ރައީސް އިބްރާހިމް މުހައްމަދު ސޯލިހާއި މާލޭގެ މޭޔަރު ޑރ. މުހައްމަދު މުއިއްޒު މިއަދު ބައްދަލު ކުރައްވައިފި އެވެ.
ރައީސް އޮފީހުގައި މިއަދު ބޭއްވި ބައްދަލު ކުރެއްވުމާ ގުޅޭގޮތުން މުއިއްޒު ކުރެއްވި ޓްވީޓެއްގައި ވިދާޅުވީ މާލޭގެ ރައްޔިތުންގެ ކަންބޮޑުވުންތައް ހިއްސާ ކުރުމުގެ އިތުރުން ސިޓީ ކައުންސިލްގެ މަސައްކަތްތައް ތަންފީޒު ކުރުމަށް ބޭނުންވާ އެހީތެރިކަމާމެދު މަޝްވަރާ ކުރެއްވި ކަމަށެވެ.
އެ ބައްދަލު ކުރެއްވުމަކީ އުއްމީދީ ބައްދަލުވުމެއް ކަމަށް ވިދާޅުވެ މުއިއްޒު ވަނީ ރައީސް ދެއްވި ވަގުތާއި ދެއްވި އުއްމީދީ ޖަވާބުތަކަށް ޝުކުރުއަދާ ކުރައްވައިފަ އެވެ.
އިދިކޮޅު ޕީޕީއެމްއަށް ނިސްބަތްވާ މުއިއްޒު ހުވާ ކުރެއްވުމުގެ ރަސްމިއްޔާތުގައި ވިދާޅުވީ ސަރުކާރުން އެއްބާރުލުން ދޭނަމަ ސިޓީ ކައުންސިލް ވެގެން ދާނީ ސަރުކާރުގެ އެންމެ ގާތް މުއައްސަސާ ކަމުގައި ކަމަށެވެ.
މުއިއްޒު މޭޔަރުކަމުގެ އިންތިހާބު ކާމިޔާބު ކުރެއްވީ ގިނަ ވައުދުތަކަކާއެކު އެވެ. މުއިއްޒު ވަނީ ގުޅީފަޅުގައި މިސަރުކާރުން ޕޯޓެެއް އެޅުމަށް ކުރާ މަސައްކަތް ވެސް ހުއްޓާލުމަށް ފަހު އެ ރަށުގައި ބޯހިޔާވަހިކަމުގެ މަޝްރޫތައް ހިންގުމަށް ސަރުކާރަށް ގޮވާލައިފަ އެވެ.
ދާދި ފަހުން މަގާމާ ހަވާލުވެވަޑައިގެން މުއިއްޒު ގެންދަވަނީ ގިނަ މަސައްކަތްތަކެއް ކުރައްވަމުންނެވެ.
ރައީސާ މުއިއްޒު މިއަދު ބައްދަލު ކުރައްވާފައިވާއިރު މަސައްކަތްތަކާ ގުޅޭގޮތުން ވަކިވަކި މިނިސްޓަރުންނާ ވެސް މީގެ ކުރިން ވަނީ ބައްދަލު ކުރައްވައިފަ އެވެ.
