްނުން ރައީސް މިއަދު ހާމަކުރެއްވި ކަމަށެވެ.
"އެތަނުގަ މިހާރު ވެއާހައުސް ނޫނީ ގުދަން ކުރުމަށް އޮތް ޖާގަ މާލެ ސަރަހައްދުގެ އެހެން ތަނަކަށް ބަދަލުކޮށް، އެތަނުގަ 30،000 އެއްހާ ރައްޔިތުންނަށް އެޅެވޭ ވަރުގެ ޖާގައެއް ސިޓީ ކައުންސިލާ އެކީގައި މަސައްކަތްކޮށް އެ ބަދަލު ގެންނަން ސިޓީ ކައުންސިލާ އެކީގައި އިށީންނަށް ކަމާބެހޭ ފަރާތްތަކުގައި ދަންނަވާނެ ކަމަށް،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި 30،000 ރައްޔިތުންނަށް ގެދޮރު ބިނާކުރެވޭނަމަ، އެއީ ގާތްގަނޑަކަށް 5،000 ގޯތި އަދި އިތުރު ފްލެޓުތައް އެޅޭނެ ކަމަށް އަންދާޒާ ކުރެއްވޭ ކަމަށެވެ.
ނަމަވެސް، އެވަރުން ފުއްދައި ނުލައްވައި، ގުޅިފަޅަކީ ގެދޮވެރި މަންޒިލެއްގެ ގޮތުގައި ކައުންސިލުން ނިންމާފައި ނިންމުމުގެ މަތީގައި ތިބޭނެ ކަމަށް މުއިއްޒު ނުސީދާކޮށް ވިދާޅުވި އެވެ.
"މިއީ ފެށުމެއް. މި ފެށުމުގެ ތެރެއިން ރައްޔިތުން ބޭނުންވާ ގޮތަށް ގުޅިފަޅަކީ ގެދޮރުގެ މަންޒިލަކަށް ބަދަލުވެ، ޕޯޓު ތިލަފުއްޓަށް ބަދަލުވެގެންދާނެ ކަމަށް އަޅުގަނޑު އުއްމީދުކުރަން."
ޕޯޓު ތަރައްގީ ކުރުމުގެ މާސްޓާ ޕްލޭނާ އެއްގޮތަށް ގުޅިފަޅު ހިއްކުމުގެ މުޅި މަޝްރޫ އަށް 120 މިލިއަން ޑޮލަރު (1.86 ބިލިއަން ރުފިޔާ) އަރާނެ ކަމަށް ޕްލޭނިން މިނިސްޓްރީން ވަނީ ލަފާކޮށްފަ އެވެ.
ބީލަމަށް ނުލައި ބޮސްކާލިސްއާ ފުރަތަމަ ފިޔަވަހި ހަވާލުކުރީ 53 މިލިއަން ޑޮލަރު (817 މިލިއަން ރުފިޔާ) އަށެވެ.
އެތަން ހިއްކުމުގެ ފުރަތަމަ ފިޔަވަހި މިހާރު ނިމިފައިވާއިރު، ލޯނު ހަމަޖެހުމުން ދެވަނަ ފިޔަވަހި ވެސް ވަރަށް އަވަހަށް ފެށިގެންދާނެ ކަމަށް ޕްލޭނިން އަދި ހައުސިން މިނިސްޓްރީން ވަނީ ބުނެފަ އެެވެ.
